لوندوندا وكپە وبىرىنا قارسى ۆاكسيناعا سىناق جۇرگىزىلدى

استانا. قازاقپارات- الەمدە ءار بەس ادامنىڭ بىرەۋىندە قاتەرلى ىسىك پايدا بولادى. وكىنىشكە قاراي، ءولىم-ءجىتىم كورسەتكىشى جىل سايىن ۇلعايىپ كەلەدى. دۇنيەجۇزىلىك دەنساۋلىق ساقتاۋ ۇيىمى وسىلاي دەيدى.

بۇل دەرتپەن كۇرەسۋ ءۇشىن ءبىراز ەل ميللياردتاعان قارجى ءبولىپ، ونى ەمدەۋ ءۇشىن جاڭا تەحنولوگيالار مەن زاماناۋي ادىستەر ەنگىزىپ جاتىر. تاياۋدا ۇلى بريتانيا بيلىگى العاشقىلاردىڭ ءبىرى بولىپ وبىرعا قارسى ۆاكسينا ويلاپ تاپتى. قازىر بريتاندىقتار ونى سىناقتان وتكىزىپ جاتىر. ءبىراز ەل بۇل باستامانى قۇپتاپ، بىرتىندەپ دەنساۋلىق ساقتاۋ جۇيەسىنە ەنگىزىپ جاتىر.

لوندوندا وكپە وبىرىنا قارسى ۆاكتسيناعا سىناق جۇرگىزىلدى

تاياۋدا لوندون ۋنيۆەرسيتەتىنىڭ عالىمدارى الەمدە العاش بولىپ وكپە وبىرىنا قارسى ۆاكسينا ويلاپ تاپتى. سىناۋ ماقساتىندا ەكپەنى ءبىرىنشى بولىپ ماماندار 67 جاستاعى يانۋش راتس ەسىمدى بريتاندىق تۇرعىنعا سالدى. ونىڭ ايتۋىنشا، دارىگەرلەر وعان ەمدەلمەسە، بار-جوعى 4-5 اي عانا ءومىر سۇرەتىنىن ەسكەرتكەن. سول سەبەپتى ناۋقاس ءوزى عالىم بولعان سوڭ كەلەشەكتە وسى يننوۆاتسيالىق تەراپيانى قولجەتىمدى ەتۋ ماقساتىندا قابىلداۋعا كەلىسىم بەرگەن.

الدىمەن وعان جارتى ساعات ىشىندە 5 ءتۇرلى ەكپە سالعان. كەيىن ءار اپتا سايىن 1,5 اي قابىلدايدى. سوسىن ءار ءۇش اپتادا ءبىر جىلدان استام ۋاقىت سالعىزىپ تۇرادى. مامانداردىڭ ايتۋىنشا، ۆاكسينا ناۋقاستىڭ يممۋندىق جۇيەسى ارقىلى ىسىككە ارنايى ماركەر ەنگىزەدى. بۇل وبىر جاسۋشاسىن جويۋعا مۇمكىندىك بەرەدى. اتالعان ءادىس - حيميوتەراپيادان الدەقايدا ءتيىمدى ءداستۇرلى ەمدەۋدىڭ ءبىر ءتۇرى.

سيوۋ مين لي، لوندون ۋنيۆەرسيتەتى اۋرۋحاناسىنىڭ ونكولوگ-دارىگەرى، پروفەسسور:

- زەرتتەۋگە ا ق ش، تۇركيا، گەرمانيا، يسپانيا، پولشا، ۆەنگريا ەلدەرىنەن 130-عا جۋىق ادام، قاتەرلى ىسىكتىڭ ءارتۇرلى كەزەڭىندەگى ناۋقاستار قاتىسادى. سىناق بارىسىندا بۇل ءادىستى جالعىز نەمەسە قولدانىستاعى ەمدەۋ جۇيەسىمەن بىرگە پايدالانۋعا بولاتىنىن انىقتاۋعا ءۇمىتتىمىز.

يانۋش راچ، سىناققا قاتىسۋشى:

- عالىم رەتىندە مەن ادامداردىڭ وسى سەكىلدى تاجىريبەگە قاتىسۋعا كەلىسكەن جاعدايدا عانا عىلىم داميتىنىن جاقسى بىلەمىن. مەن جاساندى ينتەللەكت سالاسىندا جۇمىس ىستەيمىن. سول سەبەپتى جاڭا دۇنيەلەردى كورىپ-بىلۋگە اركەز دايىنمىن. مەنىڭ وتباسىم دا وسى سىناق تۋرالى اقپاراتتى زەرتتەپ، قاتىسۋىما قولداۋ ءبىلدىردى.

حالىقارالىق وبىردى زەرتتەۋ ۇيىمىنىڭ مالىمەتىنە سايكەس 2021 -جىلى ۇلى بريتانيادا 393 مىڭ ادام ونكولوگيالىق اۋرۋعا شالدىققان. بۇل دەگەنىڭىز، كۇنىنە شامامەن مىڭ كىسىدە قاتەرلى ىسىك انىقتالعانىن ايعاقتايدى. كورولدىك تۇرعىندارى اراسىندا اسىرەسە ءسۇت بەزى جانە قۋىق استى بەزى وبىرى كەڭ تاراعان.

