ۇكىمەت ەڭبەك قاۋىپسىزدىگىن پىسىقتاپ، تۋريستەرگە جاعداي جاساۋ شارالارىن تالقىعا سالادى
استانا. KAZINFORM - بۇگىن ساعات 10:00-دە ۇكىمەت وتىرىسى وتەدى. وندا مينيسترلەر كابينەتىنىڭ مۇشەلەرى وندىرىستەگى قاۋىپسىزدىك ماسەلەسىن تالقىعا سالىپ، ەلىمىزگە كەلەتىن تۋريستەرگە قولايلى جاعداي جاساۋ شارالارىن قاراستىرادى.
سونىمەن ۇكىمەت وتىرىسىنىڭ كۇن تارتىبىنە مىنا ماسەلەلەر شىعارىلىپ وتىر:
وندىرىستە قاۋىپسىز ەڭبەك جاعدايلارىن قامتاماسىز ەتۋ جانە ەڭبەك سالاسىن تولىق سيفرلاندىرۋ؛
قازاقستانعا كەلەتىن تۋريستەرگە قولايلى جاعدايلار جاساۋ.
وتىرىس قورىتىندىسى بويىنشا وتەتىن باسپا ءسوز كونفەرەنتسياسىنا:
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆيكتوريا شەگاي؛
ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكتسياسى كوميتەتىنىڭ ءتوراعاسى ەربولات ءابىلحاتين قاتىسادى.
ولار ب ا ق وكىلدەرى تاراپىنان تۋىنداعان ساۋالدارعا جان-جاقتى جاۋاپ بەرەدى.
ايتا كەتەيىك، ەلىمىزدە وندىرىستىك جاراقاتتانۋ دەڭگەيىن تومەندەتۋگە باعىتتالعان جۇمىستار جوسپارلى تۇردە جۇرگىزىلىپ كەلەدى. قابىلدانعان شارالاردىڭ ناتيجەسىندە سوڭعى 5 جىلدا وندىرىستە زارداپ شەككەندەردىڭ سانى 6,3 پايىزعا، بۇرىنعىعا قاراعاندا قازا تاپقاندار سانى 2,9 پايىزعا ازايدى. جىل سايىن كاسىپورىنداردا 1400 دەن استام جازاتايىم وقيعا تىركەلەدى. ونىڭ 200 گە جۋىعى ادام شىعىنىمەن اياقتالادى. ەكونوميكا سالالارى بولىنىسىندە زارداپ شەككەندەردىڭ ەڭ كوپ سانى تاۋ-كەن مەتاللۋرگيا كەشەنىنىڭ كاسىپورىندارىندا - 15,3، قۇرىلىس سالاسىندا - 12 پايىز.
ەلىمىزدە 470 مىڭنان استام جۇمىسكەر زياندى جانە قاۋىپتى ەڭبەك جاعدايلارىندا جۇمىس ىستەيدى. 2024 -جىلى اتتەستاتتاۋ ناتيجەلەرى بويىنشا 679 مىڭ جۇمىسكەر ەڭبەك جاعدايلارى زياندى جۇمىستا ىستەگەنى ءۇشىن ءتۇرلى وتەماقى الدى. بۇل ماقساتتارعا جۇمىس بەرۋشىلەر 297,4 ميلليارد تەڭگە ءبولدى، بۇل - 2023 -جىلمەن سالىستىرعاندا 16,6 پايىزعا كوپ.
قازاقستاندا 2030 -جىلعا دەيىنگى قاۋىپسىز ەڭبەك تۇجىرىمداماسى ىسكە اسىرىلىپ جاتىر. ول ەڭبەكتى قورعاۋ جونىندەگى شارالاردى قارجىلاندىرۋدا جاڭا تاسىلدەردى قولدانۋدى، جۇمىسكەرلەردىڭ جازاتايىم وقيعالاردان مىندەتتى ساقتاندىرۋ جۇيەسىنە قاتىسۋىن جانداندىرۋدى، وقىتۋ ساپاسىن ارتتىرۋ مەن ەڭبەكتى قورعاۋ جونىندەگى ءبىلىمدى تەكسەرۋ ەسەبىنەن ەڭبەك جاعدايلارىن جاقسارتۋدى جانە وندىرىستىك جاراقاتتانۋ مەن كاسىپتىك اۋرۋلار دەڭگەيىن تومەندەتۋدى كوزدەيدى. تۇجىرىمدامانى ىسكە اسىرۋ اياسىندا كاسىپورىنداردىڭ سيفرلىق كارتاسى جانە ەڭبەك تاۋەكەلدەرىنىڭ سيفرلىق كارتاسى ىسكە قوسىلدى. بۇل ناقتى ۋاقىت رەجيمىندە ەڭبەك قاۋىپسىزدىگى مەن ەڭبەكتى قورعاۋدى قامتاماسىز ەتۋگە، سونداي-اق كاسىپورىندارداعى ەڭبەك قاتىناستارىنا بايلانىستى تاۋەكەلدەردى باقىلاۋعا جانە الدىن الۋ شارالارىن قابىلداۋعا مۇمكىندىك بەرەدى.
