ەلگە موڭعوليادان جەتكىزىلگەن 20 توننا قوي ەتى كەرى قايتارىلدى
استانا. KAZINFORM - «سىرىم» ۆەتەريناريالىق باقىلاۋ بەكەتىندە جۇك اۆتوكولىكتەرىن تەكسەرۋ بارىسىندا بيداي كەبەگى مەن مۇزداتىلعان قوي ەتىن تاسىمالداۋ كەزىندە ۆەتەريناريالىق-سانيتاريالىق تالاپتاردىڭ بۇزىلعانى انىقتالدى.
اتاپ ايتقاندا، رەسەي فەدەراتسياسىنىڭ ۋليانوۆ وبلىسىنان تۇركىستان وبلىسىنىڭ سايرام اۋدانىنا 40 توننا بيداي كەبەگى تاسىمالدانعان. ونىمدە ۆەتەريناريالىق ىلەسپە قۇجاتتار، تەرميالىق وڭدەۋ جانە تاڭبالاۋ بولماعان.
تاعى ءبىر جاعدايدا موڭعوليانىڭ ۇلان-باتىر قالاسىنان تاجىكستاننىڭ دۋشانبە قالاسىنا 20 توننا مۇزداتىلعان قوي ەتى تاسىمالدانعان. تەكسەرۋ كەزىندە اتالعان ءونىمدى قازاقستان اۋماعى ارقىلى ترانزيتتىك تاسىمالداۋعا قاتىستى ۋاقىتشا شەكتەۋلەردىڭ قولدانىستا بولعانى ايقىندالدى. بۇل شەكتەۋلەر ەپيزووتيالىق احۋال قولايسىز بولعان رەسەي فەدەراتسياسىنىڭ اۋماقتارىنان ءونىمدى ترانزيتتىك وتكىزۋگە بايلانىستى ەنگىزىلگەن.
جۇك اۆتوكولىكتەرى كەرى قايتارىلدى. جۇرگىزۋشىلەرگە قاتىستى اكىمشىلىك قۇقىق بۇزۋشىلىق تۋرالى كودەكستىڭ 406-بابى بويىنشا اكىمشىلىك حاتتامالار تولتىرىلىپ، ايىپپۇلدار سالىندى. جۇك تاسىمالداۋشىلارعا ە ا ە و- نىڭ ۆەتەريناريالىق-سانيتاريالىق تالاپتارى ءتۇسىندىرىلدى.
2026-جىلدىڭ باسىنان بەرى اتالعان بەكەتتە 249 زاڭبۇزۋشىلىقتىڭ جولى كەسىلدى. 249 جۇك اۆتوكولىگى كەرى قايتارىلىپ، 117 تۇلعاعا قاتىستى اكىمشىلىك حاتتامالار تولتىرىلىپ، ايىپپۇلدار سالىندى.
اۋىل شارۋاشىلىعى مينيسترلىگى جۇك تاسىمالداۋشىلار مەن سىرتقى ەكونوميكالىق قىزمەتكە قاتىسۋشىلاردى قازاقستاننىڭ جانە ە ا ە و- نىڭ ۆەتەريناريالىق-سانيتاريالىق تالاپتارىن ساقتاۋعا شاقىرادى.
بەلگىلەنگەن تالاپتاردى ساقتاۋ جانە ۆەتەريناريالىق ىلەسپە قۇجاتتاردى دۇرىس رەسىمدەۋ زاڭبۇزۋشىلىقتاردىڭ الدىن الۋ مەن ەلدىڭ ەپيزووتيالىق قاۋىپسىزدىگىن قامتاماسىز ەتۋدىڭ ماڭىزدى شارتتارى سانالادى.
ايتا كەتەلىك قازاقستان جىل سوڭىنا دەيىن قىتايمەن شەكاراارالىق QR تولەمدەرىن ىسكە قوسپاق.
