ۇكىمەت 2024-2029 -جىلدارعا ارنالعان ەكومادەنيەتتى دامىتۋ تۇجىرىمداماسىن بەكىتتى

استانا. KAZINFORM - مەملەكەت باسشىسى قاسىم- جومارت توقايەۆتىڭ تاپسىرماسىمەن ۇكىمەت 2024-2029 -جىلدارعا ارنالعان «تازا قازاقستان» ەكولوگيالىق مادەنيەتتى دامىتۋ تۇجىرىمداماسىن بەكىتتى، دەپ حابارلايدى ۇكىمەتتىڭ باسپا ءسوز قىزمەتى.

پرەمەر- مينيستر ولجاس بەكتەنوۆ ءتيىستى قاۋلىعا قول قويدى.

«تازا قازاقستان» تۇجىرىمداماسى ەكولوگيالىق مادەنيەتتى دامىتۋدىڭ ءارتۇرلى ءادىس- ءتاسىلىن قامتيتىن كەشەندى ءادىستى قاراستىرادى. نەگىزگى باعىتتار ەكولوگيالىق ويلاۋدى قالىپتاستىرۋدى، جاۋاپتى مىنەز- قۇلىقتى دامىتۋ جانە ونى ىنتالاندىرۋ شارالارىن، ەكولوگيالىق ءبىلىم بەرۋ مەن اقپاراتتاندىرۋدى قامتيدى.

تۇجىرىمدامانى ىسكە اسىرۋ ەكولوگيا تۋرالى ازاماتتاردىڭ حاباردارلىعىن ارتتىرۋعا، ەكولوگيالىق ادەتتەردى قالىپتاستىرۋعا جانە حالىقتىڭ ەكولوگيالىق باستامالارعا قاتىسۋىن جانداندىرۋعا مۇمكىندىك بەرەدى.

نىسانالى كورسەتكىشتەرگە سايكەس، 2029 -جىلعا قاراي كوممۋنالدىق قالدىقتاردى قايتا وڭدەۋ دەڭگەيىن %25- دان %38- عا دەيىن ارتتىرۋ، سونداي- اق ەكولوگيالىق تاربيەنى نىعايتۋ ءىس- شارالارىنا تارتىلعان وقۋشىلار ۇلەسىن %15- دان %40- عا دەيىن ۇلعايتۋ جوسپارلانۋدا. سونىمەن قاتار ازاماتتاردىڭ ەكولوگيالىق ءومىر ساپاسىنا قاناعاتتانۋ دەڭگەيىن %55,8- دان %64,7- عا دەيىن ارتتىرۋ كۇتىلۋدە.

تۇجىرىمدامانى ىسكە اسىرۋ قوعامدىق ورىنداردا كوممۋنالدىق قالدىقتاردى بولەك جيناۋ ينفراقۇرىلىمىن دامىتۋدى، ەكولوگيالىق قاۋىپسىز تاجىريبەلەردى ەنگىزۋدى جانە قورشاعان ورتانى لاستاۋعا «نولدىك توزىمدىلىك» مادەنيەتىن قالىپتاستىرۋدى كوزدەيدى.

سونداي- اق قۇجاتتا تۇجىرىمدامانى ىسكە اسىرۋ جونىندەگى ءىس- قيمىل جوسپارى بەكىتىلدى.

ەسكە سالساق، بۇعان دەيىن ولجاس بەكتەنوۆ ورتالىق ازيا ەلدەرى مەن حالىقارالىق قارجى ۇيىمدارىن كۇش بىرىكتىرۋگە شاقىردى.

اۆتور
اينۇر تۋماكبايەۆا