ەل يميدجى - ولجاس بەكتەنوۆ بيىل 53 ۆوكزالدى قايتا جاڭعىرتۋدى تاپسىردى

استانا. KAZINFORM - بيىل ەلىمىزدىڭ 53 تەمىرجول ۆوكزالىن رەكونسترۋكتسيالاۋ جوسپارلانىپ وتىر. بۇل تۋرالى كولىك ءمينيسترى مارات قارابايەۆ ۇكىمەت وتىرىسىندا ايتتى.

ءمينيستردىڭ ايتۋىنشا، ءقازىر بۇل جوبالاردى قاراجاتپەن قامتاماسىز ەتۋ ماقساتىندا حالىقارالىق قارجى ينستيتۋتتارىمەن كەلىسسوزدەر جۇرگىزىلىپ جاتىر .

- جالپى، تەمىرجول سالاسىنداعى جوبالاردى جۇزەگە اسىرۋ 20 جىلداعى الەۋمەتتىك- ەكونوميكالىق باعىتتا 11 تريلليون تەڭگە بولاتىن مۋلتيپليكاتيۆتى اسەرگە قول جەتكىزۋگە مۇمكىندىك بەرەدى. سونداي-اق، 2025-2029 -جىلدارى جالپى ىشكى ءونىمنىڭ وسىمىنە شامامەن 0,4-تەن %1 دەڭگەيىندە ۇلەس قوسۋعا ىقپال ەتەدى، − دەدى مارات قارابايەۆ بۇگىنگى ۇكىمەت وتىرىسىندا.

سونىمەن بىرگە، مينيستر بارلىق جوبا بويىنشا بيىلعى ءساۋىر ايىندا قۇرىلىس-مونتاجداۋ جۇمىستارىن باستاۋ جوسپارلانعانىن ايتتى.

پرەمەر-مينيستر ولجاس بەكتەنوۆ ۆوكزالداردى جاڭعىرتۋ ماسەلەسىنە ەرەكشە توقتالدى.

- ۆوكزالدار بويىنشا وزىڭىزگە تاپسىرما بەرگەن بولاتىنمىن. بۇل وتە ماڭىزدى، ەلىمىزدىڭ يميدجىنە، بەدەلىنە وتە اسەر ەتەتىن ماسەلە. سوندىقتان ونى بيىل اياقتاۋ قاجەت، ءتيىستى قارجىلاندىرۋ قاجەت، - دەدى ۇكىمەت باسشىسى.

ايتا كەتەيىك، بيىل قازاقستاننىڭ 5 مىڭ شاقىرىمعا جۋىق تەمىرجولى جاڭعىرتىلادى. قىزىلجار - مويىنتى» جاڭا تەمىرجول جەلىسى سالىنادى، «التىنكول - جەتىگەن» جانە «بەينەۋ - ماڭعىستاۋ» ۋچاسكەلەرى جاڭعىرتىلادى.

ەلىمىزدە جالپى سانى 59 ۆوكزال بار. ولاردىڭ باسىم بولىگى «قازاقستان تەمىر جولىنىڭ» بالانسىندا، ال الماتى-1، الماتى-2، پاۆلودار، ەكىباستۇز، اقسۋ، تۇركىستان جانە شىمكەنت ۆوكزالدارى اكىمدىكتەردىڭ قاراماعىندا.

سونداي-اق، قازاقستانداعى جولدار قۇرىلىسىندا وتاندىق كومپانيالارعا ارتىقشىلىق بەرىلەدى. بيىل «جەزقازعان- قاراعاندى»، «اقتوبە- ۇلعايسىن»، «اتىراۋ- دوسسور» جاڭا جولدارىنىڭ قۇرىلىسى باستالادى.

اۆتور

ايجان سەرىكجان قىزى