كوممۋنالدىق قىزمەتتەر ءۇشىن ءبىرىڭعاي تۇبىرتەك ەنگىزىلەدى
استانا. KAZINFORM — ونەركاسىپ جانە قۇرىلىس مينيسترلىگى كوممۋنالدىق قىزمەتتەر ءۇشىن ءبىرىڭعاي تۇبىرتەكتى ەنگىزەدى.

ونەركاسىپ جانە قۇرىلىس مينيسترلىگى ءوز باقىلاۋىنداعى اۋماقتاردى سيفرلاندىرۋ بويىنشا بەلسەندى جۇمىس ىستەپ جاتىر. وتكەن جىلدىڭ قاراشا ايىنان باستاپ بارلىق كوممۋنالدىق قىزمەتكە ءبىرىڭعاي تۇبىرتەك ەنگىزۋ بويىنشا بەلسەندى جۇمىس جۇرگىزىلىپ جاتىر.
بۇل تۋرالى الەۋمەتتىك جەلىدەگى پاراقشاسىندا ونەركاسىپ جانە قۇرىلىس ۆيتسە-ءمينيسترى ءجاننات ءدۇبىروۆا جازدى.
تۇبىرتەك بارلىق تولەمدى شوعىرلاندىرۋعا ارنالعان. تولەۋشىلەرگە ىڭعايلى بولۋ ءۇشىن بارلىق اقپارات ءبىر تۇبىرتەكتە جيناقتالادى.
- ءبىزدىڭ ماقساتىمىز - بۇل جۇيەنى قالالاردا عانا ەمەس، اۋدان ورتالىقتارى مەن اۋىلداردا دا قولجەتىمدى ەتۋ. ءبىر تۇبىرتەك ەكىنشى دەڭگەيلى بانكتەر ارقىلى ونلاين رەجيمدە بەرىلەدى جانە ونى وڭاي تولەۋگە بولادى. سۇرانىس بويىنشا قاعاز نۇسقاسى دا قولجەتىمدى. وبلىس اكىمدىكتەرى جۇمىسقا كىرىسىپ كەتتى، ءبىرقاتار ەلدى مەكەندە تۇرعىندار سيفرلىق تۇبىرتەك الا الادى. ءبىز ازاماتتارىمىز ءۇشىن ۇدەرىستەردى كەڭەيتۋدى جانە جەڭىلدەتۋدى جالعاستىرامىز، - دەپ اتاپ ءوتتى ءجاننات ءدۇبىروۆا.