كوشپەندىلەر ويىنى: اسىق اتۋدان قازاقستاننىڭ نەگىزگى قارسىلاسى كىم
استانا. قازاقپارات - قازاق حالقىنىڭ ۇلتتىق ويىندارىنىڭ ءبىرى - اسىق اتۋ. استانادا وتەتىن 5-دۇنيەجۇزىلىك كوشپەندىلەر ويىندارىندا بۇل سپورت تۇرىنەن دوداعا تۇسەتىن قۇراما جاساقتالدى. قۇرامانىڭ دايىندىقتارىن ءبىلۋ ءۇشىن اسىق اتۋ سپورتىنان مەملەكەتتىك جاتتىقتىرۋشى، كوشپەندىلەردىڭ اسىق سپورتى حالىقارالىق فەدەراتسياسىنىڭ باس حاتشىسى جومارت ورازوۆپەن سۇحباتتاسقان ەدىك، دەپ حابارلايدى BAQ. KZ ءتىلشىسى.
- كوشپەندىلەر ويىنىنا دايىندىق بارىسى قالاي ءجۇرىپ جاتىر؟
اسىق اتۋ، بەس اسىق جانە وردو بويىنشا ۇلتتىق قۇراما جاساقتالىپ، اقپان ايىنان باستاپ كوشپەندىلەر ويىندارىنا دايىندىق جۇرۋدە. قازىرگى تاڭدا قۇراما شۋچينسك قالاسىندا ورنالاسقان قىسقى سپورت تۇرلەرىنەن وليمپيادالىق دايارلاۋ ورتالىعىندا جىل باسىنان بەرگى 4-شى وقۋ-جاتتىعۋ جيىندارىندا. بۇعان دەيىن الماتى قالاسىندا، تۇركىستان وبلىسىندا جانە شولپان-اتادا (قىرعىزستان) و ج ج وتكەن بولاتىن. قورىتىندى و ج ج كوشپەندىلەر ويىندارى الدىندا استانا قالاسىندا وتەدى دەپ جوسپارلانعان.
- اسىق اتۋ سپورتىنىڭ ەلىمىزدە دامۋ قارقىنى قانداي دەڭگەيدە؟
اسىق اتۋ سپورتى سوڭعى جىلدارى وتە قاتتى قارقىنمەن دامىپ جاتىر. وعان دالەل ەلىمىزدىڭ 19 رەسپۋبليكالىق ماڭىزى بار قالالارى مەن وبلىستارىندا (ش ق و-دان باسقا) فەدەراتسيا جۇمىس جاساۋى جانە كوماندالار جاساقتالۋىن ەرەكشە اتاپ وتۋگە بولادى. 2023-24 وقۋ جىلىنىڭ 2-شى توقسانى ورتا مەكتەپتەر اراسىندا «التىن ساقا» رەسپۋبليكالىق وليمپياداسى ۇيىمداستىرىلىپ، ءبىر مەزەتتە 2 ميلليوننان استام وقۋشى اسىق وينادى.
- ۇلتتىق قۇراما قالاي جاساقتالادى؟
جىل سايىن 6 جاس ەرەكشەلىگى بويىنشا (بالالار، كىشى جاسوسپىرىمدەر، جاسوسپىرىمدەر، جاستار، ەرەسەكتەر جانە ارداگەرلەر) اسىق اتۋدان قازاقستان رەسپۋبليكاسى چەمپيوناتى ءوتىپ تۇرادى. اتالعان چەمپيوناتتار قورىتىندىسى بويىنشا 1-، 2-ورىن العان سپورتشىلار ۇلتتىق قۇراما تىزىمىنە ەنەدى. سوندىقتان قۇراماعا كىرۋگە مۇمكىندىكتەر بار.
- كوشپەندىلەر ويىنىندا ەڭ نەگىزگى باسەكەلەس ەل قايسى؟
كوشپەندىلەر ويىندارىندا ءبىزدىڭ قۇراماعا ەڭ نەگىزگى باسەكەلەس قىرعىزستان رەسپۋبليكاسى قۇراماسى. سەبەبى، وردو قىرعىزدىڭ ۇلتتىق ويىنى. الەمدە وردودان قىرعىزدارعا قارسىلاس جوق. اسىق اتۋ دا قىرعىزدارعا تاڭسىق ەمەس. 2022 -جىلدىڭ اياعىندا اسىق اتۋدان وتكەن تۇڭعىش ازيا چەمپيوناتىندا ءبىزدىڭ ۇلتتىق قۇراما ولاردى قيىندىقپەن ۇتقان بولاتىن.
- سۇقبات بەرگەنىڭىزگە راحمەت!
