ەلوردادا وقۋ ورىندارىنىڭ بىرىندە شەتەلدىكتەردى زاڭسىز تىركەۋمەن اينالىسقاندار ۇستالدى
استانا. KAZINFORM - ىشكى ىستەر مينيسترلىگى زاڭسىز كوشى-قون ارنالارىنىڭ جولىن كەسۋ بويىنشا جۇيەلى جۇمىس جۇرگىزىپ جاتىر.
مينيسترلىكتىڭ قىزمەتكەرلەرى استانادا شەتەلدىكتەردى زاڭسىز تىركەۋمەن اينالىسقان كۇدىكتىنى ۇستادى.
- ول ارنايى حالىققا قىزمەت كورسەتۋ ورتالىعى ارقىلى جالعان قۇجاتتاردى پايدالانىپ، جاقىن شەت ەلدەردەن كەلگەن ونداعان ازاماتقا قازاقستاندا ۋاقىتشا تۇرۋعا رۇقساتتى زاڭسىز راسىمدەگەن. ءتىنتۋ بارىسىندا دايىن مەديتسينالىق بلانكتەر، مورلەر، ەلەكتروندىق تاسىمالداعىشتار جانە قىزمەتكە قاتىستى باسقا دا قۇجاتتار تاركىلەندى، - دەدى ءى ءى م كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ.
ودان بولەك ەلورداداعى وقۋ ورىندارىنىڭ بىرىندە شەتەلدىكتەردى زاڭداستىرۋ بويىنشا ۇقساس قىلمىستىق سحەما انىقتالدى.
وقۋ ورنىنىڭ ەكى قىزمەتكەرى الىس شەتەلدىڭ 68 دەن استام ازاماتىنا جالعان وقۋ شاقىرۋلارىن راسىمدەگەن. كاسىپكەرمەن شەتەلدىك ستۋدەنتتەردى تارتۋ تۋرالى جالعان كەلىسىم جاساپ، وقۋ پروتسەسىن «قولدان» ۇيىمداستىرعان. وسى قۇجاتتار نەگىزىندە شەتەل ازاماتتارى قازاقستانعا كىرىپ، زاڭسىز جۇمىس ىستەگەن.
- اتالعان فاكتىلەر بويىنشا «زاڭسىز كوشى-قوندى ۇيىمداستىرۋ» بابىمەن سوتقا دەيىنگى تەرگەۋ امالدارى جۇرگىزىلۋدە. بيىل وسىنداي سەگىز زاڭسىز ارنا انىقتالىپ، جويىلدى. زاڭسىز كوشى-قونمەن كۇرەس - ىشكى ىستەر مينيسترلىگىنىڭ باسىم باعىتتاردىڭ ءبىرى، - دەدى قانات نۇرماعامبەتوۆ.
ايتا كەتەلىك ەلدە بيىل ىزدەۋدە جۇرگەن 700 دەن استام قىلمىسكەر ۇستالعان ەدى.
