ەلوردادا 14 مىڭنان استام قاريا ۇزاق ءومىر ءسۇرۋ ورتالىقتارىنا بارادى

استانا. قازاقپارات - ەلوردادا 14 مىڭنان استام قاريا قالا اكىمدىگى جانىنان قۇرىلعان «بەلسەندى ۇزاق ءومىر ءسۇرۋ ورتالىقتارىنا» بارادى، دەپ حابارلايدى 24KZ.

ءبىرى دەنەسىن شىنىقتىرىپ، يوگامەن اينالىسسا، ەندى ءبىرى ۆوكال مەن بي كۋرستارىنا جازىلعان. ساۋلە راحمەتوۆا ءومىرىنىڭ 40 جىلىن ۇستازدىققا ارناعان جان. شەت تىلدەرى ءپانىنىڭ مۇعالىمى بولىپ قىزمەت ەتكەن. بايقوڭىر اۋدانىنداعى بۇل ورتالىققا 2 جىل بۇرىن كەلدى. ەمدىك دەنە شىنىقتىرۋدىڭ اعزاسىنا پايداسى زور ەكەنىن ايتادى. سەكسەننىڭ سەڭگىرىنە شىقسا دا، ءوزىن سەرگەك سەزىنەدى.

ورتالىق قابىرعاسىندا مەديتسينا قىزمەتكەرلەرى دە جۇمىس ىستەيدى. ولار ەگدە تارتقان ادامداردىڭ قان قىسىمىن، جۇرەك قاعىسىن جانە سالماعىن ۇدايى تەكسەرىپ وتىرادى.

الەكساندر كاترۋك، بايقوڭىر اۋدانى بەلسەندى ۇزاق ءومىر ءسۇرۋ ورتالىعىنىڭ كەڭەسشى-مامانى:

- ءار كەلۋشىنىڭ دەنساۋلىعىنا قاراي ۇيىرمە تاڭداپ بەرەمىز. ەڭ الدىمەن سوزىلمالى اۋرۋلارىنىڭ بار-جوعىن انىقتايمىز. بويى مەن سالماعىن جانە تىنىس الۋ جۇيەسىن تەكسەرەمىز. جينالعان مالىمەتتەردى ەسكەرىپ، ساۋىقتىرۋ گيمناستيكاسى، يوگا، بي، سيگۋن، كۋنگ-فۋ سياقتى ۇيىرمەلەرگە جازامىز. بۇل عيماراتتان بولەك ورنالاسقان سپورت كەشەنىندە تاعى تۇزدى شاحتا مەن باسسەين بار. ول جاققا دا تەگىن جولداما بەرىلەدى.

«مۇنىڭ ءبارى التسگەيمەر، پاركينسون جانە دەمەنتسيا سياقتى دەرتتەردىڭ الدىن الۋعا باعىتتالعان»، - دەيدى ماماندار.

ۇلتتىق كيىم كيگەن بۇل اقجاۋلىقتى انالارىمىز ۇرشىق ءيىرىپ وتسا دا، مۋزىكا ونەرىنەن ەش كەندە ەمەس. ورتالىق قابىرعاسىندا ءجۇن ءتۇتىپ، كىلەم توقيدى. تاقيا، كيمەشەك جانە شالا تۋعان سابيلەرگە ارناپ جىلى كيىم-كەشەك تىگەدى.

كۇلاش داۋلەتوۆا، زەينەتكەر:

- 73 جاستامىن. وسى ورتالىققا كەلگەلى دەنساۋلىعىم تۇزەلدى. وسىعان قاتىسقانىما ريزامىن. ءوزىمنىڭ نەمەرەلەرىم بيسەر توقيدى. ۇرشىق ءيىرۋدى ۇيرەنىپ ءجۇر. 9 جاستاعى قىزىم توقىما توقيدى.

ورتالىققا قازىر 3 مىڭنان استام زەينەتكەر كەلىپ ءجۇر. ونىڭ %80- ءى - ايەلدەر. ەرلەر كوبىنە ۇستەل تەننيسى، شاحمات، توعىزقۇمالاق ۇيىرمەلەرىنە قاتىسادى.

كاميلا امان، بەلسەندى ۇزاق ءومىر ءسۇرۋ ورتالىعى اقپاراتتىق-تانىمدىق ءبولىمىنىڭ مامانى:

- ەگدە جاستاعى اپا-اجەلەرىمىز وسى ورتالىققا كەلىپ، جاڭا ورتا تابادى، دوس تابادى. كەيبىر اتا- اجەلەرىمىز قۇدالارىمەن بىرگە كەلىپ وتىرادى. كۇيەۋلەرىمەن، جۇبايلارىمەن كەلەدى. جالعىزباستى اتالار مەن اپالار وسى جاقتا وتاۋ قۇراتىنداي جاعدايلار دا بولىپ تۇرادى.

روزا بايسالبايەۆا، بايقوڭىر اۋدانى ۇزاق ءومىر ءسۇرۋ ورتالىعىنىڭ باسشىسى:

- ۇيدە نەمەرە-شوبەرە باعىپ وتىرسا دا، وزىنە كىشكەنە ۋاقىتىن ءبولىپ، وزىنە كوزقاراسى باسقاشا بولادى. سول ءۇشىن وسى ورتالىقتى اشقان اكىمشىلىككە راقمەتىمىزدى ايتامىز.

ورتالىقتىڭ ەڭ ۇلكەن قىزمەت الۋشىسىنىڭ جاسى 90-دا بولسا، ەڭ كىشىسى 63-تە. ۇيىرمەلەردىڭ ىشىندە سكانديناۆيالىق ءجۇرىس، ارت-تەراپيا، قازاق ءتىلى، اعىلشىن ءتىلى جانە كومپيۋتەرلىك كۋرستار دا بار. بارلىعى 20 كلۋب جۇمىس ىستەيدى.

گۇلدانا شومەنبايەۆا، بەلسەندى ۇزاق ءومىر ءسۇرۋ ورتالىعىنىڭ جەتەكشى مامانى:

- جالپى بىزدە زەينەتكەرلەر وسى ورتالىققا العاش كەلگەن كەزدە رەسەپشنگە جاقىندايدى جانە ۇيىرمەلەرمەن، كلۋبتارمەن تانىستىرىپ شىعامىز. اڭگىمە-سۇحبات قۇرامىز. زەينەتكەرلەردى تىركەۋ كەزىندە مىندەتتى تۇردە زەينەتكەرلىك كۋالىگىن تەكسەرەمىز. سول ارقىلى ورتالىققا تىركەلەدى.

ايتا كەتكەن ءجون، باس شاھاردا «بەلسەندى ءارى ۇزاق ءومىر ءسۇرۋدىڭ» 5 بىردەي ورتالىعى بار. الداعى ۋاقىتتا سارايشىق اۋدانىندا دا اشىلادى.

24.kz