ۇكىمەت: «ەلىشىلىك قۇندىلىق» باعدارلاماسىنا قاتىسپاعان كاسىپورىندار مەملەكەتتىك قولداۋدان قاعىلادى
استانا. KAZINFORM - ەلىشىلىك قۇندىلىقتى دامىتۋ دەگەنىمىز - جاڭا وندىرىستەردى قۇرۋ عانا ەمەس، بۇل - جاڭا تەحنولوگيالار ترانسفەرتى، عىلىمدى دامىتۋ، جاڭا جۇمىس ورىندارى مەن جاڭا قۇزىرەتتەردى قالىپتاستىرۋ. ونىڭ ماڭىزىن ۇكىمەت باسشىسى ولجاس بەكتەنوۆ ءتۇسىندىردى.
- كەلەسى جىلى 1 -قاڭتاردان باستاپ ءتىزىلىم ناقتى وتاندىق ءوندىرۋشىنى انىقتاۋ تەتىگىنە اينالادى. ال، مەملەكەتتىك جانە كۆازيمەملەكەتتىك سەكتورلار ءونىمدى ساتىپ الۋدا وسى تىزىلىمگە ەنگەن وندىرۋشىلەرگە باسىمدىق بەرەدى. سونىمەن قاتار بارلىق ءىرى كاسىپورىندار وزدەرىنىڭ اينالاسىندا شاعىن جانە ورتا بيزنەس بەلدەۋىن قۇرا وتىرىپ، ەلىشىلىك قۇندىلىق باعدارلامالارىن ازىرلەپ، قابىلداۋى قاجەت. ەگەر كاسىپورىندار مۇنداي باعدارلامالاردى قابىلدامايتىن بولسا، ولارعا ەشقانداي مەملەكەتتىك قولداۋ كورسەتىلمەيدى، - دەدى ولجاس بەكتەنوۆ ۇكىمەت وتىرىسىندا.
پرەمەر-ءمينيستردىڭ بايانداۋىنشا، باعدارلاما وتاندىق كاسىپورىنداردان تىكەلەي ساتىپ الۋدى قامتاماسىز ەتۋگە باعىتتالعان.
- بۇل ولاردى لوكاليزاتسيالاۋ ەسەبىنەن وندىرىستەردى كەڭەيتۋگە جانە جاڭا ءوندىرىستى قۇرۋعا ىنتالاندىرادى. سونىمەن بىرگە ەل ىشىندەگى وندىرىستىك تىزبەكتەردى كەڭەيتە وتىرىپ، وتاندىق كومپانيالاردىڭ اراسىنداعى كووپەراتسيانى دامىتۋعا جاعداي جاساۋ كەرەك. كاسىپورىنداردىڭ ءوزارا ءتيىمدى ءىس- قيمىلىنىڭ ارقاسىندا عانا ەل ىشىندە تولىققاندى وندىرىستىك تسيكل قۇرۋعا بولادى. ناتيجەسىندە يمپورت پەن وندىرىستىك شىعىن كولەمى ازايىپ، وتاندىق تاۋارلاردىڭ باسەكەگە قابىلەتتىلىگى مەن ولارعا دەگەن سۇرانىس ارتادى. ەلىشىلىك قۇندىلىقتى دامىتۋ دەگەنىمىز جاڭا وندىرىستەردى قۇرۋ عانا ەمەس، بۇل جاڭا تەحنولوگيالار ترانسفەرتى، عىلىمدى دامىتۋ، جاڭا جۇمىس ورىندارى مەن جاڭا قۇزىرەتتەردى قالىپتاستىرۋ دەگەندى بىلدىرەدى. مۇنداي ءتاسىل ەلىمىزدىڭ ەكسپورتتىق الەۋەتىنە وڭ اسەرىن تيگىزىپ، ەكونوميكانى ءارتاراپتاندىرۋدى، حالىقتى جۇمىسپەن قامتۋ مەن ءال-اۋقاتىنىڭ ءوسۋىن قامتاماسىز ەتەدى، - دەپ ءتۇسىندىردى ۇكىمەت باسشىسى.
ايتا كەتەيىك، قازىر وتاندىق تاۋار وندىرۋشىلەر ءتىزىمى جاسالىپ جاتىر، جالعان وندىرۋشىلەر ول تىزىمگە ەنبەيدى.
بۇعان دەيىن ۇكىمەت باسشىسى قازىرگى جۇيە سەرتيفيكاتتى جالعان وندىرۋشىلەرگە بەرۋگە جول بەرىپ وتىرعانىن ايتىپ سىنادى.
