ەلوردادا «تارلان» كوركەم فيلمىنىڭ جابىق كورسەتىلىمى ءوتتى

استانا. قازاقپارات - بۇگىن ەلوردادا «تارلان» كوركەم فيلمىنىڭ جابىق كورسەتىلىمى ءوتتى، دەپ حابارلايدى 24kz.

كينوتۋىندى قازاقستاننىڭ AlmaPictures جانە تاتارستاننىڭ «تاتاركينو» كينوستۋديالارىنىڭ بىرلەسكەن جوباسى. كارتينا مازمۇنى تاتار ادەبيەتىنىڭ كلاسسيگى عالىمجان يبراگيموۆتىڭ «الماچۋار» اتتى اڭگىمەسىنە نەگىزدەلگەن. بۇل - زاكىر ەسىمدى بالا مەن ونىڭ تارلان اتتى تۇلپارى اراسىنداعى جۇرەك تەبىرەنتەرلىك دوستىق حيكاياسى. فيلم بالانىڭ ەر جەتۋى، جالعىزدىقپەن كۇرەسى جانە ىشكى رۋحاني دامۋى تاقىرىپتارىن قوزعايدى. باستى كەيىپكەر شىنايىلىق پەن ادالدىقتى جانۋار دوسىنان تابادى.

ايتا كەتەيىك، جوبا مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن جۇزەگە استى.

ادىلەت وماروۆ، ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسىنىڭ ورىنباسارى:

- بۇل جوبا تەك كوپشىلىك كورەرمەنگە عانا ارنالماعان. بۇعان دەيىن كوپتەگەن حالىقارالىق فەستيۆالدەردە جۇلدەگەر اتانعان. ياعني، بۇل - حالىقارالىق ارەنادا دا مويىندالعان جوبالاردىڭ ءبىرى. كوپتەگەن حالىقارالىق 15 كينوفەستيۆالدىڭ جۇلدەگەرى اتانعان. بۇگىن مىنە، كورەرمەنگە جول تارتپاق.