ۇكىمەت كوكتەمگى دالا جۇمىستارىن پىسىقتايدى

كۇن تارتىبىنە شىعارىلعان ماسەلە تالقىلانىپ بولعاننان كەيىن ب ا ق وكىلدەرىنە باسپا ءسوز ءماسليحاتى ۇيىمداستىرىلادى. وندا سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆ، ️ۆۋىل شارۋاشىلىعى ۆيتسە-ءمينيسترى ازات سۇلتانوۆ، اۋىل شارۋاشىلىعى ۆيتسە-ءمينيسترى امانعالي بەردالين، ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ تىلشىلەر تاراپىنان تۋىندايتىن ساۋالدارعا جاۋاپ بەرەدى.

ايتا كەتەيىك، ەلىمىز بويىنشا بيىلعى ەگىس القابى - 23,8 ميلليون گەكتار، بۇل وتكەن جىلمەن سالىستىرعاندا 180 مىڭ گەكتارعا ارتىق. تۇقىم قورى تولىق، اتاپ ايتقاندا، 2,3 ميلليون توننا تۇقىم دايىندالدى، ونىڭ 1,5 ميلليون تونناسى ساپا تەكسەرۋىنەن وتكەن. سونىمەن قاتار اۋىل شارۋاشىلىعى وندىرۋشىلەرىن مينەرالدى تىڭايتقىشتارمەن قامتاماسىز ەتۋ جۇمىستارى قاتار جۇرگىزىلۋدە. جوسپارلانعان 2,3 ميلليون توننا كولەمنىڭ ىشىندە 827 مىڭ تونناعا كەلىسىمشارت جاسالىپ، ونىڭ 586 مىڭ تونناسى جونەلتىلگەن.

ەگىس ناۋقانىن تابىستى وتكىزۋدىڭ نەگىزگى كورسەتكىشتەرىنىڭ ءبىرى - جانار- جاعارمايمەن قامتاماسىز ەتۋ. وسى ماقساتتا بيىلعى جىلعا 2026 -جىلعا سالا وكىلدەرى ءۇشىن 402,3 مىڭ توننا ارزانداتىلعان ديزەل وتىنى ءبولىندى. ءبىر ءليتردىڭ قۇنى 281 تەڭگە، بۇل نارىقتىق باعادان 15 پايىز تومەن.

اۋىل شارۋاشىلىعى تەحنيكاسىنىڭ دايىندىعى 98 پايىزعا جەتتى، ال جاپپاي دالالىق جۇمىستار باستالعانعا دەيىن 100 پايىزدى قامتىماق. قازىرگى ۋاقىتتا شارۋالاردىڭ قولىندا 133,9 مىڭ تراكتور، 5,6 مىڭ زاماناۋي ەگىس كەشەنى، 71,4 مىڭ تۇقىم سەپكىش جانە 188,5 مىڭ توپىراق وڭدەۋ تەحنيكاسى بار.

2026 -جىلعى ەگىن ەگۋ ماۋسىمىنا ارنالعان اۋىل شارۋاشىلىعى داقىلدارىن قۇرعاقشىلىقتان ساقتاندىرۋ مەرزىمى ۇزارتىلدى. بۇل شارا ەلىمىزدىڭ 11 وڭىرىندەگى اگرارلىق سەكتور وكىلدەرىن قامتيدى. اتاپ ايتقاندا، باعدارلاما اقمولا، اقتوبە، اتىراۋ، شىعىس قازاقستان، باتىس قازاقستان، قاراعاندى، قوستاناي، پاۆلودار، سولتۇستىك قازاقستان وبلىستارىندا، سونداي-اق اباي جانە ۇلىتاۋ وبلىستارىندا جۇزەگە اسىرىلادى.

باعدارلاما اياسىندا اۋىل شارۋاشىلىعى تاۋارىن وندىرۋشىلەر ءداندى جانە مايلى داقىلداردى ساقتاندىرۋ مۇمكىندىگىنە يە. ءداندى داقىلدار بويىنشا ءۇش كەزەڭدى ساقتاندىرۋ 15-مامىر مەن 15-تامىز ارالىعىن، ال ەكى كەزەڭدى ساقتاندىرۋ 15-ماۋسىم مەن 15-تامىز ارالىعىن قامتيدى. مايلى داقىلدار ءۇشىن ءۇش كەزەڭدى ساقتاندىرۋ مەرزىمى 15-ماۋسىمنان 14-قىركۇيەككە دەيىن، ال ەكى كەزەڭدى ساقتاندىرۋ 15-شىلدەدەن 14-قىركۇيەككە دەيىن بەلگىلەنگەن.

