كەرەي مەن جانىبەكتى الاش بەكبازاري تاربيەلەگەن بولۋى مۇمكىن - جاقسىلىق ءسابيتوۆ
استانا. KAZINFORM - قازاق حاندىعىنىڭ باستاۋىندا تۇرعان كەرەي مەن جانىبەكتى اكەلەرى باراق پەن بولات حاندار ولگەننەن كەيىن الاش بەكبازاري تاربيەلەگەن بولۋى مۇمكىن.
جوشى ۇلىسىن زەرتتەۋ عىلىمي ينستيتۋتىنىڭ ديرەكتورى جاقسىلىق ءسابيت التىن وردان ءداۋىرىنىڭ نۋميزماتيكاسىن زەرتتەۋ دەرەكتەرى وسىنداي بولجامعا اكەلگەنىن ايتادى.
كەشەدەن بەرى استانادا «جوشى، شاعاتاي، حايدۋ ۇلىستارى مەن موعولستاننىڭ ەتنوساياسي تاريحى» اتتى حالىقارالىق عىلىمي پراكتيكالىق كونفەرەنتسيا ءوتىپ جاتىر.
ءىس-شارانى جوشى ۇلىسىن زەرتتەۋ عىلىمي ينستيتۋتى ۇيىمداستىرعان. وسى ۇيىمنىڭ ديرەكتورى جاقسىلىق ءسابيتوۆ Kazinform تىلشىسىنە التىن وردا داۋىرىندەگى نۋميزماتيكانى زەرتتەۋدىڭ عىلىمي ماڭىزى تۋرالى پايىمىن ايتتى.
«كونفەرەنسيا كەزىندە تاۋەلسىز زەرتتەۋشى رومان ريەۆا وقىعان بايانداما قىزۋ پىكىرتالاس تۋعىزدى. بۇل عالىم بەس جىل بۇرىن سوعدى حاندارىنىڭ مونەتالارىن جارىققا شىعاردى. ول بۇعان دەيىن الاش بەكبازاريدىڭ مونەتا سارايى تۋرالى ماقالا جاريالاعان بولاتىن. بۇل ەسىمنىڭ ايگىلى الاشپەن بايلانىسى بولۋى مۇمكىن. ول جانىبەك حاننىڭ اكەسى باراقتىڭ داۋىرىندەگى مونەتالاردى باسىپ شىعارعان تۇلعا بولىپ ەسەپتەلەدى. باراق پەن بولات ولگەننەن كەيىن وسى الاش بەكبازاري كەرەي مەن جانىبەكتى تاربيەلەگەن بولۋى ابدەن مۇمكىن.
الماتىدا سوڭعى رەت تابىلعان بەسىنشى قازىنا دا تاريحي تۇرعىدان قىزىقتى. قازىر وسى مونەتالاردىڭ نەگىزىندە سىرداريادا بيلىك قۇرعان اۋلەتتەردىڭ تاريحى تۋرالى پىكىرتالاس ءجۇرىپ جاتىر»، - دەيدى تاريحشى.
عالىمنىڭ ايتۋىنشا، قازىر عىلىمي ورتاعا التىن وردا كەزىنەن قالعان 1 ميلليوننان استام مونەتا بەلگىلى.
«ونىڭ ءبىر بولىگى جەكە قولدا بولسا، ءبىر بولىگى مەملەكەتتىك مەكەمەلەر ساقتاپ وتىر. مونەتا دەگەن تاريحي ءبىلىمنىڭ تىڭ كوزى دەۋگە بولادى. جىل سايىن بۇرىن بەلگىسىز بولعان مونەتالار تابىلىپ جاتىر. وكىنىشكە قاراي، ونىڭ ءبارىن كوپشىلىك ءبىلىپ جاتقان جوق. ويتكەنى عىلىمي جاڭالىقتار اقپارات اعىنىنان شەت قالىپ جاتادى. سوڭعى تابىستار تۋرالى ايتسام، سىرداريادا 9-10-عاسىرلاردا بيلىك قۇرعان وعىز قاعاندارىنىڭ مونەتالارى تابىلدى. سول مونەتالار جاڭا ەسىمدەردى، جاڭا داتالاردى اشتى. وسى مونەتالاردىڭ ارقاسىندا وعىز مەملەكەتىنىڭ سوڭعى قاعاندارى يسلام ەسىمدى بولعانىن ءبىلىپ جاتىرمىز»، - دەيدى جاقسىلىق ءسابيتوۆ.
اۆتور
ەسىمجان ناقتىباي
