ۇلتتىق مۇددە - ءبىرىنشى ورىندا: ەرلان قارين توقايەۆتىڭ بەرليندەگى مالىمدەمەسىنە توقتالدى
استانا. KAZINFORM - ەرلان قارين پرەزيدەنت قاسىم-جومارت توقايەۆتىڭ بەرليندەگى مالىمدەمەسىنە توقتالىپ، ۇلتتىق مۇددە، تۇراقتىلىق پەن بەيبىتشىلىك قازاقستاننىڭ باستى باسىمدىعى ەكەنىن اتاپ ءوتتى.
- كەشە بەرليندەگى باسپا ءسوز ءماسليحاتىندا مەملەكەت باسشىسى قاسىم-جومارت توقايەۆ ەلىمىزدىڭ جۇرگىزىپ وتىرعان ىشكى جانە سىرتقى ساياساتىنا قاتىستى ءبىرقاتار سۇراققا جاۋاپ بەردى. كوپتەگەن وتكىر تاقىرىپتارعا قاتىستى ءوزىنىڭ ويىن اشىق جەتكىزىپ، ەلىمىزدىڭ ۇستانىپ وتىرعان پوزيتسياسىن كەڭىنەن ءتۇسىندىردى. وسى ۆيدەو سول جيىنداعى مالىمدەمەلەردىڭ ءتۇيىندى تۇجىرىمى سياقتى كورىنەدى. پرەزيدەنت ءۇشىن ۇلتتىق مۇددە ءبىرىنشى ورىندا ەكەنىن انىق جەتكىزدى. قازاقستاننىڭ دامۋى ءۇشىن ەڭ الدىمەن قاجەتتى العىشارت تۇراقتىلىق پەن بەيبىتشىلىك ەكەنىن ايتا وتىرىپ، وسى جولدا مەملەكەت باسشىسى رەتىندە بار كۇش-جىگەرىن جۇمسايتىنىن مالىمدەدى، - دەلىنگەن جازبادا.
ۆيتسە-پرەزيدەنتتىڭ سوزىنشە، پرەزيدەنتتىڭ تۇلعالىق بولمىسى دا، جۇرگىزىپ وتىرعان ساياساتى دا وسى جاۋاپتا جاتىر.
- سوندىقتان، ەلىمىزدىڭ بارلىق ماقساتتارعا، بولاشاق جەتىستىكتەرگە قول جەتكىزۋى ءۇشىن تۇراقتىلىق پەن بەيبىتشىلىك كەرەك ەكەنىن ەستەن شىعارمايىق، - دەدى ول.
