كولىكتى ماس كۇيىندە باسقارعاندار 7 جىل بويى جۇرگىزۋشى كۋالىگىن الۋعا ەمتيحان تاپسىرۋعا جىبەرىلمەيدى
استانا. KAZINFORM - كولىكتى ماس كۇيىندە باسقارعان ادامدار جەتى جىل بويى كولىك قۇرالدارىن باسقارۋ قۇقىعىن الۋعا ەمتيحان تاپسىرۋعا جىبەرىلمەيدى.
بۇل تۋرالى سەناتتىڭ جالپى وتىرىسىندا جول قاۋىپسىزدىگىن تسيفرلاندىرۋ ماسەلەلەرى ارنالعان زاڭدى ءبىرىنشى وقىلىمدا تالقىلاۋ كەزىندە ءمالىم بولدى.
سەناتور ەۆگەني بولگەرتتىڭ ايتىنشا، اكىمشىلىك قۇقىق بۇزۋشىلىق تۋرالى كودەكستىڭ 608-بابى (جۇرگىزۋشىنىڭ كولىك قۇرالىن الكوگولدىك، ەسىرتكىلىك ماساڭ كۇيدە باسقارۋى) جانە 613-بابى (كۋالاندىرۋدان وتۋدەن جالتارۋ) بويىنشا اكىمشىلىك جاۋاپتىلىققا تارتىلعان ادامدارعا قاتىستى تيىسىنشە جەتى نەمەسە سەگىز جىل بويى كولىك قۇرالدارىن باسقارۋ قۇقىعىن الۋعا ەمتيحاندار تاپسىرۋعا جىبەرۋگە تىيىم سالۋ ەنگىزىلەدى.
ايتا كەتەيىك، كودەكستىڭ 608-بابىندا جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك نەمەسە ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ - ون بەس تاۋلىككە اكىمشىلىك قاماققا الۋعا جانە جەتى جىل مەرزىمگە كولىك قۇرالىن باسقارۋ قۇقىعىنان ايىرۋعا الىپ كەلەدى.
