ۇلتتىق قۇرىلتاي - 2025: پرەزيدەنت 54 تاپسىرما جۇكتەدى
استانا. KAZINFORM - بيىل بۋرابايدا وتكەن ۇلتتىق قۇرىلتايدىڭ قورىتىندىسى بويىنشا مەملەكەت باسشىسى قاسىم-جومارت توقايەۆ مەملەكەتتىك قۇزىرلى ورگاندارعا ءبىرقاتار تاپسىرما بەردى.
- بۋراباي تورىندە وتكەن ۇلتتىق قۇرىلتايدا ءبىرقاتار ماڭىزدى ماسەلە تالقىلاندى. پرەزيدەنت تاراپىنان ەلىمىزدىڭ ساياسي جانە الەۋمەتتىك دامۋىنا ىقپال ەتەتىن وزەكتى تاپسىرمالار بەرىلىپ، قۇرىلتاي مۇشەلەرىنىڭ مازمۇندى ۇسىنىستارى ايتىلدى. اتالعان وتىرىستا پرەزيدەنت تاراپىنان جالپى سانى 54 تاپسىرما بەرىلسە، ونىڭ ىشىندە مادەنيەت جانە اقپارات مينيسترلىگىنە 21 مىندەت جۇكتەلدى، - دەدى مادەنيەت جانە اقپارات ءمينيسترى ايدا بالايەۆا ارداگەرلەر كەڭەسىنىڭ پلەنۋمىندا.
ءمينيستردىڭ مالىمدەۋىنشە، قازىر مەملەكەت باسشىسىنىڭ تاپسىرماسىن ىسكە اسىرۋ ماقساتىندا پرەزيدەنت اكىمشىلىگى بەكىتكەن كەشەندى جوسپار اياسىندا جۇمىس باستالىپ كەتتى.
- سونىمەن قاتار ءبىزدىڭ مينيسترلىكتە ۇلتتىق قۇرىلتايدىڭ جۇمىس ورگانى رەتىندە قۇرىلتاي مۇشەلەرىنەن تۇسكەن ۇسىنىستار بويىنشا دەربەس جوسپار بەكىتىلدى. قۇرىلتاي مۇشەلەرىنەن جالپى سانى 113 ۇسىنىس تۇسسە، ونىڭ ىشىندە 32 ءى ءبىزدىڭ ۆەدومستۆوعا قاتىستى ۇسىنىستاردى قامتيدى. اتالعان ۇسىنىستار اراسىندا ارداگەرلەر ۇيىمدارىمەن بىرلەسە اتقارىلاتىن ماڭىزدى باعىتتار دا بار، - دەيدى ول.
ەسكە سالايىق، 14-ناۋرىزدا بۋرابايدا ۇلتتىق قۇرىلتايدىڭ IV وتىرىسى ءوتتى. مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدا قوزعاعان نەگىزگى جايتتارمەن سىلتەمەگە ءوتىپ تانىسۋعا بولادى.
سونداي-اق بۇگىن مەملەكەتتىك كەڭەسشى ەرلان قارين ىشكى ساياسات ماسەلەلەرىن تالقىلاۋ ءۇشىن ۇلتتىق قۇرىلتاي مۇشەلەرىمەن كەزدەستى.
ايتا كەتەيىك، بۇگىن ەلوردادا رەسپۋبليكالىق ارداگەرلەر ۇيىمى كەڭەسىنىڭ كەزەكتى پلەنۋمى ءوتتى. وعان ەلىمىزدىڭ بارلىق وڭىرىنەن ارداگەرلەر كەڭەسىنىڭ ءتوراعالارى قاتىستى.
