كوشى-قون ساياساتى: پرەمەر-مينيستر مينيسترلەرگە بىرنەشە مىندەت جۇكتەدى
استانا. KAZINFORM - ۇكىمەت باسشىسى ولجاس بەكتەنوۆ ەلىمىزدىڭ كوشى-قون ساياساتىن جەتىلدىرۋگە قاتىستى قۇزىرلى ورگاندارعا تاپسىرما بەردى.
- ءبىرىنشى تاپسىرما، ەڭبەك جانە حالىقتى الەۋمەتتىك مينيسترلىگى مۇددەلى مەملەكەتتىك ورگاندارمەن بىرلەسىپ، بيىل 1-قازانعا دەيىن ۇكىمەتكە قازاقستان رەسپۋبليكاسىنىڭ كوشى-قون جانە دەموگرافيالىق ساياساتى تۇجىرىمداماسىنىڭ جوباسىن ەنگىزسىن. ول ازىرلەنىپ جاتقان 2030-جىلعا دەيىنگى وڭىرلىك ساياسات تۇجىرىمداماسىنا سايكەس بولۋعا ءتيىس. ەكىنشى تاپسىرما، وڭىرلەردە قانداستار مەن ىشكى قونىس اۋدارۋشىلارعا بارلىق قاجەتتى كومەك كورسەتىپ، جاردەم بەرۋ كەرەك، - دەدى ولجاس بەكتەنوۆ ۇكىمەت وتىرىسىندا.
سونداي-اق پرەمەر-مينيستر ەڭبەك جانە حالىقتى الەۋمەتتىك قورعاۋ مينيسترلىگى مۇددەلى مەملەكەتتىك ورگاندارمەن بىرلەسىپ، قانداستار اراسىندا ەلگە كەلگەنگە دەيىن الدىن الا ساۋالناما جۇرگىزۋ قۇرالىن ەنگىزۋدى تاپسىردى.
- بۇل قانداستاردىڭ جەكە جانە كاسىبي ارتىقشىلىقتارىن باعالاۋعا مۇمكىندىك بەرەدى. ولاردى ەلىمىزدىڭ سولتۇستىك جانە شىعىس وڭىرلەرىنە تارتۋ بويىنشا اقپاراتتىق- ءتۇسىندىرۋ جۇمىسىن كۇشەيتۋ كەرەك. ءۇشىنشى تاپسىرما، ىشكى ىستەر مينيسترلىگى مەن بارلىق مۇددەلى مەملەكەتتىك ورگان كوشى-قون زاڭناماسىن بۇزعانى ءۇشىن اكىمشىلىك جاۋاپكەرشىلىك شاراسىن قاتاڭداتۋدى قامتاماسىز ەتۋگە ءتيىس. جالپى، كوشى-قون سالاسىنداعى قاۋىپسىزدىك ماسەلەسىن كۇشەيتۋ قاجەت، - دەپ تولىقتىردى ولجاس بەكتەنوۆ.
اتالعاندى تاپسىرمانى باقىلاۋ مەن ۇيلەستىرۋ ۇكىمەت باسشىسىنىڭ ورىنباسارى ەرمەك كوشەربايەۆقا جۇكتەلدى.
ايتا كەتەيىك، جىل سوڭىنا دەيىن ەلىمىزدە كوشى-قون پروتسەسىن رەتتەيتىن سيفرلىق پلاتفورما ەنگىزىلەدى.
ودان بولەك پرەمەر-مينيستر كوشى-قون ساياساتى سالاسىنا تالداۋ جاساۋ قاجەتتىگىن ايتقان ەدى.