ال تۋريزم سالاسىنا كەلەر بولساق، 2024 -جىلدىڭ قورىتىندىسى بويىنشا ىشكى تۋريستەر سانى - 10,5 ميلليون ادام. بۇل - 2023 -جىلمەن سالىستىرعاندا 900 مىڭ ادامعا ارتىق. جالپى، تۋريزم جانە سپورت مينيسترلىگىنىڭ دەرەكتەرى بويىنشا ەلىمىزگە 15 ميلليون استام شەتەلدىك قوناق كەلدى.
مەملەكەت باسشىسىنىڭ تاپسىرماسى بويىنشا تۋريزم سالاسىندا ءىرى ينۆەستيتسيالىق جوبالار قولعا الىندى:
الماتى قالاسى مەن الماتى وبلىسىندا تاۋ كلاستەرىن دامىتۋ جۇمىستارى بەلسەندى ءجۇرىپ جاتىر؛
شىعىس قازاقستان - تاۋ شاڭعىسى مەن تابيعي تۋريزمدى دامىتۋعا قولايلى ءوڭىر؛
شۋچينسك- بۋراباي كۋرورتتىق ايماعىندا جىل بويى جۇمىس ىستەيتىن تۋريستىك نىساندار قۇرۋعا، ەكولوگيالىق جانە سپورتتىق ءتۋريزمدى دامىتۋعا مۇمكىندىك بەرەتىن اۋقىمدى جاڭعىرتۋ جۇمىستارىن جۇرگىزۋ جوسپارلانىپ وتىر؛
اقتاۋ ماڭىنداعى «جىلى جاعاجاي» اۋماعىندا بەس جۇلدىزدى قوناق ءۇي مەن تاقىرىپتىق ويىن- ساۋىق پاركىن سالۋ جوبالارى ىسكە اسىرىلدى. اتالعان وڭىردەگى كەندىرلى كۋرورتتىق ايماعىندا اۋەجاي سالىنىپ، ءتۋريزمدى دامىتۋعا تىڭ سەرپىن بەرىلەدى؛
فەرمەرلەرگە اگروتۋريزممەن اينالىسۋعا قۇقىق بەرۋ ءۇشىن ءتيىستى جۇمىستار ءجۇرىپ جاتىر؛
وتكەن جىلى ۇلى جىبەك جولىنىڭ بويىمەن وتەتىن «جىبەك جولى» تۋريستىك پويىزى ىسكە قوسىلدى؛
125 تەمىرجول ۆوكزالىن اۋقىمدى جاڭعىرتۋ جۇمىستارى باستالدى؛
الماتى، شىمكەنت جانە قىزىلوردا قالالارىندا اۋەجايلاردىڭ جاڭا تەرمينالدارى سالىندى؛
كوشى- قون راسىمدەرىن وڭايلاتۋ شارالارى قولعا الىندى. ماسەلەن شەكارا بەكەتتەرىندە ۇيىمداسقان تۋريستىك توپتاردى كەزەكسىز وتكىزۋ بويىنشا پيلوتتىق جوبا ىسكە قوسىلدى. بۇل شارا پاسپورتتىق باقىلاۋدان ءوتۋ ۋاقىتىن 5 ەسەگە قىسقارتۋعا مۇمكىندىك بەردى.
ۇكىمەت وتىرىسى PrimeMinister.kz سايتىندا، YouTube رەسمي ارناسىندا، Facebook الەۋمەتتىك جەلىسىندە، سونداي- اق UKIMET Telegram-كانالىندا تىكەلەي كورسەتىلەدى. ء باسپاسوز كونفەرەنتسياسىن YouTube رەسمي ارناسى جانە Facebook الەۋمەتتىك جەلىسى ارقىلى تىكەلەي كورۋگە بولادى.
ايتا كەتەيىك، 3-ماۋسىمدا وتكەن ۇكىمەت وتىرىسىندا وتاندىق ءوندىرىستى دامىتۋ مەن قولداۋ شارالارى تالقىلانعان ەدى. كۇن تارتىبىنە شىعارىلعان ماسەلە بويىنشا نەگىزگى باياندامانى ونەركاسىپ جانە قۇرىلىس ءمينيسترى ەرسايىن ناعاسپايەۆ جاساپ، قازاقستاندىق تاۋار وندىرۋشىلەردىڭ ءتىزىمى قايتا جاسالاتىنىن ءمالىم ەتتى.
