ۇلى بريتانيا ەڭ قيىن كەزەڭدى باستان كەشىپ جاتىر
لوندون. KAZINFORM – ۇلى بريتانيا پرەمەر-ءمينيسترى ەلدە تەك ەكونوميكالىق عانا ەمەس، قوعامدىق احۋال دا تۇراقسىز ەكەنىن مويىندادى، دەپ حابارلايدى Kazinform ءتىلشىسى.
«جاعداي جاقسارعانعا دەيىن ءبىراز ابىگەرگە تۇسەمىز»، دەپ مالىمدەدى كير ستارمەر. ۇكىمەت باسشىسى قازان ايىنداعى جاڭا بيۋدجەتتى قابىلداۋ قيىنعا سوعاتىنىن، ءبىراق باسقا تاڭداۋ جوقتىعىن ەسكەرتتى. كونسەرۆاتورلار بولسا، ساياساتكەردى «ەشقاشان ورىنداعىسى كەلمەگەن ۋادەلەرىنەن حالىقتىڭ نازارىن باسقا جاققا اۋدارىپ وتىر» دەپ ايىپتادى.
كەزدەسۋ داۋنينگ ستريتتەگى باقتا ءوتتى. ءدال وسى جەردە بۇرىنعى ۇكىمەت باسشىسى بوريس دجونسون كارانتين كەزىندە ساۋىق كەشتەرىن وتكىزىپ، قىزمەتىنەن ايىرىلعانى بەلگىلى. كير ستارمەر سيمۆوليزمدى ءتۇسىنىپ، پرەمەر-مينيستر رەتىندەگى العاشقى ءسوزىن وسىندا سويلەدى. ساياساتكەر ەكونوميكانى عانا ەمەس، قوعامدى دا قۇردىمعا جىبەرۋگە از قالدى دەپ كونسەرۆاتورلاردى ايىپتاپ، ۇلتتىڭ تەرەڭ پروبلەمالارى تۋرالى تەبىرەندى.
«قازان ايىندا بيۋدجەت قابىلدانادى جانە ءبىراز قينالاتىن ءتۇرىمىز بار. قازىرگى جاعدايىمىزدى ەسكەرسەك، بىزدە باسقا تاڭداۋ جوق. كەڭ يىقتى قوعام مۇشەلەرى اۋىر جۇكتى كوتەرۋى كەرەك. جاعداي جاقسارعانعا دەيىن ءبىراز ابىگەرگە تۇسەمىز»، - دەدى ۇلى بريتانيا پرەمەر-ءمينيسترى كير ستارمەر.
ستارمەر «كەڭ يىقتى» دەپ كىمدى مەڭزەپ وتىرعانىن جانە بيۋدجەتكە قانداي ناقتى وزگەرىستەر ەنگىزەتىنى تۋرالى ازىرگە ايتپادى. ول سونداي-اق جاقىندا بولعان جاپپاي تارتىپسىزدىكتەرگە توقتالىپ، كوتەرىلىستەر 14 جىل بيلىكتە وتىرعان كونسەرۆاتورلاردىڭ ەڭبەگىنىڭ جەمىسى دەپ مالىمدەدى. پرەمەر- مينيستر ەلدى قالپىنا كەلتىرۋ ءۇشىن قاتاڭ شارالار قابىلداۋعا ۋادە بەردى.
«بيىلعى تارتىپسىزدىكتەرمەن كۇرەس 2011-جىلعا قاراعاندا الدەقايدا قيىن بولدى. ول ۋاقىتتا سوتتاردىڭ باتىل ارەكەت ەتە الاتىنىنا كۇماندانباعان ەدىم. ءبىراق ولاي بولمادى. ال بۇل جولى ءبىز كۇن سايىن قىلمىسكەرلەردى تەز تۇتقىنداۋعا جانە ولاردى سوتتاۋعا بولاتىندىعىنا كوز جەتكىزۋ ءۇشىن تۇرمەلەردىڭ ناقتى سانىن تەكسەرىپ وتىردىق»، - دەدى ۇلى بريتانيا پرەمەر-ءمينيسترى كير ستارمەر.
