«ۇلتتىق كيىمدەگى ارۋ»: قازاقشا كيىنگەن سۆەتلانا پودوبەدوۆا كوپشىلىكتى ءتانتى ەتتى
استانا. KAZINFORM - اۋىر اتلەتيكادان ەكى دۇركىن الەم چەمپيونى سۆەتلانا پودوبەدوۆا ناۋرىز مەرەكەسى قارساڭىندا كيەتىن ۇلتتىق كيىم تاڭداپ جاتىر. استاناداعى كيىم دۇكەندەرىنىڭ بىرىنەن ايەل ادامدارعا ارنالعان تاقيا مەن اشەكەيلى كومزولدى ولشەپ كورگەن سپورتشى كوپشىلىكتىڭ پىكىرىن سۇرادى.
الەۋمەتتىك جەلىدە ۇلتتىق كيىمدە جۇرگەن بەينەجازباسىن جاريالاعان اۋىراتلەت كوپشىلىكتىڭ قولداۋىنا يە بولدى.
ايتا كەتەيىك، ول قازاق وتباسىنىڭ كەلىنى.
«جاراسىپ تۇر»، «ناعىز قازاق قىزى»، «جارايسىڭ»، «تەك قانا العا»، «بۇرىن اۋىراتلەت بولدى دەپ ەشكىم ايتپاس ەدى» دەگەن سىنايدا پىكىر جازىپ قالدىرعان.
سۆەتلانا پودوبەدوۆا اۋىر اتلەتيكادان الەم چەمپيوناتىنىڭ ەكى دۇركىن جەڭىمپازى، ءبىر مارتە كۇمىس جۇلدەگەرى. 2009 -جىلى ازيا چەمپيونى اتانعان. سونداي-اق، 2010 -جىلى گۋاڭجوۋدا وتكەن ازيا ويىندارىندا جەڭىمپاز بولدى. لوندون وليمپياداسىنا قاتىسقان سپورتشى چەمپيون اتانعانىمەن، 2016 -جىلى دوپينگ سىناماسىنا قاتىستى تەستىلەۋدەن وتە الماي، كەيىن حالىقارالىق وليمپيادا كوميتەتى ونىڭ جەتىستىگىن جوققا شىعارىپ، مەدالدى كەرى قايتارۋىن تالاپ ەتتى. الايدا، پودوبەدوۆا پاتەردەن پاتەرگە كوشىپ جۇرگەن ۋاقىتتا وليمپادا چەمپيونىنا تيەسىلى التىن مەدالدى جوعالتىپ العانىن ايتىپ، ح و ك تالابىن ورىندامادى.
بۇگىندە نۇرلان قارابالين ەسىمدى قورعالجىن تۋماسىنا تۇرمىسقا شىققان سپورتشى جۇبايىمەن بىرگە ءبىر ۇل تاربيەلەپ وتىر. جولداسى دا سپورتتان قۇر الاقان ەمەس. ول - م م ا بويىنشا استانا قالاسىنىڭ اعا باپكەرى.
