ۇكىمەت ينفلياتسيامەن قالاي كۇرەسپەك - كەڭەيتىلگەن كەڭەس
استانا. KAZINFORM - ۆيتسە- پرەمەر سەرىك جۇمانعارين سەنبى كۇنى ينفلياتسيا ماسەلەلەرى بويىنشا كەڭەيتىلگەن كەڭەس وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
ۇكىمەتتىڭ بيىلعى نەگىزگى مىندەتى -%8 دان اسپايتىن ينفلياتسيا دالىزىنە كىرۋ. 10 ايداعى دەرەكتەردى جانە ينفلياتسيا يندەكسىنىڭ نەگىزگى قۇرامداس بولىكتەرى - اقىلى قىزمەتتەر، ازىق-تۇلىك جانە ازىق-تۇلىك ەمەس تاۋارلار بويىنشا باعا جاعدايىن دامىتۋ پەرسپەكتيۆالارىن ەسكەرە وتىرىپ، ۇكىمەت جىلدىق ينفلياتسيانى تەجەۋ ءۇشىن ىقتيمال شارالاردى قاراستىردى.
ۇلتتىق ستاتيستيكا بيۋروسىنىڭ مالىمەتى بويىنشا، قازان ايىندا ينفلياتسيانىڭ جالپى جىلدىق ءوسۋ قارقىنى %8,5 بولعان كەزدە ەڭ كوپ ۇلەستى اقىلى قىزمەت كورسەتۋ قوستى - %14,3. بۇل يندەكستىڭ ءوسۋى قازاقستاندا 2023 -جىلى «تاريفتى ينۆەستيتسياعا ايىرباستاۋ» مەملەكەتتىك باعدارلاماسىنىڭ باستالۋىنا بايلانىستى، ول بويىنشا ەلەكتر، جىلۋ جانە سۋمەن جابدىقتاۋ جانە سۋ بۇرۋ ينجەنەرلىك جەلىلەرىن جاڭعىرتۋ ءۇشىن اۋقىمدى سالىمدار تارتىلۋدا. ينۆەستيتسيالارعا ايىرباستاۋ ءۇشىن باعدارلاما بويىنشا تاريفتەردىڭ جىل سايىنعى بەلگىلى ءبىر ءوسۋى كوزدەلەدى. كەڭەستە اتاپ وتىلگەندەي، وسى باعدارلاما بويىنشا 2024 -جىلعا جوسپارلانعان كوممۋنالدىق قىزمەتتەرگە تاريفتەردىڭ نەگىزگى ءوسۋى جۇرگىزىلدى جانە جىل سوڭىنا دەيىن قوسىمشا ءوسۋ كۇتىلمەيدى.
ازىق-تۇلىك ەمەس تاۋارلاردىڭ ىشىندە نەگىزگى ءوسىم (2023 -جىلعى قازاندا %7,8عا ءوسىم) كيىم، اياق كيىم، اۋديوۆيزۋالدى جابدىقتار، ءدارى- دارمەك جانە باسقا دا تاۋارلاردا تىركەلدى. ازىق- تۇلىك تاۋارلارى بويىنشا جىلىنا %4,9 تومەن ءوسۋ قارقىنىمەن الەۋمەتتىك ماڭىزى بار ونىمدەر بويىنشا دەفلياتسيا بايقالادى (%0,2). جيىندا اۋىل شارۋاشىلىعى ۆيتسە- ءمينيسترى ەربول تاسجۇرەكوۆ قىسقى جانە ماۋسىمارالىق كەزەڭدە باعانى تۇراقتاندىرۋ ءۇشىن جاڭا ەگىننىڭ قالىپتاسقان ازىق- تۇلىك قورىنىڭ جاي-كۇيى تۋرالى حاباردار ەتتى. اۋىل شارۋاشىلىعى قويمالارىندا، ساۋدا ورىندارىندا، اۋىل شارۋاشىلىعى تاۋار وندىرۋشىلەرىندە ساقتالعان نەگىزگى ازىق- تۇلىكتىڭ 29 ءتۇرى بويىنشا 826 مىڭ توننادان استام قور بار. ءتۇرلى ساقتاۋ مەرزىمدەرىن ەسكەرە وتىرىپ، تۇراقتاندىرۋ قورلارىنداعى تاۋارلار ۇنەمى تولىقتىرىلىپ وتىرادى جانە ەلىمىزدىڭ بىرنەشە ايداعى جەكەلەگەن ونىمدەرگە دەگەن قاجەتتىلىگىن قاناعاتتاندىرۋعا جەتكىلىكتى.
الداعى جاڭا جىلدىق مەرەكەلەردى ەسكەرە وتىرىپ، ازىق-تۇلىك باعاسىنىڭ قىمباتتاۋ ۇردىسىنە توسقاۋىل قويۋ ماقساتىندا سەرىك جۇمانعارين وبلىستار مەن رەسپۋبليكالىق ماڭىزى بار ءۇش قالادا تۇراقتى تۇردە اۋىل شارۋاشىلىعى جارمەڭكەلەرىن ۇيىمداستىرۋ ارقىلى سورەلەردىڭ قولجەتىمدى ونىممەن تولتىرىلۋىن قامتاماسىز ەتۋدى تاپسىردى. ال ەڭ ءىرى مەگاپوليس - الماتىدا قالاعا بەكىتىلگەن اۋىلشارۋاشىلىق ايماقتارىنان ونىمدەردى ۇزدىكسىز جەتكىزۋدىڭ ارقاسىندا جۇزەگە اسۋى ءتيىس. سونداي-اق پرەمەر- ءمينيستردىڭ ورىنباسارى قىسقى جانە كوكتەمگى ماۋسىمارالىق كەزەڭدە باعانى ودان ءارى تۇراقتاندىرۋ ماقساتىندا اقپان ايىنىڭ باسىنان باستاپ جينالعان كوكونىس قورىن برونداۋدى باستاۋ مىندەتىن قويدى.
ازىق-تۇلىك ەمەس تاۋارلار باعاسىن تۇراقتاندىرۋ ءۇشىن ۆيتسە-پرەمەر ۇلتتىق ەكونوميكا مينيسترلىگىنە اتالعان يندەكستىڭ قۇرامداس بولىكتەرىنە تالداۋ جۇرگىزۋدى جانە ولاردىڭ ءوسۋ قارقىنىن تەجەۋ بويىنشا ۇسىنىستار دايىنداۋدى تاپسىردى. ينفلياتسيانى اۋىزدىقتاۋ جونىندەگى كەلەسى كەڭەس ەكى اپتادان كەيىن وتەدى دەپ جوسپارلانۋدا.
وسىعان دەيىن ۇلتتىق بانك 2025 -جىلى ينفلياتسيا تومەندەي مە، دەگەن ساۋالعان بولجامىن ۇسىنعان بولاتىن.
