ەلدەگى سۋ تاسقىنى كولەمى جاعىنان سوڭعى 80 جىلداعى ەڭ ءىرى تابيعي اپات - پرەزيدەنت
استانا. KAZINFORM - مەملەكەت باسشىسى قاسىم-جومارت توقايەۆ ەلىمىزدىڭ ءبىرقاتار وبلىسىنداعى سۋ تاسقىنى سالدارىنان قالىپتاسقان كۇردەلى جاعدايعا بايلانىستى قازاقستان حالقىنا ۇندەۋ جاريالادى. پرەزيدەنت مۇنداي احۋال ۇزاق جىلدان بەرى بولماعانىن، بۇل كولەمى جاعىنان سوڭعى 80 جىلداعى ەڭ ءىرى تابيعي اپات ەكەنىن ايتتى.
مەملەكەت باسشىسى سۋ تاسقىنىنا بايلانىستى ەلىمىزدىڭ ون ايماعىندا توتەنشە جاعداي جاريالانعانىن ايتتى. اباي، اقمولا، اقتوبە، اتىراۋ، باتىس قازاقستان، قاراعاندى، قوستاناي، پاۆلودار، سولتۇستىك قازاقستان جانە ۇلىتاۋ وبلىستارى اتالدى.
«قاردىڭ كۇرت ەرۋىنە بايلانىستى ايماقتاردا سۋ تاسقىنى بولىپ جاتىر. بۇل - تابيعي اپات. مۇنداي احۋال ۇزاق جىلدان بەرى بولماعان. بۇل كولەمى جاعىنان سوڭعى 80 جىلدان بەرگى ەڭ ءىرى تابيعي اپات دەۋگە بولادى. جاعداي وتە كۇردەلى بولسا دا، ءبىز قيىندىقتى مىندەتتى تۇردە ەڭسەرەمىز، بارلىعىن قالپىنا كەلتىرەمىز. ەڭ باستىسى - ازاماتتاردىڭ اماندىعى.» - دەدى پرەزيدەنت.
مەملەكەت باسشىسى بۇقارالىق اقپارات قۇرالدارىن، بەلسەندى ازاماتتار مەن بلوگەرلەردى جۇرتتى دۇربەلەڭگە سالاتىن جالعان اقپارات تاراتپاۋعا شاقىردى. قازىرگى ۋاقىتتا بيلىك پەن قوعامدى ۇيىستىراتىن ارەكەتتەر جاساۋ اسا ماڭىزدى ەكەنىنە توقتالدى.
«ازاماتتاردى تەك قانا رەسمي اقپارات كوزدەرىنە سۇيەنۋگە شاقىرامىن» - دەدى پرەزيدەنت.
سونداي-اق ول قۇتقارۋشىلارعا، ءتارتىپ ساقشىلارىنا، ۆولونتەرلەرگە جانە اپاتپەن كۇرەسۋگە اتسالىسىپ جاتقان بارشا جۇرتقا العىسىن ايتتى.
«وسىنداي قيىن- قىستاۋ كەزدە ءبىر جاعادان باس، ءبىر جەڭنەن قول شىعارۋ ايرىقشا ماڭىزدى. ءبىر ەل، ءبىر حالىق بولىپ جۇمىلىپ، بۇل اپاتتى ەڭسەرەمىز. بۇل ءبىزدىڭ قولىمىزدان كەلەدى» - دەپ ۇندەۋ جولدادى.
