ل گ ب ت-عا قارسى پەتيتسيا: بالالار اۋديتورياسىنا انايى كونتەنت تاراتۋعا شەكتەۋ قويىلادى
استانا. KAZINFORM - بۇگىن «قازاقستان رەسپۋبليكاسىندا ل گ ب ت-نى اشىق جانە جاسىرىن تۇردە ناسيحاتتاۋعا قارسىمىز!» پەتيتسياسى بويىنشا شەشىم جوباسىنا جاريا تالقىلاۋ ءوتتى. وتىرىسقا مادەنيەت جانە اقپارات مينيسترلىگى، ىشكى ىستەر مينيسترلىگى، وقۋ-اعارتۋ مينيسترلىگى، ادىلەت مينيسترلىگى، دەنساۋلىق ساقتاۋ مينيسترلىگىنىڭ وكىلدەرى، پارلامەنت دەپۋتاتتارى، ساراپشىلار، قوعام قايراتكەرلەرى مەن ب ا ق وكىلدەرى قاتىستى.
كەزدەسۋدە مەملەكەتتىك ورگانداردىڭ، ءوتىنىش بەرۋشىلەردىڭ، ساراپشىلاردىڭ جانە باسقا دا مۇددەلى تاراپتاردىڭ ۇستانىمدارى ايتىلعان جۇمىس توبىنىڭ الدىڭعى ەكى وتىرىس ناتيجەسى تالقىلاندى.
قاتىسۋشىلار پەتيتسيانى قاراۋ بارىسىندا ۇلتتىق جانە حالىقارالىق نورماتيۆتىك قۇقىقتىق اكتىلەرگە تالداۋ جۇرگىزىپ، جەتەكشى ساراپشىلارمەن كونسۋلتاتسيالار وتكىزگەنىن، قازاقستان حالقىنان الىنعان الەۋمەتتىك ساۋالنامالار ناتيجەلەرى سارالانعانىن اتاپ ءوتتى.
«ناتيجەسىندە ۋاكىلەتتى ورگان «جاسوسپىرىمدەر مەن بالالاردى جىنىستىق قاتىناستاردى ناسيحاتتاۋ مەن كۋلت قىلۋدان قورعاۋ، الشاقتاتۋ» تالاپتارىنا قاتىستى پەتيتسيانى ءىشىنارا ماقۇلداۋ تۋرالى شەشىم قابىلدادى. ياعني، بالالار اۋديتورياسىنا سەكسۋالدى كونتەنت تاراتۋعا شەكتەۋلەر ەنگىزۋ قاجەتتىلىگى قاراستىرىلىپ وتىر»، - دەلىنگەن حابارلامادا.
ق ر مادەنيەت جانە اقپارات مينيسترلىگى بۇل شەشىم الدىن الا جانە ەلدەگى نەگىزگى زاڭىنىڭ ەرەجەلەرىنە، حالىقارالىق جانە ۇلتتىق نورماتيۆتىك قۇقىقتىق قۇجاتتاردىڭ تالاپتارىنا، وتباسىلىق جانە گەندەرلىك ساياسات تۇجىرىمداماسىندا كورسەتىلگەن مەملەكەتتىك ساياساتتىڭ نەگىزگى باسىمدىقتارىنا سايكەس كەلەتىنىن اتاپ ءوتتى.
«سونىمەن قاتار، مينيسترلىكتىڭ شەشىمى «بالا قۇقىقتارى تۋرالى» قازاقستان رەسپۋبليكاسىنىڭ زاڭىنا جانە كونۆەنتسياعا نەگىزدەلەدى. زاڭعا سايكەس مەملەكەتتىك ورگاندار، جەكە جانە زاڭدى تۇلعالار بالانى الەۋمەتتىك ورتانىڭ، قانداي دا ءبىر اقپاراتتىڭ، ونىڭ دەنساۋلىعىنا، ادامگەرشىلىگىنە جانە رۋحاني دامۋىنا زيان كەلتىرەتىن ناسيحات پەن ۇگىتتىڭ كەرى اسەرىنەن قورعاۋعا مىندەتتى»، - دەپ حابارلادى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى.
قازاقستان رەسپۋبليكاسىنىڭ زاڭناماسىنا سايكەس، مينيسترلىك رەسمي شەشىمدى وسى جىلدىڭ 6-تامىزىنا دەيىن پەتيتسيا اۆتورىنا جولدايدى. وسى ماسەلە بويىنشا شەشىم سول شەشىم شىعارىلعان كۇننەن باستاپ كەلەسى جۇمىس كۇنىنەن كەشىكتىرىلمەي ينتەرنەت-رەسۋرستا جاريالاناتىن بولادى.
