ەل بيۋجەتىن باسقاراتىندار كازينودا جۇرمەۋى كەرەك - ديدار سماعۇلوۆ
استانا. KAZINFORM - تۋريزم جانە سپورت مينيسترلىگىنىڭ جۇمىس توبى مەملەكەتتىك قىزمەتشىلەر مەن قۇقىق قورعاۋ ورگاندارىنا قۇمار ويىندارعا تىيىم سالۋدى قاراستىرىپ جاتىر. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
ق ر تۋريزم جانە سپورت مينيسترلىگى جانىنداعى مەملەكەتتىك قىزمەتشىلەردىڭ، اسكەري قىزمەتشىلەردىڭ، قۇقىق قورعاۋ جانە ارناۋلى ورگاندار قىزمەتكەرلەرىنە قۇمار ويىندارعا جانە ءباس تىگۋگە تىيىم سالۋدى ەنگىزۋ تۋرالى پەتيتسيانى قاراۋ بويىنشا جۇمىس توبىنىڭ ءبىرىنشى وتىرىسى ءوتتى.
ءىس-شاراعا جۇمىس توبىنىڭ مۇشەلەرى: پەتيتسيا اۆتورى، «ادىلدىك جولى» باسشىسى ديدار سماعۇلوۆ، پارلامەنت دەپۋتاتتارى، ازاماتتىق بەلسەندىلەر، مۇددەلى مەملەكەتتىك ورگاندار مەن ويىن بيزنەسىنىڭ وكىلدەرى قاتىستى. تۋريزم جانە سپورت ۆيتسە-ءمينيسترى ميراس تولەبايەۆ وتىرىستى اشىپ، پەتيتسياعا 50 مىڭ ادام قول قويعانىن جانە كودەكسكە سايكەس مينيسترلىك 40 كۇن ىشىندە شەشىم قابىلداۋى ءتيىس ەكەنىن اتاپ ءوتتى.
ۆەدومستۆو ويىن بيزنەسى سالاسىنداعى مەملەكەتتىك باقىلاۋدى كۇشەيتۋ جانە مەملەكەتتىك اپپاراتتا قوسا العاندا، لۋدومانيانىڭ الدىن الۋ جونىندەگى جۇمىستى باستادى. ديدار سماعۇلوۆ ءوتىنىشتىڭ سەبەبىن ءتۇسىندىرىپ، لاۋازىمدى تۇلعالاردىڭ قۇمار ويىندارعا قاتىسۋىنا بايلانىستى سىبايلاس جەمقورلىق تاۋەكەلدەرى تۋرالى الاڭداۋشىلىق ءبىلدىردى.
«بۇل پەتيتسيا قۇمار ويىنداردان بولاتىن زياندى ازايتۋ ءۇشىن قاجەت، ەل بيۋجەتىن باسقاراتىندار كازينودا جۇرمەۋى كەرەك. سەبەبى كازينو - ۇلكەن سىبايلاس جەمقورلىق تاۋەكەلى. ارينە، ەشكىم ويىن اشىق ايتا المايدى، ءبىراق جينالىستاردا باستامانى قايتا قاراۋ كەرەك ەكەندىگى تۋرالى اڭگىمەلەر بار. ياعني، بەلگىلى ءبىر لوببي پايدا بولدى»، - دەپ اتاپ ءوتتى ازاماتتىق بەلسەندى ديدار سماعۇلوۆ.
پارلامەنت ءماجىلىسىنىڭ دەپۋتاتى ە. بەيسەنبايەۆ جۇمىس توبىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكتسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولدىرماۋ ماسەلەلەرى بويىنشا وزگەرىستەر ەنگىزۋ تۋرالى»، ونىڭ ىشىندە قۇمار ويىندارعا جانە شەنەۋنىكتەردىڭ، اسكەريلەردىڭ جانە پوليتسەيلەردىڭ ءباس تىگۋىنە قاتىسۋىن شەكتەۋ بويىنشا زاڭ جوباسىنىڭ نوۆەللالارىمەن ءبولىستى.
«بۇل باستامانى تاريحي وقيعا دەپ اتاۋعا بولادى. قۇمار ويىنداردىڭ مەملەكەتتىك قىزمەتشىلەر مەن قۇقىق قورعاۋ ورگاندارىنا، ونىڭ ىشىندە ۇلتتىق قاۋىپسىزدىك وكىلدەرىنىڭ پسيحيكاسىنا قاۋىپ توندىرەتىنىن ەسكەرە وتىرىپ، ءبىز ءماجىلىس وكىلدەرىنىڭ اتىنان پەتيتسياعا قولداۋ بىلدىرەمىز. بۇعان قوعامنىڭ نازار اۋدارىپ جاتقانى دا قۋانتادى»، - دەپ اتاپ ءوتتى سپيكەر.
سونداي-اق ماجىلىسمەن پەتيتسيا مۇنداي شەكتەۋگە قارسى لوببيستەردىڭ قارسىلىعىن جەڭۋگە كومەكتەستى دەپ مالىمدەدى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىكتەرىنىڭ وكىلدەرى مەملەكەتتىك ورگاندار قىزمەتكەرلەرىنىڭ قۇمار ويىندارعا جانە ءباس تىگۋگە قاتىسۋىن باقىلاۋ تەتىكتەرى تۋرالى ايتىپ بەردى. جالپى جۇمىس توبىنىڭ وتىرىسى سىندارلى تۇردە ءوتتى جانە تالقىلاۋ قورىتىندىسى بويىنشا مينيسترلىك شەشىمىنىڭ جوباسىنا ۇسىنىستار ايتىلدى. شەشىم جوباسىن بارلىق پىكىرلەردى ەسكەرە وتىرىپ، مينيسترلىكتە 2024-جىلعى 25-ماۋسىمدا ساعات 17:30 دا وتەتىن جۇمىس توبىنىڭ ەكىنشى وتىرىسىندا قاراۋ جوسپارلاندى.
