ەلوردادا تۇرعىن ءۇي سالۋعا ۋاقىتشا شەكتەۋ قويىلا ما - اكىم جاۋابى
استانا. KAZINFORM - استانا قالاسىنىڭ اكىمى ەلوردادا تۇرعىن ءۇي سالۋ قارقىنى مەن ساپاسىنا قاتىستى تۇسىنىك بەردى.
«ءبىز جىلىنا 4 ميلليون شارشى مەتر تۇرعىن ءۇي سالىپ جاتىرمىز، ونىڭ ىشىندە ءارتۇرلى ۇيلەر بار. ساپاسى جوعارى، ورتاشا جانە باسقا. ءارتۇرلى جاعداي بولادى، ۇيلەرگە قاتىستى ناقتى سۇراقتار بولسا ءبىز ونى تەكسەرەيىك»، - دەدى جەڭىس قاسىمبەك بيزنەس قاۋىمداستىعى وكىلدەرىمەن كەزدەسۋى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.
سونىمەن قاتار جۋرناليستەر ەلوردا اكىمىنە قالادا تۇرعىن ءۇي سالۋدى ۋاقىتشا شەكتەۋگە قاتىستى ساۋال قويدى.
«كەرەك ەمەس، ونداي ماسەلە كوتەرىلگەن جوق»، - دەپ قىسقا قايىردى ج. قاسىمبەك.
بۇعان دەيىن استانادا جىل سوڭىنا دەيىن 9 پروبلەمالى تۇرعىن ءۇيدىڭ قۇرىلىسى اياقتالاتىنى تۋرالى حابارلاعان ەدىك.
سونداي-اق جۋىردا ەلوردا اكىمدىگى ەسكى تۇرعىن ۇيلەردى جاڭارتۋ باعدارلاماسى اياسىندا اپاتتى ۇيلەردى بۇزۋ جانە تۇرعىنداردى جاڭا ۇيلەرگە كوشىرۋ تۋرالى جوسپارىن جاريالادى.