پرەمەر-ءمينيستردىڭ بايانداماسى ءتۇرلى كەراعار پىكىر تۋعىزدى. كونسەرۆاتورلار وزدەرىنە تيەسىلى ايىپتاۋلاردى ءۇزىلدى-كەسىلدى جوققا شىعاردى. «لەيبوريستەر وسىلايشا سالىقتى كوتەرۋگە دەگەن شىنايى نيەتىن كورسەتىپ وتىر»، دەپ مالىمدەدى ولار. وپپوزيتسيا، سونىمەن قاتار، بيۋدجەتتە دەفيتسيت بار دەگەنمەن كەلىسپەيدى.
«كەز كەلگەن قارجى جىلىنىڭ ورتاسىندا كەيبىر سالالاردا ارتىق شىعىندار، ال باسقالارىندا جەتىسپەيتىن تۇستار بولاتىنى انىق. سالىق تۇسىمدەرى جوسپارلانعاننان جوعارى بولۋى مۇمكىن نەمەسە ودان اسپاۋى دا ىقتيمال. لەيبوريستەر حالىققا سالىق سالۋ ءۇشىن سىلتاۋ ىزدەپ وتىر»، - دەدى كونسەرۆاتيۆتىك پارتيا ءتوراعاسى ريچارد فۋللەر.
باسقا پارتيالاردىڭ وكىلدەرى دە لەيبوريستەردى سىنعا الدى. ەلدەگى جاعداي ءۇشىن توري ۇكىمەتى عانا ەمەس كير ستارمەر باسقارعان پارتيا دا كىنالى جانە ونى مويىنداۋى كەرەك دەپ مالىمدەدى. ساراپشىلار بولسا، قوس پارتيانى دا سايلاۋ كەزىندە اق سويلەمەدى دەپ ايىپتادى.
«پارتيالار شىندىقتى ايتقىسى كەلمەدى. ولار سالىقتى كوبەيتۋ، شىعىنداردى ازايتۋ نەمەسە قارجىلىق ەرەجەلەردى وزگەرتۋ كەرەكتىگى تۋرالى الدىن الا ءبىلدى. سايلاۋ اياقتالعانعا دەيىن ولاردىڭ ەشقايسىسى بۇل تۋرالى جاق اشپادى»، - دەيدى قارجىلىق زەرتتەۋلەر ينستيتۋتىنىڭ ديرەكتورى پول دجونسون.
لەيبوريستەر ۇكىمەتى ءوزىنىڭ العاشقى بيۋدجەتىن تانىستىرۋدى جوسپارلاپ وتىر. بريتان حالقىنىڭ ەكونوميكالىق قايتا قۇرۋدىڭ قيىن كەزەڭدەرىنە دايىن بولۋدان باسقا امالى جوق. پرەمەر-مينيستر اۋىر، ءبىراق قاجەتتى شەشىمدەر الدىندا شىدامدى بولۋعا شاقىرىپ الەك.
قارجى ءمينيسترى بۇعان دەيىن مۇراگەرلىك جانە بايلىق سالىعىن كوتەرىپ، زەينەتاقى جەڭىلدىكتەرى سالاسىنداعى رەفورمالاردى قولعا الاتىنىن جوققا شىعارماعان ەدى. بۇعان قوسا ۇكىمەت قىس مەزگىلىندە الەۋمەتتىك قامسىزداندىرۋ تولەمدەرى مەن جىلۋعا بەرىلەتىن جاردەماقىلاردىڭ قىسقارعانىن جاريالاپ، حالىقتىڭ الاڭداۋشىلىعىن تۋدىردى.
اۆتور
عالىمجان قارامان ۇلى
