كەپتەلىستەگى 105 ساعات: ىستانبۇل كولىك كەپتەلىسى بويىنشا الەمدىك رەيتينگتە كوش باستادى
استانا. KAZINFORM - وسىعان وراي قالا بيلىگى جول ءجۇرۋ اقىسىن ەنگىزۋ مۇمكىندىگىن قاراستىرىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
INRIX اناليتيكالىق كومپانياسىنىڭ 2024 -جىلعا ارنالعان مالىمەتىنشە، تۇركيانىڭ ەڭ ۇلكەن قالاسىنداعى جۇرگىزۋشىلەر كەپتەلىستە جىلىنا ورتا ەسەپپەن 105 ساعات جۇمسايدى. بۇل مەگاپوليستى انتيرەيتينگتە نيۋ- يورك پەن لوندون سياقتى قالالارعا قاراعاندا جوعارى قويىپ وتىر.
ىستانبۇل بيلىگى ماسەلەگە جاۋاپ رەتىندە كولىك قوزعالىسىن ازايتۋ جانە ەكولوگيالىق جاعدايدى جاقسارتۋ ءۇشىن جاڭا شارالار ەنگىزۋدى قاراستىرۋ ۇستىندە. نەگىزگى باستامالاردىڭ ءبىرى - كولىك قوزعالىسىنىڭ تىعىزدىعى جوعارى ايماقتاردا اقى تولەۋدى ەنگىزۋ. تار كوشەلەرىمەن جانە تىعىز كولىك قوزعالىسىمەن تانىمال ەمينونيۋ مەن كادىكەيدىڭ تاريحي جانە تۋريستەرگە قولايلى اۋداندارى بۇل شارا ءۇشىن پيلوتتىق جوبالارىنا اينالۋى مۇمكىن.
سونىمەن قاتار، شىعارىندىلاردىڭ كولەمى تومەن ايماقتاردى قۇرۋ تالقىلانىپ جاتىر. بۇل ەكولوگيالىق جوبا اۋانىڭ لاستانۋىن ازايتۋدى جانە اۋاعا شىعارىندىلارى جوعارى كولىكتەرگە قوسىمشا تولەم ەنگىزۋدى كوزدەيدى.
ەكى باستاما كولىك كەپتەلىسىن ازايتىپ قانا قويماي، قالا تۇرعىندارىنىڭ ءومىر ءسۇرۋ ساپاسىن جاقسارتادى دەپ شامالانىپ وتىر.
ايتا كەتەيىك، تۇركيادا ەڭ تومەنگى زەينەتاقى 15,75 پايىزعا ءوستى.
اۆتور
زارينا تۋعانبايەۆا
