ەكونوميكا سالاسىندا بيىلعى نوبەل سىيلىعى كىمگە بۇيىردى

استانا. KAZINFORM - ەكونوميكا سالاسىندا 2024 -جىلعى نوبەل سىيلىعى ەلدەر قالاي جانە نەلىكتەن بايىپ، داميتىنى، سونداي-اق ىلگەرىلەۋ مەن تەحنولوگيا نەگە كەيبىر جەرلەردە ۇلتتاردىڭ گۇلدەنۋىنە اكەلىپ، كەي ەلدەردە كەرىسىنشە، نەگە جوعالاتىنى تۋرالى ەڭبەكتەرىمەن تانىمال بولعان دارون اسەموگلۋ، دجەيمس روبينسون جانە سايمون دجونسونعا بەرىلدى، دەپ حابارلايدى ВСС.

«ولار قوعامدىق ينستيتۋتتاردىڭ مەملەكەتتىڭ وركەندەۋى ءۇشىن قانشالىقتى ماڭىزدى ەكەنىن كورسەتتى. قۇقىق ءتارتىبى دامىماعان، ال بيلىگى حالىقتى قانايتىن قوعام دامىمايدى، جاقسى جاققا وزگەرمەيدى. لاۋرەاتتاردىڭ زەرتتەۋلەرى ونىڭ سەبەبىن تۇسىنۋگە كومەكتەسەدى»، - دەپ اتاپ ءوتتى شۆەتسيا عىلىم اكادەمياسى.

ەكونوميكالىق سىيلىق ءداستۇرلى تۇردە قازان ايىنىڭ باسىندا وتەتىن نوبەل اپتالىعىن اياقتايدى.

ەكونوميكا - جاس عىلىم، الفرەد نوبەلدىڭ وسيەتىندە ول تۋرالى ەشتەڭە ايتىلماعان. ول 1968 -جىلى شۆەتسيانىڭ ورتالىق بانكى نوبەل قورىنىڭ 300 جىلدىعىنا وراي وعان قوماقتى قارجى اۋدارعاننان كەيىن پايدا بولدى.

سوندىقتان سىيلىق رەسمي جاعىنان نوبەل سىيلىعى ەمەس، ءبىراق ونى ءراسىم كەزىندە سول كوميتەت بەرەدى. سىيلىققا شامامەن 1 ميلليون دوللار كولەمىندەگى اقشا مەن ارنايى ازىرلەنگەن التىن مەدال كىرەدى.

جەڭىمپازدى شۆەتسيا عىلىم اكادەمياسى تاڭدايدى. ول باسقا عىلىمي پاندەر بويىنشا ۇزدىك جۇمىستاردى ماراپاتتاۋ كەزىندەگىدەي ەرەجەلەردى ساقتايدى.

اۆتور
زارينا تۋعانبايەۆا