كورەيا پرەزيدەنتى سوتتا جاۋاپ بەرۋدەن باس تارتۋدا
استانا. KAZINFORM - قىزمەتىنەن ۋاقىتشا شەتتەتىلگەن وڭتۇستىك كورەيا پرەزيدەنتى يۋن سوك يەل بۇگىن جوعارى لاۋازىمدى مەملەكەتتىك شەنەۋنىكتەردىڭ قىلمىستارىن تەرگەۋ باسقارماسىنا كەلۋدەن تاعى باس تارتتى. ول جەكسەنبىدەن بەرى وسىمەن ەكىنشى رەت تەرگەۋگە كەلمەدى. ادۆوكاتتارى ونىڭ تەرگەۋشىلەرگە ايتاتىن ءسوزى جوق دەپ مالىمدەگەن.

سەۋلدىڭ باتىس وكرۋگىنىڭ سوتى 15-قاڭتاردا يۋن سوك يەلدى وزىنە قاتىستى ايعاقتاردى جويادى دەگەن قاۋىپپەن قاماۋعا العان بولاتىن.
3-جەلتوقساندا يۋن سوك يەل اسكەري جاعداي ەنگىزگەنىنەن كەيىن ارادا 47 كۇن وتكەن سوڭ، پرەزيدەنتتى قاماۋعا الۋ تۋرالى وردەر رەسمي ماقۇلداندى. سوت شەشىمى جاريالانعان سوڭ يۋننىڭ جاقتاستارى سەۋلدەگى باتىس وكرۋگتىك سوتىنىڭ عيماراتىنا شابۋىل جاسادى. پوليتسيا جاعدايدى باقىلاۋعا الدى. سەۋلدەگى باتىس وكرۋگتىك سوتىنىڭ عيماراتىندا بولعان تارتىپسىزدىكتەردەن كەيىن سوت عيماراتى مەن ىيۆان قالاسىنداعى ۋاقىتشا ۇستاۋ ورتالىعىنىڭ قاۋىپسىزدىگى كۇشەيتىلدى. پرەزيدەنت قازىرگى ۋاقىتتا ءدال وسى ورتالىقتا وتىر.
وتكەن دەمالىس كۇندەرى يۋننىڭ شامامەن بەس جۇزگە جۋىق جاقتاسى سەۋلدەگى باتىس وكرۋگتىك سوت عيماراتىنىڭ الدىندا نارازىلىق ءبىلدىرىپ، «پرەزيدەنت يۋن سوك يەل»، «تەز ارادا بوساتىڭدار» جانە «پارلامەنتتىك سايلاۋ بۇرمالاۋىن تەكسەرىڭدەر» دەپ ۇرانداتتى. ولار سونداي-اق سوت عيماراتىنا شابۋىل جاساعانداردى بوساتۋدى تالاپ ەتتى. بۇدان بولەك، يۋننىڭ جاقتاستارى كونستيتۋتسيالىق سوت عيماراتىنىڭ الدىندا دا نارازىلىق شاراسىن وتكىزدى. كونستيتۋتسيالىق سوتقا كىرمەك بولىپ، قابىرعادان سەكىرىپ وتپەك بولعان ءبىر ەر ادامدى پوليتسيا ۇستادى.
تاعى ءبىر نارازىلىق ءبىلدىرۋشى قولىندا تەمىر قۇرال ۇستاعانى ءۇشىن قاماۋعا الىندى. تارتىپسىزدىكتەردى بولدىرماۋ ءۇشىن شامامەن 1400 پوليتسەي جۇمىلدىرىلدى. وتكەن دەمالىس كۇندەرى 42 پوليتسيا قىزمەتكەرى جاراقات الدى، ولاردىڭ جەتەۋىنىڭ جاعدايى اۋىر. بۇگىن جوعارعى سوت باتىس وكرۋگتىك سوتىنا كەلتىرىلگەن شىعىن كولەمىن 600- 700 ميلليون ۆون نەمەسە 480 مىڭ ا ق ش دوللارىنان استام دەپ باعالادى.
پرەزيدەنت يۋن سوك يل ءالى دە تەرگەۋگە كەلۋدەن باس تارتىپ وتىر. بۇگىن تاڭعى ساعات 10-دا ول جوعارى لاۋازىمدى شەنەۋنىكتەردىڭ قىلمىستارىن تەرگەۋ باسقارماسىنا كەلۋى كەرەك ەدى، ءبىراق شاقىرۋدى ەلەمەدى. مەملەكەت باسشىسىنىڭ ادۆوكاتى يۋن گاپ گىن ونىڭ كەلمەۋ سەبەبىن ءتۇسىندىرىپ، يۋننىڭ باسقارماعا ايتار ەشتەڭەسى جوق ەكەنىن مالىمدەدى. تەرگەۋشىلەر يۋندى ءماجبۇرلى تۇردە جەتكىزۋ نەمەسە ونى سەۋلدەگى ۋاقىتشا ۇستاۋ ورتالىعىندا تەرگەۋ ماسەلەسىن قاراستىرۋدا.
ايتا كەتەيىك، 2013 -جىلى جوعارعى سوت قاماۋعا الىنعان كۇدىكتى تەرگەۋ بولمەسىنە كەلۋدەن باس تارتقان جاعدايدا ونى ءماجبۇرلى تۇردە جەتكىزۋگە رۇقسات بەرگەن ەدى.
بەلگىلى بولعانداي، يۋن سوك يەل تۇرمە كيىمىن كيىپ كامەرادا جالعىز وتىر. ۇستاۋ ورتالىعىنىڭ قىزمەتكەرلەرى ونى باسقا قاماۋداعىلارمەن كەزدەستىرمەۋگە تىرىسۋدا. قازىرگى كەزدە ول ۋاقىتشا مەملەكەت باسشىسى قىزمەتىنەن شەتتەتىلگەنىمەن، ونىڭ قاۋىپسىزدىگىن پرەزيدەنتتىڭ كۇزەت قىزمەتى قامتاماسىز ەتۋدە. ونىڭ تاماعى باسقا قاماۋداعىلارمەن بىردەي. مىسالى، بۇگىن وعان تاڭعى اسقا سورپا، مارينادتالعان قىزىل بۇرىش جانە كيمچي بەرىلدى. يۋنعا ادۆوكاتىنان باسقا ادامدارمەن كەزدەسۋگە تىيىم سالىنعان.
جوعارى لاۋازىمدى شەنەۋنىكتەردىڭ قىلمىستارىن تەرگەۋ باسقارماسى يۋن سوك يەلدىڭ قاماۋدا بولۋ مەرزىمى 28 -قاڭتارعا دەيىن جالعاساتىنىن، ءبىراق 7 -اقپانعا دەيىن ۇزارتىلۋى مۇمكىن ەكەنىن حابارلادى. پرەزيدەنتتىڭ جاقتاستارى بىرنەشە كۇننەن بەرى سەۋلدەگى ۋاقىتشا ۇستاۋ ورتالىعىنىڭ الدىندا نارازىلىقتارىن جالعاستىرىپ، يۋن بوساتىلعانشا سول جەردە بولۋعا نيەتتى ەكەندەرىن مالىمدەدى.
24.kz