كوكپاردان باستى قارسىلاسىمىز قىرعىز باۋىرلار - كوماندا كاپيتانى تۇرعانبەك قۇرمانبەك

استانا. KAZINFORM - V دۇنيەجۇزىلىك كوشپەندىلەر ويىندارىندا كوكپاردان قازاقستان قۇراماسىنىڭ باستى قارسىلاسى - قىرعىستاندىق كوكپارشىلار. بۇل تۋرالى ق ر كوكپار قۇراما كومانداسىنىڭ كاپيتانى تۇرعانبەك قۇرمانبەك ايتتى، دەپ حابارلايدى قازاقپارات ءتىلشىسى.

«بۇگىن العاشقى كەزدەسۋ وزبەكستان قۇراما كومانداسىمەن ءوتتى. اتتارىمىزدى تاكتيكالىق تۇرعىدان دايىندادىق، الاڭعا ۇيرەتتىك. جىگىتتەردىڭ دە، اتتارىمىزدىڭ دا شابىسى كەرەمەت بولدى. فينالدا ەلىمىزدىڭ كوك تۋىن جەلبىرەتۋگە دايىنبىز. باستى قارسىلاسىمىز قىرعىز باۋىرلارىمىز دەپ ويلايمىز. ءبىز بار كۇشىمىزدى سالامىز. قازاق ەلى بىزگە سەنىم ارتىپ وتىرعانىن بىلەمىز. بۇيىرسا سول سەنىمدى اقتاۋعا دايىنبىز»، - دەيدى تۇرعانبەك قۇرمانبەك.

ايتا كەتەيىك، V دۇنيەجۇزىلىك كوشپەندىلەر ويىندارىنا باق سىناۋعا كەلگەن كوكپارشىلار «قازانات» يپپودرومىندا ىرىكتەۋ جارىستارىن وتكىزىپ جاتىر. العاشقى كەزدەسۋ قازاستان جانە وزبەكستان قۇراما كومانداسىنىڭ كوكپارشىلارى اراسىندا ءوتتى. تارتىستى وتكەن سايىستا، قازاقستاندىق شاباندوزداردىڭ مەرەيى ۇستەم بولىپ، 16:0 ەسەبىمەن ايقىن جەڭىسكە جەتتى.

كوكپاردان 9 مەملەكەتتىڭ سپورتشىلارى ءوزارا مىقتىنى انىقتايدى. بۇل سپورت تۇرىنەن بارلىعى 104 سپورتشى قاتىسادى.

كوكپاردان باق سىنايتىن قۇرامالار: قازاقستان، ا ق ش، رەسەي، وزبەكستان، قىرعىزستان، ۆەنگريا، قىتاي، موڭعوليا جانە تۇركيا.