ۇكىمەت مەديتسينا قىزمەتكەرلەرىن قورعاۋدى كۇشەيتۋ جونىندەگى شارالار كەشەنىن دايىندايدى
استانا. KAZINFORM - پرەمەر-مينيستر ولجاس بەكتەنوۆ پرەزيدەنت قاسىم-جومارت توقايەۆتىڭ مەديتسينا قىزمەتكەرلەرىن قورعاۋدى كۇشەيتۋ جانە دەنساۋلىق ساقتاۋ مەكەمەلەرىندەگى قاۋىپسىزدىكتى ارتتىرۋ جونىندەگى تاپسىرمالارىنىڭ ورىندالۋ بارىسى تۋرالى جيىن وتكىزدى.
بۇل تۋرالى ۇكىمەتتىڭ باسپا ءسوز قىزمەتى حابارلادى.
وعان پرەمەر-ءمينيستردىڭ ورىنباسارى ەرمەك كوشەربايەۆ، دەنساۋلىق ساقتاۋ ءمينيسترى اقمارال ءالنازاروۆا، ىشكى ىستەر ءمينيسترى ەرجان سادەنوۆ جانە ادىلەت ۆيتسە-ءمينيسترى لاۋرا مەرساليموۆا قاتىستى.
دەنساۋلىق ساقتاۋ مينيسترلىگىنىڭ مالىمەتىنشە، 2019-جىلدان بەرى قازاقستاندا دارىگەرلەرگە، فەلدشەرلەرگە، مەدبيكەلەرگە جانە باسقا دا دەنساۋلىق ساقتاۋ قىزمەتكەرلەرىنە جاسالعان شابۋىلداردىڭ 170 تەن استام فاكتىسى تىركەلگەن.
ال دەنساۋلىق ساقتاۋ ءمينيسترى حابارلاعانداي، دارىگەرلەرگە جاسالعان شابۋىلداردى قۇقىق قورعاۋ ورگاندارى قىزمەتكەرلەرىنىڭ جەكە باسىنا قاۋىپ ءتوندىرۋ ارەكەتىمەن تەڭەستىرۋ، سونداي-اق مەديكتەرگە سمارت-بەينەجەتوندار بەرۋ، اۋرۋحانالاردا كەشەندى كۇزەت جۇيەلەرىن ەنگىزۋ جانە قابىلداۋ بولىمشەلەرىندە تاۋلىك بويعى پوليتسيا بەكەتتەرىن ورنالاستىرۋدى كوزدەيتىن ءبىرقاتار زاڭنامالىق تۇزەتۋلەردى دايىنداۋ باستالعان.
ولجاس بەكتەنوۆ مەديتسينا قىزمەتكەرلەرىنىڭ قاۋىپسىزدىگىن قامتاماسىز ەتۋدىڭ ماڭىزدىلىعىنا نازار اۋداردى.
- مەملەكەت باسشىسىنىڭ تاپسىرماسىنىڭ ورىندالۋىن قامتاماسىز ەتۋ قاجەت. دارىگەرلەرگە شابۋىل جاسالعان مۇنداي وقيعالار قۇقىقتىق ادىستەرمەن قاتاڭ تۇردە توقتاتىلۋى كەرەك. وسىعان بايلانىستى دەنساۋلىق ساقتاۋ، ىشكى ىستەر، ادىلەت مينيسترلىكتەرىنە ون كۇن مەرزىم ىشىندە قىزمەتتىك مىندەتتەرىن اتقارۋ كەزىندە مەديتسينا قىزمەتكەرلەرىنە قاتىستى زورلىق-زومبىلىق جاسالعانى ءۇشىن قىلمىستىق جازا قاراستىرۋ بويىنشا زاڭنامالىق تۇزەتۋلەر ازىرلەپ، ەنگىزۋدى تاپسىرامىن، - دەدى پرەمەر-مينيستر.
ىشكى ىستەر ءمينيسترىنىڭ مالىمەتىنشە، اۋرۋحانالار مەن پەريناتالدىق ورتالىقتاردىڭ قابىلداۋ بولمەلەرىندە تاۋلىك بويعى پوليتسيا بەكەتتەرى قويىلعان. بارلىعى 115 دەنساۋلىق ساقتاۋ نىسانى قورعاۋعا الىندى. كيكىلجىڭدەرگە جەدەل دەن قويۋ ماقساتىندا مارشرۋتتىق پاترۋلدەر كورسەتىلگەن مەكەمەلەرگە جاقىن ورنالاستىرىلدى. قازىرگى ۋاقىتتا مەديتسينالىق مەكەمەلەردە قاۋىپسىزدىكتى قامتاماسىز ەتۋ بويىنشا جەكەلەگەن شارالار قابىلداندى.
بۇدان بولەك، حالىق اراسىندا پروفيلاكتيكالىق جانە ءتۇسىندىرۋ جۇمىستارىن كۇشەيتۋ تاپسىرىلدى.
مەملەكەت باسشىسى مەديتسينا قىزمەتكەرلەرىنە كۇش كورسەتەتىندەرگە قارسى زاڭدى كۇشەيتۋدى تاپسىرعانىن جازعان بولاتىنبىز.
