كۇن كۇرت بۇزىلىپ، الماتىنىڭ كوممۋنالدىق قىزمەتتەرى كۇشەيتىلگەن رەجيمگە كوشتى

الماتى. KAZINFORM - الماتىدا اۋا رايىنىڭ بۇزىلۋىنا بايلانىستى، كوممۋنالدىق قىزمەتتەر كۇشەيتىلگەن رەجيمگە اۋىستىرىلدى.

«قازگيدرومەت» رمك مالىمەتىنشە، 18- مامىر كۇنى ساعات 13:00-دەن باستاپ تاۋلىك سوڭىنا دەيىن نايزاعاي ويناپ، قاتتى نوسەر جاڭبىر مەن بۇرشاق جاۋادى.

جاۋىن- شاشىن مولشەرى 20 م م- گە دەيىن جەتۋى مۇمكىن. جەل باتىستان، سولتۇستىك- باتىستان 3- 8 م/س جىلدامدىقپەن سوعىپ، نايزاعاي كەزىندە ەكپىنى 18- 23 م/س دەيىن جەتەدى.

19- مامىردا دا اۋىسپالى بۇلتتى اۋا رايى ساقتالادى. تۇندە ساعات 05:00-گە دەيىن جاڭبىر جاۋۋى مۇمكىن، كۇندىز جاۋىن-شاشىنسىز. 

- قالانىڭ كوممۋنالدىق قىزمەتتەرى كۇشەيتىلگەن رەجيمگە اۋىستىرىلدى. تۇنگى ۋاقىتتا 366 ارنايى تەحنيكا 355 جول جۇمىسشىسى جۇمىلدىرىلدى. ال 18- مامىر كۇندىز سۋ باسۋدىڭ الدىن الۋ جانە جويۋ ءۇشىن 515 تەحنيكا، 27 موتوپومپا جانە 755 جۇمىسشى قالا كوشەلەرىنە شىعادى. سونىمەن قاتار، موتوپومپالارمەن جابدىقتالعان 42 جەدەل بريگادا دايىندىق رەجيمىندە جۇمىس ىستەيدى، - دەپ حابارلادى اكىمدىكتەن.

ارىق جەلىلەرى مەن جاۋىن سۋىن قابىلدايتىن جەررلەردى تازالاۋ جانە باقىلاۋ جۇمىستارى ەرەكشە باقىلاۋعا الىنادى.

قالاداعى پروبلەمالىق ۋچاسكەلەردە تاۋلىك بويى تازالاۋ جۇمىستارى جۇرگىزىلىپ جاتىر.

بۇدان بولەك، الماتى قالاسى قۇتقارۋ قىزمەتى تاراپىنان 15 تەحنيكا مەن 50 قىزمەتكەر، ال ت ج د- دان 55 تەحنيكا 245 مامان جۇمىلدىرىلدى.

وسىعان دەيىن توتەنشە جاعدايلار دەپارتامەنتى اپتاپ ىستىققا بايلانىستى الماتى تۇرعىندارىنا ۇندەۋ جاساعان بولاتىن.