مەملەكەت تاراپىنان ساقتاندىرۋ جۇيەسىنە قولداۋ كورسەتىلىپ، ساقتاندىرۋ ءپوليسى قۇنىنىڭ 80 پايىزى سۋبسيديالانادى. باعدارلامانى ىسكە اسىرۋ بويىنشا تولەمدەردىڭ وپەراتورى - «اگرارلىق نەسيە كورپوراتسياسى».

ەستەرىڭىزگە سالا كەتسەك، وتكەن اپتاداعى ۇكىمەت وتىرىسىندا وتكەن جىلىتۋ ماۋسىمى قورىتىندىلانىپ، الداعى كەزەڭگە مەجەلەنگەن جۇمىستار پىسىقتالعان ەدى. كۇن تارتىبىندەگى نەگىزگى ماسەلە بويىنشا ءسوز العانەنەرگەتيكا ۆيتسە-ءمينيسترى سۇڭعات ەسىمحانوۆتىڭ ايتۋىنشا، 2025-2026 -جىلدارداعى جىلىتۋ ماۋسىمى جۇيەلى ۇيىمداستىرىلعان جۇمىستىڭ ارقاسىندا تۇراقتى ءوتتى.

جىلىتۋ كەزەڭىندە ءىرى تەحنولوگيالىق سيپاتتا قۇقىق بۇزۋشىلىقتار بولعان جوق.

تۇتىنۋشىلار ەلەكتر جانە جىلۋ ەنەرگياسىمەن تولىق قامتاماسىز ەتىلدى. 2025 -جىلى ەلەكتر ستانسيالارىندا جوندەۋ جۇمىستارىن قارجىلاندىرۋ الدىڭعى كەزەڭ دەڭگەيىنەن 348 ميلليارد تەڭگەگە دەيىن 6 پايىزعا ۇلعايتىلدى. جىلۋ جەلىلەرىندە جوندەۋ جۇمىستارىن قارجىلاندىرۋ 16 پايىزعا ۇلعايتىلىپ 129 ميلليارد تەڭگەگە دەيىن جەتكىزىلدى.

- الداعى جىلىتۋ ماۋسىمىنا دايىندىق اياسىندا ەلەكتر ستانسيالارىندا بەكىتىلگەن كەستەگە سايكەس، بيىل 9 ەنەرگوبلوكتى، 55 قازاندىقتى جانە 51 تۋربينانى كۇردەلى جوندەۋ جوسپارلانعان. 4 ەنەرگوبلوكتا، 18 قازاندىقتا جانە 7 تۋربينادا جوندەۋ جۇمىستارى ءتۇرلى كەزەڭدەردە جۇرگىزىلىپ كەلەدى. 1 قازاندىق پەن 1 تۋربينادا جوندەۋ جۇمىستارى اياقتالدى، - دەدى ۆيتسە-مينيستر.

ال «KEGOC» ا ق باسقارما ءتوراعاسى ءنابي ايتجانوۆتىڭ دەرەگىنشە، 2025 -جىلى ەلەكتر ەنەرگياسىن ءوندىرۋ 5,2 ميلليارد ك ۆت/ساعاتقا نەمەسە 4,4 پايىزعا ءوستى. 2026 -جىلعى 1-قاڭتاردا ەلەكتر ستانسيالارىنىڭ جالپى بەلگىلەنگەن قۋاتى 26,8 گ ۆت-قا جەتتى. ونىڭ ىشىندە 51 پايىزى - كومىرمەن جۇمىس ىستەيتىن جىلۋ ەلەكتر ستانسيالارى (13679,0 م ۆت)، 26 پايىزى - گازبەن جانە مازۋتپەن جۇمىس ىستەيتىن جىلۋ ەلەكتر ستانسيالارى (6846,8 م ۆت)، 9 پايىزى - گيدروەلەكتر ستانسيالارى (2534,8 م ۆت)، 14 پايىزى - جاڭارتىلاتىن ەنەرگيا كوزدەرى (3746,3 م ۆت).

