ۇكىمەت بۇگىن ەكونوميكانىڭ 6 ايداعى ناقتى ناتيجەسىن تالقىلايدى

استانا. KAZINFORM - بۇگىنگى ۇكىمەت وتىرىسىندا قاڭتار- ماۋسىم ارالىعىنداعى الەۋمەتتىك- ەكونوميكالىق دامۋ كورسەتكىشتەرى قورىتىندىلانىپ، رەسپۋبليكالىق بيۋدجەتتىڭ اتقارىلۋ بارىسى قارالادى.

- وتىرىس قورىتىندىسى بويىنشا ۇكىمەت باسشىلىعىنىڭ قاتىسۋىمەن باسپا ءسوز كونفەرەنسياسى وتەدى، - دەپ جازىلعان باسپا ءسوز- انونستا.

ۇكىمەت وتىرىسى PrimeMinister.kz سايتىندا، YouTube رەسمي ارناسىندا، Facebook الەۋمەتتىك جەلىسىندە، سونداي-اق UKIMET Telegram-كانالىندا تىكەلەي كورسەتىلەدى. باسپا ءسوز كونفەرەنتسياسى دا YouTube رەسمي ارناسىندا جانە Facebook الەۋمەتتىك جەلىسىندە ترانسلياتسيالانادى.

ايتا كەتۋ كەرەك، شىلدە باسىندا پرەمەر-مينيستر ولجاس بەكتەنوۆ مەملەكەت باسشىسى قاسىم-جومارت توقايەۆقا ەل ەكونوميكاسىن ءارتاراپتاندىرىپ، ينفراقۇرىلىمدى جاڭعىرتۋ باعىتىندا قابىلدانىپ جاتقان شارالار تۋرالى ەسەپ بەرگەن بولاتىن.

ايتۋىنشا، ءقازىر ەل اۋماعىندا جالپى ينۆەستيتسيا كولەمى 2,3 تريلليون تەڭگەدەن اساتىن ءارى شامامەن 20 مىڭ جۇمىس ورنىن قۇرۋدى كوزدەيتىن 45 ءىرى ونەركاسىپتىك جوبا ىسكە اسىرىلىپ جاتىر.

سونداي-اق ول ەگىس باسىنداعىلارعا سۋدى ۋاقتىلى جەتكىزۋ جۇمىستارى باقىلاۋعا الىنعانىن ءمالىم ەتتى. سول ءۇشىن وبلىستاردا وڭىرلىك شتابتار جۇمىس ىستەپ جاتىر.

پرەزيدەنتكە ەگىس ناۋقانىنىڭ اياقتالۋى مەن جيىن-تەرىم جۇمىستارىنا دايىندىق بارىسى باياندالدى. بيىل رەسپۋبليكا بويىنشا 23,7 ميلليون گەكتار القاپقا ەگىن ەگىلگەن. جىل باسىنان بەرى اۋىل، ورمان جانە بالىق شارۋاشىلىعىنداعى ونىمدەر مەن قىزمەتتەردىڭ جالپى كولەمى 4 پايىز وسكەن.

ۇكىمەت باسشىسى پرەزيدەنتكە ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ، سيفرلىق ترانسفورماتسيالاۋ جونىندە اقپارات ۇسىندى.

كەزدەسۋ سوڭىندا قاسىم-جومارت توقايەۆ ەكونوميكادا ينستيتۋتسيونالدىق وزگەرىستەر جاساۋعا، وڭىرلەردى دامىتۋعا جانە ينۆەستيتسيا تارتۋعا قاتىستى ءبىرقاتار تاپسىرما بەرگەن بولاتىن.

ۇلتتىق ستاتيستيكا بيۋروسىنىڭ الدىن الا دەرەكتەرى بويىنشا قاڭتار- ءساۋىر ارالىعىندا ەلدىڭ ناقتى جالپى ىشكى ءونىمى %6 وسكەن. بۇل كورسەتكىش قاڭتار- ناۋرىزداعى (%5,6) وسىمنەن جوعارى جانە وتكەن جىلدىڭ سايكەس كەزەڭىمەن سالىستىرعاندا (%3,4) ەكى ەسە جۋىق ارتىق.

ونىڭ ىشىندە تاۋار ءوندىرۋ كولەمى %7,5 عا ارتىپ، ەكونوميكانىڭ نەگىزگى قوزعاۋشى كۇشىنە اينالدى. ونەركاسىپ ءوندىرىسى %6,4 عا ءوستى، ونىڭ ىشىندە وڭدەۋ ونەركاسىبىنىڭ ءوسىمى - %7,2.

ءوندىرىسى ارتقان ونىمدەر قاتارىندا كۇنباعىس مايى، ۇن، قانت، كۇرىش، تابيعي ۋران، بەنزين، ديزەل وتىنى، تاۋارلىق بەتون، تىڭايتقىشتار، بولات، شويىن، جالپاق پروكات، جۇك ۆاگوندارى، ديزەل جانە تەمىرجول لوكوموتيۆتەرى بار.

تاۋ- كەن ونەركاسىبىنىڭ ءوسىمى %7,1 عا جەتتى (ءبىرىنشى توقساندا - %6,1)، بۇل مۇناي ءوندىرۋدىڭ (%8,8)، كومىردىڭ (%11,2) جانە مەتالل رۋدالارىنىڭ (%1,4) ۇلعايۋىمەن بايلانىستى.

ال ماۋسىم ايىنىڭ اياعىندا پارلامەنت پالاتالارىنىڭ بىرلەسكەن وتىرىسى ءوتىپ، ۇكىمەت پەن جوعارى اۋديتورلىق پالاتانىڭ 2024 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى بەكىتىلگەن ەدى.