- بيىلعى زاڭناماداعى جاڭالىقتاردىڭ ءبىرى - قازاقستاندىق تاۋار وندىرۋشىلەردىڭ ءبىرىڭعاي ءتىزىلىمىن قۇرۋ. بۇل - وندىرۋشىلەر مەن ولاردىڭ ونىمدەرى تۋرالى مالىمەتتەردى قامتيتىن مەملەكەتتىك سيفرلىق جۇيە. ءتىزىلىمدى ەنگىزۋ جيناقتالعان مالىمەتتەر نەگىزىندە «جالعان وندىرۋشىلەردى» انىقتاۋعا، اشىقتىقتى ارتتىرۋعا، جەمقورلىقتى ازايتۋعا مۇمكىندىك بەرەدى، - دەدى ول.
ءمينيستردىڭ ايتۋىنشا، بۇل تىزىلىمگە وندىرۋشىلەردى ەنگىزۋ مەحانيزمى مىناداي ءتورت كەزەڭدە جۇرگىزىلەدى:
بىرىنشىدەن، اقپاراتتىق جۇيە ارقىلى ءوتىنىم بەرىلىپ، دەرەكتەردى وڭدەۋگە رۇقسات بەرۋ ەلەكتروندىق سيفرلىق قولتاڭبا ارقىلى راستالادى؛
ەكىنشىدەن، مەملەكەتتىك دەرەكتەر بازاسىمەن سيفرلىق تەكسەرۋ ارقىلى ۇسىنىلعان مالىمەتتەردىڭ دۇرىستىعى تەكسەرىلەدى؛
ۇشىنشىدەن، تەحنولوگيالىق وپەراتسيالاردىڭ ورىندالۋى باعالانادى، قاجەت بولعان جاعدايدا وندىرىستىك الاڭعا بارىپ باعالاۋ جۇرگىزىلەدى؛
تورتىنشىدەن، تىزىلىمدەگى وتاندىق تاۋار وندىرۋشىلەرگە توقسان سايىن مونيتورينگ جۇرگىزىلىپ وتىرادى.
سونداي-اق ول بيىل «سامۇرىق- قازىنا» ەلەكتروندىق پلاتفورماسىندا 143 ميلليارد تەڭگە بولاتىن 340 كەلىسىمشارت جاسالعانىن اتاپ ءوتتى. بۇل - وتكەن جىلمەن سالىستىرعاندا 1,7 ەسە جوعارى. ءىرى كاسىپورىندار جەرگىلىكتى ونەركاسىپتەرگە ۇزاق مەرزىمدى تاپسىرىستار بەرۋ ارقىلى، ولاردىڭ تۇراقتى جۇمىس ىستەۋىنە جول اشادى. جىل باسىنان جاسالعان ۇزاق مەرزىمدى كەلىسىمشارت سومماسى 1,8 ەسە ارتىپ، 61 ميلليارد تەڭگە بولدى. مەملەكەت 8 وڭىردە قۇرىلىپ جاتقان شاعىن ونەركاسىپ الاڭدارىنا 46 ميلليارد تەڭگە ءبولىپ وتىر.
ال ەنەرگەتيكا ءمينيسترى ەرلان اقكەنجەنوۆ قازاقستان ءۇش مۇناي الپاۋىتىن تاپسىرىستاعى ەلىشىلىك قۇندىلىق ۇلەسىن ارتتىرۋعا مىندەتتەيتىندىگىن ايتتى. ناقتىراق ايتقاندا:
تاۋارلار بويىنشا قاراشىعاناق پەتروليۋم وپەرەيتينگ بويىنشا ەلىشىلىك قۇندىلىقتى 2025 -جىلعى 18 پايىزدان 2029 -جىلى 30 پايىزعا دەيىن؛
NCOC بويىنشا 2025 -جىلعى 17 پايىزدان 2029 -جىلعا قاراي 28 پايىزعا دەيىن ۇلعايتۋ كوزدەلگەن.
ءدال وسىنداي جۇمىس «تەڭىزشەۆرويل» ج ش س-مەن دە جۇرگىزىلىپ جاتىر.
قارجى ۆيتسە-ءمينيسترى داۋرەن كەڭبەيىل بيىل 5 ايدىڭ قورىتىندىسى بويىنشا شاعىن جانە ورتا كاسىپكەرلىك سۋبەكتىلەرى جانە وتاندىق تاۋار وندىرۋشىلەرمەن 5 تريلليون تەڭگەگە 845000 شارت جاسالعانىن ءمالىم ەتتى.
