ۇكىمەت جەكەشەلەندىرۋدىڭ 2021-2025-جىلدارعا ارنالعان كەشەندى جوسپارىن تالقىلادى
ق ر پرەمەر-ءمينيسترى ءاليحان سمايىلوۆ ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيانىڭ كەزەكتى وتىرىسىن وتكىزدى، دەپ حابارلايدى Kazinform ۇكىمەتتىڭ رەسمي سايتىنا سىلتەمە جاساپ.
قاتىسۋشىلار جەكەشەلەندىرۋدىڭ 2021-2025-جىلدارعا ارنالعان كەشەندى جوسپارىن وزەكتەندىرۋ بارىسىن تالقىلادى. اتاپ ايتقاندا، ودان 20 دان استام كوممۋنالدىق مەنشىك ۇيىمىن الىپ تاستاۋ ۇسىنىلىپ وتىر. ولاردىڭ ىشىندە تكش نىساندارى، كەيبىر مەديتسينالىق جانە ميكروقارجى ۇيىمدارى بار. سوڭعىلارىن مەملەكەت جەڭىلدىكپەن نەسيە بەرۋ جانە كاسىپكەرلەردى وقىتۋ بويىنشا قىزمەتتەر كورسەتۋ ءۇشىن پايدالاناتىن بولادى.
سونىمەن قاتار وتىرىس بارىسىندا قر ونەركاسىبىن قولداۋ ماسەلەلەرى، ونىڭ ىشىندە وتاندىق وندىرۋشىلەر مەن ەكسپورتتاۋشىلاردى قولجەتىمدى قارجىلاندىرۋ شارالارىمەن قامتۋ تالقىلاندى. بۇدان بولەك وڭدەۋ ونەركاسىبىندەگى ءىرى كاسىپكەرلىك نىساندارىن قولداۋ ماسەلەلەرى قارالدى.
وعان قوسا وتىرىسقا قاتىسۋشىلار 2024-جىلى Qazaq Air اۋە كومپانياسىن باسەكەلەستىك ورتاعا بەرۋ شارتتارىن تالقىلادى.