وكسفورد عالىمدارى انالىق بەز وبىرىنا قارسى ۆاكسينا ازىرلەپ جاتىر

ال وكسفورد ۋنيۆەرسيتەتىنىڭ عالىمدارى انالىق بەز قاتەرلى ىسىگىنە قارسى ۆاكسينا ازىرلەپ جاتىر. OvarianVax دەپ اتالاتىن پرەپارات وبىردىڭ العاشقى بەلگىلەرىن بىردەن انىقتاپ، وعان قارسى ارەكەت ەتەدى. زەرتتەۋشىلەردىڭ ايتۋىنشا، دايىن ءونىم ايەلدەر اراسىندا پروفيلاكتيكالىق ەكپە سالدىرۋ ارقىلى جامان اۋرۋدىڭ الدىن الۋعا مۇمكىندىك بەرەدى.

احمەد اشۋر، وكسفورد ۋنيۆەرسيتەتىنىڭ زەرتحانا ديرەكتورى:

- ءۇش جىلدان سوڭ ءبىز ناۋقاستاردى ۆاكسينانى سىناقتان وتكىزۋگە ۇيرەتە باستايمىز. پرەپارات قۇرامىنا ەڭ ماڭىزدى قوسپا رەتىندە انتيبيوتيك ەنگىزدىك. سونداي-اق ناۋقاستردىڭ يممۋندىق جۇيەسىنەن قاتەرلى ىسىك تۋعىزاتىن كانسەروگەندەردى قولدانامىز. ءسۇيتىپ يممۋندىق كانسەروگەنگە قارسى ۆاكسينا ازىرلەيمىز. بىلە بىلسەڭىز، تانىمال COVID-19 ۆاكسيناسىن ءدال وسى ءبىزدىڭ وكسفورد ۋنيۆەرسيتەتىنىڭ عالىمدارى جاساپ شىعاردى. بۇل جولى دا ءتيىمدى ءادىسىن ويلاپ تابامىز دەگەن ۇمىتتەمىن.

رەسەيدە كەلەر جىلى ونكو ۆاكسينا قولدانىسقا ەنەدى

رەسەيدە كەلەر جىلى قاتەرلى ىسىككە قارسى ۆاكسينا قولدانىسقا ەنەدى. بۇل اسىرەسە توق ىشەك، تىك ىشەك، مي جانە تەرى وبىرىنا قاتىستى. ەكپەنى جەرگىلىكتى فەدەرالدى مەديتسينالىق- بيولوگيالىق اگەنتتىك ماماندارى ازىرلەپ جاتىر. ولار الدىمەن جانۋارعا تاجىريبە جاساپ كورگەن. ناتيجەسىندە پرەپاراتتى ەنگىزۋ كەزىندە ىسىكتىڭ دامۋى كۇرت باياۋلاپ، كولەمى %75-80 تومەندەگەن.

جاۋاپتى مامانداردىڭ سوزىنە قاراعاندا، ۆاكسينانى ەنگىزگەن كەزدە جانۋاردىڭ ءومىر ءسۇرۋ ۇزاقتىعى ارتىپ، اۋرۋدى باقىلاۋعا مۇمكىندىك العان.

ۆەرونيكا سكۆورتسوۆا، رەسەي فەدەرالدىق مەديتسينالىق-بيولوگيالىق اگەنتتىگىنىڭ باسشىسى:

- ءبىز بۇل ۆاكسينا بويىنشا ءۇش جىلدىق زەرتتەۋ جۇمىسىمىزدى اياقتادىق. بيىل ەلىمىزدە دەربەستەندىرىلگەن پرەپاراتتى قولدانۋ تۋرالى زاڭ قابىلداندى. ءبىز ونى كەلەسى جىلدان باستاپ ناۋقاستارعا قولدانۋدى باستايمىز.

د د س ۇ: قاتەرلى ىسىككە شالدىعۋشىلىق كۇرت ءوستى

د د س ۇ مالىمەتى بويىنشا قاتەرلى ىسىك - تۇتاس جەر جۇزىندە ءولىم-ءجىتىمنىڭ نەگىزگى سەبەبى. 4 جىل بۇرىن 10 ميلليوننان استام ادام ونكولوگيادان كوز جۇمسا، ونىڭ 1,8 ميلليونى - وكپە وبىرىنا شالدىققاندار. ال 2022 -جىلى جامان اۋرۋدىڭ بارلىق ءتۇرى بويىنشا تاعى 20 ميلليون جاعداي تىركەلدى. اسىرەسە الەم بويىنشا ءسۇت بەزى، وكپە، توق ىشەك جانە تىك ىشەك، سونداي-اق قۋىق استى بەزى قاتەرلى ىسىگى ۋشىعىپ تۇر.

«مۇنىڭ جالعىز عانا ەمى بار. ول - ۆاكسينا»، - دەيدى ماماندار. ەگۋ جۇيەسى الەم بويىنشا كەيىنگى 2 عاسىردان بەرى قولدانىستا. سودان بەرى ءبىراز اۋرۋعا قارسى ۆاكسينا قولدانىسقا ەنگىزىلىپ، ونى زەرتتەۋ قارقىنى كۇرت ءوستى. كەيىنگى 50 جىلدا ەكپە الەم بويىنشا 154 ميلليون ادامنىڭ ءومىرىن ساقتاپ قالدى. ونىڭ شامامەن %65- ءى - سابيلەر مەن بالالار. ەگەر عالىمداردىڭ قاتەرلى ىسىككە قارسى ۆاكسينا سىناقتارى ءساتتى جۇزەگە اسسا، بۇل سان ايتارلىقتاي ءوسۋى مۇمكىن.

24.kz