- بۇگىندە 4834 تاۋارلار، جۇمىس پەن قىزمەت اتاۋىن كوزدەيتىن ۇلتتىق رەجيمنەن الۋدى بەلگىلەيتىن 6 ۇكىمەت قاۋلىسى قولدانىستا. بيىل 5 ايدىڭ قورىتىندىسى بويىنشا 5 تريلليون تەڭگەگە 845000 شارت جاسالدى. ونىڭ ىشىندە شاعىن جانە ورتا كاسىپكەرلىك سۋبەكتىلەرىمەن 534000 شارت، وتاندىق تاۋار وندىرۋشىلەرمەن 96154 شارت جاسالعان. وتكەن جىلى وسى كەزەڭدە 2,4 تريلليون تەڭگەگە 660000 شارت جاسالعان ەدى، - دەدى داۋرەن كەڭبەيىل.
جيىن بارىسىندا پرەمەر-مينيستر ولجاس بەكتەنوۆ مەملەكەت باسشىسى ەكونوميكا ءوسىمىنىڭ نەگىزى رەتىندە وتاندىق ءوندىرىستى دامىتۋدىڭ ماڭىزدىلىعىنا ۇنەمى ەرەكشە ءمان بەرىپ كەلە جاتقانىن اتاپ ءوتتى. ۇكىمەت قازاقستاندىق تاۋار وندىرۋشىلەر باسەكەگە قابىلەتتى بولۋى ءۇشىن ولاردىڭ وندىرىستىك جۇكتەمەسىن ارتتىرۋعا باعىتتالعان ەلشىلىك قۇندىلىقتاردى دامىتۋ تەتىكتەرىن ىسكە قوسۋدا. قابىلدانعان شارالاردىڭ ناتيجەسىندە وتكەن جىلدان باستاپ وڭدەۋشى سەكتور ءونىم شىعارۋ كولەمى جاعىنان تاۋ-كەن سالاسىن باسىپ وزعانىن اتاپ كورسەتۋگە بولادى. وسى قارقىندى ۇدەتە ءتۇسۋ قاجەت.
- جاڭادان ءوتىنىش بەرۋشىلەر قاراپايىم ءوتىنىشتىڭ جانە اۆتوماتتى سيفرلىق تەكسەرۋ نەگىزىندە ەشقانداي بيۋروكراتياسىز قوسىلا الادى. ساراپشىلاردى شاقىرۋ مەن باسى ارتىق تەكسەرۋلەردەن ءوتۋدىڭ جانە كوپ قاعاز تولتىرۋدىڭ قاجەتى بولمايدى. بارلىعى سيفرلىق رەجيمدە، ادامنىڭ قاتىسۋىنسىز جۇرگىزىلەدى. وسىنى باسا ايتقىم كەلەدى. بۇل ساپالى باقىلاۋدى قامتاماسىز ەتىپ، مىندەتىن ادال اتقارمايتىن تاۋار وندىرۋشىلەردى انىقتاۋعا مۇمكىندىك بەرەدى. كەلەسى جىلدىڭ 1-قاڭتارىنان باستاپ ءتىزىلىم ناقتى وتاندىق ءوندىرۋشىنى انىقتاۋ تەتىگىنە اينالادى، - دەدى ۇكىمەت باسشىسى.
وتىرىستى قورىتىندىلاعان پرەمەر-مينيستر مىناداي ناقتى تاپسىرمالار جۇكتەدى:
قارجى مينيسترلىگى سيفرلىق دامۋ جانە ونەركاسىپ مينيسترلىكتەرىمەن بىرلەسىپ، 2026 -جىلدىڭ 1-قاڭتارىنان باستاپ قازاقستاندىق تاۋار وندىرۋشىلەر ءتىزىلىمىنىڭ اۆتوماتتاندىرىلعان جۇيەسىن ىسكە قوسۋدى قامتاماسىز ەتۋى ءتيىس. 1-تامىزعا دەيىن بارلىق مۇددەلى مەملەكەتتىك ورگان مەن كۆازيمەملەكەتتىك سەكتور ساتىپ الۋدى رەتتەيتىن زاڭعا تاۋەلدى اكتىلەردى سايكەستەندىرۋى قاجەت؛
ونەركاسىپ مينيسترلىگى ۇلتتىق ەكونوميكا جانە قارجى مينيسترلىكتەرىمەن بىرلەسىپ، ونەركاسىپتىك كاسىپورىندار ءۇشىن، سونىڭ ىشىندە ارنايى ەكونوميكالىق جانە يندۋستريالىق ايماقتاردا ينفراقۇرىلىم سالۋدى قارجىلاندىرۋ جونىندە شارالار قابىلداۋى كەرەك؛
ونەركاسىپ مينيسترلىگى وزىق تەحنولوگيالىق شەشىمدەردى پايدالانۋ ارقىلى يمپورت الماستىراتىن وندىرىستەردىڭ ءوسۋىن قامتاماسىز ەتۋ ءۇشىن وتاندىق كاسىپورىندار اراسىنداعى ونەركاسىپتىك كووپەراتسيانى دامىتۋ جونىندە ناقتى شارالار ازىرلەۋى ءتيىس.
اۆتور
مارلان جيەمباي
