ەكى ليترگە دەيىن رۇقسات: ە و ەلدەرىندە قول جۇگىمەن سۇيىقتىق الىپ ءوتۋ ەرەجەلەرى وزگەرەدى
استانا. KAZINFORM - ەۋروپالىق كوميسسيا قول جۇگىمەن سۇيىقتىق الىپ ءوتۋ ەرەجەلەرىن جەڭىلدەتۋ تۋرالى جاريالادى: ەندى جولاۋشىلار وزىمەن بىرگە ەكى ليترگە دەيىنگى كولەمدەگى سۇيىقتىق قۇتىلارىن الىپ وتە الادى، دەپ جازدى ءازارتادج.
ءازارتادج حابارلاعانداي، بۇل جاڭا ەرەجەلەر ە و بەكىتكەن ارنايى سكانەرلەر ورناتىلعان اۋەجايلاردا عانا كۇشىنە ەنەدى.
ەۋروكوميسسيانىڭ باسپا ءسوز حاتشىسى اننا-كايسا يتكونەن بۇل جاڭا جۇيەگە بىرتىندەپ كوشۋ جوسپارلانىپ وتىرعانىن جانە جولاۋشىلارعا اقپارات بەرۋگە اۋەجايلاردىڭ ءوزى جاۋاپتى ەكەنىن اتاپ ءوتتى.
مۇنداي جاعداي ساياحاتشىلار اراسىندا تۇسىنبەۋشىلىك تۋعىزۋى مۇمكىن، اسىرەسە ۇشىپ شىعۋ جانە كەرى قايتۋ كەزىندە ءارتۇرلى تالاپتار قولدانىلاتىن بولسا. مىسالى، ميلان قالاسىنداعى مالپەنسا اۋەجايىنىڭ 1-تەرمينالىندا ەكى ليترلىك قۇتىلارعا رۇقسات بەرىلسە، 2-تەرمينالىندا - ازىرگە جوق.
قازىرگى ۋاقىتتا تەك بريتاندىق Smiths Detection كومپانياسى شىعارعان ءبىر عانا سكانەر تۇرىنە رۇقسات بەرىلگەن. ازاماتتىق اۆياتسيا ماسەلەلەرى جونىندەگى ەۋروپالىق كونفەرەنسيا (ECAC) باسقا وندىرۋشىلەردىڭ جابدىقتارىن سىناقتان وتكىزىپ جاتىر. سەرتيفيكاتتاۋ اياقتالعاننان كەيىن، ەۋروپالىق كوميسسيا سكانەرلەر ءتىزىمىن كەڭەيتۋ مۇمكىندىگىن قاراستىرادى.
ەسكە سالا كەتەيىك، بۇعان دەيىن ەۋروپا اۋەجايلارىندا قول جۇگىندەگى سۇيىقتىققا قاتىستى شەكتەۋلەر جەڭىلدەۋى مۇمكىن ەكەنىن جازعان ەدىك.
