كونستيتۋتسيادان ۇكىمەتتىڭ كەيبىر وكىلەتتىكتەرى الىنىپ تاستالادى

استانا. KAZINFORM - كونستيتۋتسيادان ۇكىمەتتىڭ كەيبىر وكىلەتتىكتەرى الىنىپ تاستالادى. بۇل تۋرالى كونستيتۋتسيالىق رەفورمالار جونىندەگى كوميسسيانىڭ ەكىنشى وتىرىسىندا ادىلەت ءمينيسترى ەرلان سارسەمبايەۆ ايتتى.

- كونستيۋتسيانىڭ 5-بولىمىندەگى ۇكىمەتتىڭ فۋنكتسيالارىن ايقىندايتىن ءتيىستى باپتا مەملەكەتتىك باعدارلامالاردى بەكىتۋگە، سونداي-اق مەملەكەتتىك كوميتەتتەرگە قاتىستى وكىلەتتىكتەردى، اتاپ ايتقاندا ولاردىڭ قىزمەتىنە باسشىلىق جاساۋ جانە اكتىلەردىڭ قولدانىلۋىن جويۋ نەمەسە توقتاتا تۇرۋ وكىلەتتىكتەرىن الىپ تاستاۋ ۇسىنىلادى، - دەدى ەرلان سارسەمبايەۆ.

ونىڭ اتاپ وتۋىنشە، مەملەكەتتىك جوسپارلاۋدىڭ جاڭا جۇيەسىنە سايكەس، مەملەكەتتىك باعدارلامالار بۇل جۇيەنىڭ قۇجاتتارى بولىپ تابىلمايدى.

- مۇنداي باعدارلامالار قاجەتتىگىنە قاراي ازىرلەنىپ، بەكىتىلەتىن بولادى. قازىرگى ۋاقىتتا اتقارۋشى بيلىك قۇرىلىمىنداعى كوميتەتتەر ورتالىق اتقارۋشى ورگاننىڭ ۆەدومستۆوسى بولىپ سانالادى. وسىعان بايلانىستى ولاردى كونستيتۋتسيادا جەكە اتاپ ءوتۋدىڭ ورىندىلىعى جوق، - دەدى مينيستر.

بۇعان دەيىن سەنات دەپۋتاتى نۇرلان بەكنازاروۆ كونستيتۋتسيالىق رەفورما جونىندەگى كوميسسيانىڭ ەكىنشى وتىرىسىندا زاڭ شىعارۋ باستاماسى بار ورگاندار سانى ارتاتىنىن ايتتى.