كوشپەندىلەر ويىندارىنا قاتىساتىن سپورتشىلار مەن جىلقىلارعا 3 اي بويى تەكسەرۋ جۇرگىزىلەدى
استانا. KAZINFORM - كۇزدە ەلوردادا وتەتىن V دۇنيەجۇزىلىك كوشپەندىلەر ويىندارى قارساڭىندا سپورتشىلار مەن سپورتتىق جىلقىلاردى ساپالى دايارلاۋ ءۇشىن ەكى كەشەندى عىلىمي توپ قۇرىلدى. ولاردىڭ ءبىرى اتبەگىلىكپەن، ەكىنشىسى ۇلتتىق سپورت تۇرلەرىنىڭ سپورتشىلارىن دايارلاۋمەن اينالىسادى.
توپتاردىڭ قۇرامىنا جەتەكشى عالىمدار، ۆەتەرينارلار، بيولوگتار، گەنەتيكتەر، سونداي-اق سپورتتىق پسيحولوگيا جانە مەديتسينا ماماندارى كىردى. عالىمدار وقۋ-جاتتىعۋ جيىندارى مەن جارىستار وتكىزىلەتىن جەرلەردە سپورتشىلار مەن سپورتتىق جىلقىلاردىڭ فۋنكتسيونالدىق جانە پسيحولوگيالىق جاي-كۇيىنە مونيتورينگ جۇرگىزەدى.
«ق ر ۇلتتىق سپورت قاۋىمداستىعىنىڭ باستاماسىمەن جانە ق ر تۋريزم جانە سپورت مينيسترلىگىنىڭ قولداۋىمەن العاش رەت كەشەندى عىلىمي توپتار قۇرىلدى. ءبىرىنشى توپ تىكەلەي سپورتشىلارمەن اينالىسادى - ولاردىڭ فۋنكسيونالدىق جاعدايى، جالپى دەنە شىنىقتىرۋ دايىندىعى تەكسەرىلەدى، پسيحودياگنوستيكا جۇرگىزىلەدى، سودان كەيىن بارىپ جالپى جاي-كۇيىنىڭ قورىتىندىسى جاسالادى. ەگەر دەنساۋلىعىندا قانداي دا ءبىر وزگەرىستەر بولسا، پسيحودياگنوستيكا جانە سپورتتىق مەديتسينا بويىنشا ەم-شارا جاسايمىز. باستى ماقسات - سپورتشىلارىمىز كۇزدە استانادا وتەتىن دۇنيەجۇزىلىك كوشپەندىلەر ويىندارىنا جوعارى دەڭگەيدە دايىندالۋى ءۇشىن ولاردىڭ دەنساۋلىعىن تەكسەرۋ»، - دەپ اتاپ ءوتتى ق ر ۇلتتىق سپورت تۇرلەرى قاۋىمداستىعىنىڭ كەشەندى عىلىمي توبىنىڭ ۇيلەستىرۋشىسى باقىتجان ەسجانوۆ.
ءوز كەزەگىندە كەشەندى عىلىمي توپتىڭ جەتەكشىسى، ا. ش. ع دوكتورى نابيدۋللا كيكەبايەۆ سپورتتىق جىلقىلاردىڭ جاعدايىن ايتا كەلە، بەلگىلى قازاقستاندىق عالىمداردىڭ تۇتاس توبى جىلقىلاردىڭ جەم-ءشوبىن جاقسارتۋعا، جانۋارلاردىڭ فۋنكسيونالدىق جاعدايىن تەكسەرۋگە مۇمكىندىك بەرەتىن زەرتتەۋلەر جۇرگىزىپ جاتقانىن اتاپ ءوتتى. ول سونداي-اق بۇل توپتىڭ جاقسى ناتيجە كورسەتۋ ءۇشىن جارىسقا قاتىساتىن جىلقىلاردىڭ دايىندىعى مەن توزىمدىلىگىن تەكسەرەتىنىن تىلگە تيەك ەتتى.
كەشەندى عىلىمي توپتار قازىر كوكپار، تەڭگە ءىلۋ، اۋدارىسپاق، جامبى اتۋ، ءداستۇرلى ساداق اتۋ سپورتشىلارىنىڭ قۇراما كوماندالارىمەن جۇمىس ىستەپ جاتىر.
«ءبىز سپورتشىلاردىڭ اعزاسىن تەكسەرىپ، جوعارى ناتيجەگە جەتۋ ءۇشىن قانداي دارۋمەندەر قابىلداۋ كەرەك، قالاي تاماقتانعانى دۇرىس ەكەنىن انىقتايمىز. سپورتشىلاردىڭ جۇرەك جانە ىشكى ورگاندارىنىڭ بيوريتىمىن تەكسەرىپ، تاماقتارىن دا سوعان ساي ۇيىمداستىرامىز»، - دەدى كەشەندى عىلىمي توپتىڭ جەتەكشىسى، پ. ع. د. ، پروفەسسور اناتولي قۇلنازاروۆ.
عىلىمي توپتار وليمپيادالىق دايارلاۋ ورتالىعىنىڭ بازاسىندا 3 اي بويى سپورتشىلار مەن جىلقىلارعا تەكسەرۋ جۇرگىزەدى.
