كيىك اتۋدان باس تارتقان جوقپىز - ەرلان نىسانبايەۆ

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ كيىك سانىن رەتتەۋ ساياساتى تۋرالى مينيسترلىك تاراتقان اقپاراتقا تۇسىنىكتەمە بەردى.

ماسەلەنىڭ ءمانى

ەسكە سالساق، ۆەدومستۆونىڭ باسپا ءسوز قىزمەتى ساراپشىلار بۇل جولى كيىك سانىن رەتتەۋدە ىزگىلىككە قايشى تاسىلدەردەن باس تارتقانىن ءمالىم ەتكەن بولاتىن.

وسىلايشا ماماندار اتۋدىڭ ورنىنا مىنانداي تاسىلدەردى قولداناتىنى ايتىلعان:

- سپۋتنيك ارقىلى باقىلاۋ جولىمەن كيىك ميگراتسياسى مەن شوعىرلانۋىن مونيتورينگىلەۋ جانە بولجاۋ؛

- كيىك سانىن بيولوگيالىق شەكتەردە (ارنايى قاۋمالداردا) ۇستاۋ ءۇشىن ۇزاق مەرزىمدى عىلىمي نەگىزدەلگەن جوسپار ازىرلەۋ؛

- فەرمەرلەرگە قولداۋ تەتىكتەرى - قورشاۋ قۇرالدارىنا سۋبسيديالار، زالالدى وتەۋ ادىستەمەسىن ازىرلەۋ؛

- ءتيىستى زاڭنامالىق وزگەرىستەر - كيىك قوزعالىس دالىزدەرىمەن ۇيلەستىرىپ، جايىلىمداردى باسقارۋ.

ءمينيستردىڭ ۇستانىمى

الايدا مينيستر ەرلان نىسانبايەۆ بۇل مالىمەتتىڭ شىندىققا جاناسپايتىنىن ايتتى.

- بىزدە ونداي ۇستانىم جوق. ءبىز عالىمداردى جيناپ، سولاردىڭ الدىنا وسى ماسەلەنى قويعانبىز. قازىر اتۋدان باس تارتقان جوقپىز. پرەزيدەنتتىڭ تاپسىرماسى بويىنشا جۇمىس ىستەپ جاتىرمىز. ءبىراق بىزگە عىلىمي نەگىزدەمە كەرەك. ونسىز ەشتەڭە جاساي المايمىز. ناقتى شەشىم كەلەسى اپتادا بەلگىلى بولادى، - دەدى ۆەدومستۆو باسشىسى.