ەلوردادا LRT قۇرىلىسىنا قاتىستى ءىستى تەرگەۋ شارالارى اياقتالدى
بۇل تۋرالى سىبايلاس جەمقورلىققا قارسى ءىس-قيمىل اگەنتىگىنىڭ ەكىنشى دەپارتامەنتىنىڭ باسشىسى سەرگەي پەروۆ ءمالىم ەتتى، دەپ حابارلايدى قازاقپارات ءتىلشىسى.
«قىلمىستىق ءىستى تەرگەۋ اياقتالدى. قىلمىستىق ءىستىڭ ماتەريالدارىمەن تانىسۋ باستالدى. جاسىرىنىپ جۇرگەن كۇدىكتىلەرگە قاتىستى ىزدەۋ شارالارى جالعاسۋدا. انىقتالعان شىعىن سوماسى 5,7 ميلليارد تەڭگەنى قۇرادى»، - دەدى دەپارتامەنت باسشىسى تىلشىلەر ساۋالىنا جاۋاپ بەرە وتىرىپ.
وسى ورايدا ول اتالعان ءىس بويىنشا 10 نان استام ادامنىڭ جاۋاپكەرشىلىگى تەكسەرىلىپ جاتقانىن ەسكە سالدى. بۇل تۇرعىدا ينتەرپول جەلىسى بويىنشا ىزدەستىرۋ شارالارى جۇرگىزىلۋدە.
«ءۇش ادامعا ىزدەۋ جاريالانعان. بۇگىندە ماتەريالدارمەن تانىسۋ ءجۇرىپ جاتىر، وسىدان كەيىن ءىس سوتقا جولدانادى. وسى ورايدا اشىق سوت وتىرىسى وتەدى»، - دەدى س. پەروۆ.
ەسكە سالساق، پرەزيدەنت LRT قۇرىلىسىن جەدەلدەتۋدى جانە وعان قاتىستى ءىستى تەرگەۋدى تاپسىرعان بولاتىن.