وتىرىس بارىسىندا پرەمەر-مينيستر ولجاس بەكتەنوۆ «سامۇرىق- ەنەرگو» ا ق باسقارما ءتوراعاسى قايرات ماقسۇتوۆقا ەكىباستۇز گ ر ە س-تەرىنىڭ جۇمىسىندا ەشقانداي ولقىلىق بولدىرماۋدى، الماتىداعى ءۇشىنشى جىلۋ ەلەكتر ورتالىعى قۇرىلىسىن ۋاقىتىلى اياقتاۋدى تاپسىردى. سونىمەن قاتار ۇكىمەت باسشىسى وتكەن جىلىتۋ ماۋسىمى اسا ءبىر ءقاۋىپتى اپاتتىق جاعدايلارسىز وتكەنىن ايتىپ، ەندى كەلەسى جىلىتۋ ماۋسىمىنا ساپالى دايىندىقتى قامتاماسىز ەتۋ كەرەكتىگىنە نازار اۋدارتتى.

- بۇل - وڭىرلەردىڭ الدىندا تۇرعان نەگىزگى مىندەت. ەنەرگيا كوزدەرى مەن جەلىلىك جابدىقتاردى جوندەۋ جانە اۋىستىرۋ بويىنشا جوسپارلى جۇمىستاردى جالعاستىرۋ قاجەت. جىلۋ جەلىلەرىن دەر كەزىندە ءارى ساپالى سىناقتان وتكىزۋ كەرەك. ويلانىپ-تولعانىپ جۇرۋگە ۋاقىت جوق. بارلىق جۇمىس بەلگىلەنگەن مەرزىمدە جانە تولىق كولەمدە ورىندالۋعا ءتيىس. جاز بويى جۇمىستى كۇشەيتىڭىزدەر. ۇكىمەت تاراپىنان بارلىق قاجەتتى قولداۋ كورسەتىلىپ جاتىر، - دەدى ول.

مۇنان بولەك، پرەمەر-مينيستر جاۋاپتى ورتالىق ورگان باسشىلارى مەن اكىمدەرگە مىناداي ناقتى تاپسىرمالار بەردى:

- ءوڭىر اكىمدىكتەرى ەكى اپتا مەرزىمدە بارلىق كونكۋرستىق راسىمدەردى وتكىزىپ، جوندەۋ جۇمىستارىنا ناقتى كىرىسۋى قاجەت؛

- جىلۋمەن قامتاماسىز ەتۋ نىساندارىن جوندەۋ جۇمىستارىن تامىز ايىنىڭ سوڭىنان كەشىكتىرمەي اياقتاۋ كەرەك؛

- ونەركاسىپ جانە قۇرىلىس مينيسترلىگى، ءوڭىر اكىمدىكتەرى 1-قىركۇيەككە دەيىن ءبىلىم بەرۋ جانە دەنساۋلىق ساقتاۋ نىساندارىنىڭ تولىعىمەن دايىن بولۋىن قامتاماسىز ەتۋى ءتيىس؛

- سولتۇستىك، ورتالىق جانە شىعىس وڭىرلەردە بارلىق ينجەنەرلىك ينفراقۇرىلىم مەن تۇرعىن ءۇي- كوممۋنالدىق شارۋاشىلىق نىساندارى 15-قىركۇيەككە دەيىن، ال قالعان وڭىرلەردە – 15-قازانعا دەيىن تولىق ءازىر بولۋى قاجەت؛

- اكىمدەرگە جىلۋ نىساندارىنا تۇراقتى نەگىزدە بارىپ، جاعدايدى جەكە باقىلاۋعا الۋعا مىندەتتى؛

- «KEGOC» كومپانياسى ەنەرگەتيكا مينيسترلىگىمەن بىرلەسىپ، 25-مامىرعا دەيىن ۇلتتىق ماڭىزى بار ستانسيالارعا ارنالعان جابدىقتاردىڭ جۇمىس رەجيمدەرىن بەكىتۋى كەرەك؛

- ەنەرگەتيكا مينيسترلىگى كولىك مينيسترلىگىمەن جانە اكىمدىكتەرمەن بىرلەسىپ، 1-قىركۇيەككە دەيىن جىلۋ كوزدەرى مەن تەمىرجول تۇيىقتارىندا وتىن قورىن الدىن الا جيناقتاۋدى قامتاماسىز ەتۋى ءتيىس.

اۆتور

رۋسلان عابباسوۆ