كوشپەندىلەر ويىندارىن تۇرىك ارنالارى ۇزدىكسىز كورسەتەدى

استانا. قازاقپارات - استانادا ءوتىپ جاتقان كوشپەندىلەر ويىندارىنان الەمدىك ءىرى اگەنتتىكتەر مەن تەلەكومپانيالار جانە راديوستانسيالار حابار تاراتىپ جاتىر.

ولاردىڭ اراسىندا CNN ،BBC ،Euronews سەكىلدى جەتەكشى اقپارات قۇرالدارى بار.

ال تۋىستاس تۇرىك جۇرتى حالىقارالىق جارىستى ساعات سايىن تىكەلەي ەفيردە كورسەتىپ جاتىر. تۇرىك سپورت سۇيەر قاۋىمى قازاق كۇرەسىنىڭ «بۇك»، «جامباس»، «جارتىلاي جەڭىس»، «تازا جەڭىس»، «ەسكەرتۋ» سەكىلدى ەرەجەلەرىن جاقسى تۇسىنەدى. انادولىداعى جۇرتتىڭ ۇلتتىق ويىندارىمىزبەن تانىسۋىنا TRT AVAZ ارناسىنىڭ ۇلەسى زور. ويتكەنى 350 ميلليونعا جۋىق كورەرمەنگە حابار تاراتاتىن تۇركى دۇنيەسىنىڭ ارناسى قازاقتىڭ ءداستۇرلى سپورتتىق جارىستارىن ۇزبەي كورسەتىپ وتىرادى.

گوكحان گۇنايدىن، سپورت كوممەنتاتورى:

- تەحنيكالىق ۇجىمىمىزبەن بىرگە استانا مەن انكارادا جاساقتالعان ستۋديادا بىرنەشە ساعاتقا جالعاسقان تىكەلەي ەفيرىمىزدى اتقاردىق. ءساتتى ءوتتى. ەكى جىلدا ءبىر ۇيىمداستىرىلاتىن ورتاق سپورتتىق جارىسىمىزعا بارشامىز وسىلاي قولداۋ كورسەتۋىمىز كەرەك. ماسەلەن، وليمپيادالاردا ساداق اتۋ بار. ءبىراق ات ۇستىندە ساداق اتۋ جوق. كۇرەس بار. ءبىراق قازاق كۇرەسى جوق. كوكپار، كوكبورى سەكىلدى. مۇنداي شارالاردى جاريالاۋ مىندەتىمىز. تۇركىلىك بورىشىمىز. بۇل مادەني ءارى سپورتتىق مۇرانى وسى كۇيى وزگەرىسسىز كەلەسى ۇرپاققا جەتكىزۋ ءۇشىن، مۇنداي شارالاردىڭ ماڭىزى زور.

ارينە، كوشپەندىلەر ويىندارى الدىندا بىرنەشە اپتا بويى سپورت تۇرلەرى بويىنشا اقپارات جينادىم. ەرەجەلەرىن قايتالاپ شىقتىم. تىكەلەي ەفيرگە دايىندىق قاتاڭ. استاناداعى سەكىلدى انكارادا دا ارنايى ستۋديا جۇمىس ىستەپ تۇر. ءداستۇرلى ويىندار تۇرىك تىلىندە جۇرگىزىلدى. ەرەكشەلىگى، كوممەنتاتور ءاربىر سپورت ءتۇرى الدىندا سپورت جايلى اقپارات بەرىپ، ونىڭ ەرەجەلەرىن ءتۇسىندىرىپ وتىردى.

ياۆۋز دەمير، TRT AVAZ ارناسىنىڭ تەحنيكالىق ديرەكتورى:

- تۇركيادان دۇنيەجۇزىلىك كوشپەندىلەر ويىندارىن تىكەلەي ەفيردە كورسەتۋ ءۇشىن ارنايى كەلدىك. قۇرامىمىزدا تەحنيكالىق توپ پەن سپورت كوممەنتاتورىمىز بار. TRT AVAZ ارناسىنىڭ اۋديتورياسى دا تۇركى الەمى. سوندىقتان كوشپەندىلەر ويىندارىنا كەلىپ، حابار تاراتۋ ءارى اقپاراتتىق قولداۋ كورسەتۋ ورتاق مىندەتىمىز. كۇندەلىكتى بىرنەشە ساعات بويى تىكەلەي ەفيرگە شىعىپ ءجۇرمىز. دەمالىس كۇندەرى قايتالاپ كورسەتەمىز. بۇدان بولەك ارنايى شىعارىلىمدارىمىز بار. جاڭالىقتار ول مىندەتتى.

«جاستاردى ادامگەرشىلىككە باۋلۋدا ءداستۇرلى ويىنداردىڭ ماڭىزى زور» ، - دەيدى تۇرىكتىڭ بەلگىلى كوممەنتاتورى. ونىڭ ايتۋىنشا، قازاقستاندا ۇيىمداستىرىلعان ءاربىر سپورتتىق دودادا كورىنىس تاپقان سالت-ءداستۇر مەن ادەت-عۇرىپتان ونى انىق بايقاۋعا بولادى.

گوكحان گۇنايدىن، سپورت كوممەنتاتورى:

- ءبىزدىڭ ماقساتىمىز - زاماناۋي ءارى داستۇرگە ساي ءومىر ءسۇرۋ. ماسەلەن، بىزدە «قۇلاعانعا جۇدىرىق» دەگەن جوق. ءداستۇرلى سپورتتىق ويىندارىمىزدا سپورتشى جاراقاتتانىپ، قۇلاپ جاتسا، ونىڭ ۇستىنە شىقپايدى، قولىنان ۇستاپ تۇرعىزادى. تۇركىنىڭ ءاربىر ارەكەتىندە ادامگەرشىلىك قۇندىلىعى جاتىر. ءبىز قازاقستان بارىسى، الەم بارىسى جانە ەۋرازيا بارىسى جارىستارىن كورسەتتىك. بالۋانداردىڭ ەكى جاقتا كيىز ۇيدەن قاسقىر تەرىسىن جامىلىپ شىعۋى، تورەشىنىڭ ناتيجەمەن كەلىسپەگەندە قامشىنى لاقتىرۋ ارقىلى قارسىلىق كورسەتۋى سەكىلدى ءبىرقاتار داستۇرلەردى زامانىمىزدا قولدانۋ كەرەمەت دۇنيە. كورەرمەندەرىمىز وسىنداي داستۇرلەردى ۇناتادى.

ەلورداداعى كوشپەندىلەر ويىندارى جايلى اقپارات تۇرىكتىڭ الدىڭعى قاتارلى TRT World, TRT Haber ارنالارى، انادولۋ اگەنتتىگى، دوعان اگەنتتىگى، حۋرريەت پەن ميلليەت سەكىلدى مەرزىمدى باسىلىمداردا كەڭ تاراپ جاتىر. بۇدان بولەك تۇرىكتىڭ بەلگىلى بلوگەرلەرى دە استاناعا ارنايى بارىپ، حالىق پەن سپورتشىلار جايلى الەۋمەتتىك جەلىدە اقپارات بەرىپ وتىر.

24.kz