ەكى-ءۇش جىلدان كەيىن AI فيلمدى ءداستۇرلى كينودان اجىراتۋ قيىن بولادى - الماس جالي

بۇل تۋرالى Astana AI Film Festival تەڭ قۇرىلتايشىسى ءارى كەڭەس ءتوراعاسى الماس جالي ايتتى.

ونىڭ سوزىنشە، ازىرگە تولىقمەتراجدى ءفيلمدى تۇگەلدەي جاساندى ينتەللەكت ارقىلى جاساۋ وڭاي ەمەس.

- قازىر ءبىر جارىم ساعاتتىق فيلمدى AI كومەگىمەن جاساۋعا ارەكەت جاسالىپ ءجۇر. ناتيجەسى جامان ەمەس. دەگەنمەن كورەرمەن ونىڭ جاساندى ينتەللەكت ارقىلى جاسالعانىن ازىرگە اڭعارا الادى، - دەدى الماس جالي.

ول جاڭا مودەلدەر مەن پلاتفورمالاردىڭ وتە جىلدام دامىپ كەلە جاتقانىن اتاپ ءوتتى.

- ەگەر وسى قارقىن ساقتالسا، ەكى-ءۇش جىلدان كەيىن، بالكىم، ودان دا ەرتەرەك قاي فيلمنىڭ A AI ارقىلى، قايسىسىنىڭ ءداستۇرلى تاسىلمەن تۇسىرىلگەنىن اجىراتۋ قيىنعا سوعۋى مۇمكىن، - دەدى ول.

الماس جاليدىڭ ايتۋىنشا، جاساندى ينتەللەكت كينو ءتۇسىرۋدىڭ كوپتەگەن كەزەڭىن جەڭىلدەتەدى. ءداستۇرلى فيلمگە ۇلكەن كوماندا، اكتەرلەر، دەكوراتسيا جانە ونداعان ءتۇسىرىلىم اۋىسىمى قاجەت.

- كەيدە ءبىر فيلمدى دايىنداۋعا ءبىر جىلعا جۋىق ۋاقىت كەتەدى. كوماندادا 100-120 ادام جۇمىس ىستەيدى. اكتەرلەردىڭ جۇمىسىن ۇيلەستىرۋ، دەكوراتسيا دايىنداۋ، ءتۇسىرىلىمدى ۇيىمداستىرۋ كەرەك. ال جاساندى ينتەللەكت وسى جۇمىستىڭ ءبىر بولىگىن الدەقايدا جىلدام اتقارۋعا مۇمكىندىك بەرەدى، - دەدى ول.

الماس جالي AI ارقىلى فيلم جاساۋ ازىرگە ارزان ەمەس ەكەنىن دە ايتتى.

- قازىر گەنەراتسيا ارزان ەمەس. ءبىراق پلاتفورمالار كوبەيىپ، باسەكە كۇشەيگەن سايىن ونىڭ باعاسى تومەندەيدى دەپ ويلايمىن. ءداستۇرلى كينو وندىرىسىمەن سالىستىرعاندا AI ارقىلى فيلم جاساۋعا الدەقايدا از ۋاقىت پەن ەڭبەك جۇمسالادى، - دەدى الماس جالي.

بۇعان دەيىن Astana AI Film Festival بايقاۋىنا 125 ەلدەن 8 مىڭنان استام جۇمىس تۇسكەنىن جازعان ەدىك.