كاسپيدىڭ سۋ دەڭگەيى تومەندەپ بارادى: ماڭعىستاۋدا حالىقارالىق جوبا تانىستىرىلدى
استانا. KAZINFORM - كاسپي تەڭىزى دەڭگەيىنىڭ تومەندەۋى مەن ەكوجۇيەسىنە تونگەن قاۋىپتەردى زەرتتەۋگە باعىتتالعان حالىقارالىق جوبا ماڭعىستاۋدا تانىستىرىلدى.
جوبا اياسىندا تەڭىزدىڭ سۋ تەڭگەرىمى، بيوالۋانتۇرلىلىگى مەن جاعالاۋ اۋماقتارىنىڭ تۇراقتىلىعى زەرتتەلىپ، ەكولوگيالىق باستامالارعا گرانت ءبولۋ تەتىگى قاراستىرىلعان. بۇل تۋرالى وبلىس اكىمدىگى ءمالىم ەتتى.
بۇگىن ماڭعىستاۋ وبلىسىندا كاسپي تەڭىزىنىڭ ەكولوگيالىق جاعدايى مەن ونى ساقتاۋعا باعىتتالعان حالىقارالىق ىنتىماقتاستىق ماسەلەلەرى تالقىلانعان جوعارى دەڭگەيدەگى ديالوگ ءوتتى.
ءىس-شارا بارىسىندا ب ۇ ۇ دامۋ باعدارلاماسى جاپونيا ۇكىمەتىنىڭ قارجىلاي قولداۋىمەن جۇزەگە اسىرىپ جاتقان «كاسپي تەڭىزى دەڭگەيىنىڭ تومەندەۋى جاعدايىنداعى تۇراقتىلىقتى ارتتىرۋ» جوباسى تانىستىرىلدى.
كەزدەسۋدە كاسپي تەڭىزى دەڭگەيىنىڭ تومەندەۋى، كليماتتىڭ وزگەرۋى، تەڭىز سۋىنىڭ لاستانۋى جانە بيوالۋانتۇرلىلىكتىڭ ازايۋى نەگىزگى ماسەلەلەر رەتىندە قارالدى. بۇل ۇدەرىستەر جاعالاۋ اۋماقتارىنا، ينفراقۇرىلىمعا، ءوڭىر ەكونوميكاسى مەن تۇرعىنداردىڭ ءال-اۋقاتىنا تىكەلەي اسەر ەتەدى.
جوبا اياسىندا كاسپيدىڭ سۋ تەڭگەرىمى مەن تەڭىز دەڭگەيىنىڭ وزگەرۋىن زەرتتەۋ، بيوالۋانتۇرلىلىك پەن تەڭىز ورتاسىنىڭ جاعدايىن باعالاۋ، سونداي-اق جاعالاۋ اۋماقتارىنىڭ تۇراقتىلىعىن زەردەلەۋ كوزدەلگەن. سونىمەن قاتار ەكولوگيالىق باستامالاردى قولداۋعا باعىتتالعان گرانتتىق تەتىك قاراستىرىلعان.
جيىندا عىلىمي دەرەكتەر مەن سيفرلىق تەحنولوگيالاردى قولدانۋ ماسەلەسىنە دە ەرەكشە نازار اۋدارىلدى. اتاپ ايتقاندا، كاسپي تەڭىزىنە قاتىستى دەرەكتەردى اكىمنىڭ سيفرلىق كابينەتى ارقىلى اۋماقتىق جوسپارلاۋ جۇيەسىنە ىقپالداستىرۋ مۇمكىندىكتەرى تانىستىرىلدى. بۇل ءوڭىردى دامىتۋ جانە ينۆەستيتسيالىق جوبالاردى جوسپارلاۋ كەزىندە ەكولوگيالىق تاۋەكەلدەردى ەسكەرۋگە مۇمكىندىك بەرەدى.
ماڭعىستاۋ وبلىسى اكىمىنىڭ ءبىرىنشى ورىنباسارى ەربول ىزبەرگەنوۆ كاسپيدى ساقتاۋ مەملەكەت، حالىقارالىق ۇيىمدار، عىلىمي قاۋىمداستىق جانە ازاماتتىق قوعامنىڭ بىرلەسكەن ءىس-قيمىلىن قاجەت ەتەتىنىن اتاپ ءوتتى.
- كاسپي تەڭىزى - ماڭعىستاۋدىڭ ەكونوميكالىق، الەۋمەتتىك جانە ەكولوگيالىق دامۋىنىڭ ماڭىزدى بولىگى. ونىڭ جاعدايى تۇرعىنداردىڭ تۇرمىسى مەن ءوڭىردىڭ بولاشاعىنا تىكەلەي اسەر ەتەدى. بۇگىنگى ديالوگتىڭ باستى ناتيجەسى كاسپيدىڭ ەكولوگيالىق تۇراقتىلىعىن قامتاماسىز ەتۋگە باعىتتالعان ناقتى پراكتيكالىق قادامدار بولۋى ءتيىس، - دەدى ەربول ىزبەرگەنوۆ.
ءىس-شاراعا ق ر ەكولوگيا جانە تابيعي رەسۋرستار ءمينيسترى الىبەك قۋانتىروۆ، ماڭعىستاۋ وبلىسى اكىمىنىڭ ءبىرىنشى ورىنباسارى ەربول يزبەرگەنوۆ، ب ۇ ۇ- نىڭ قازاقستانداعى تۇراقتى ۇيلەستىرۋشىسى سارانگو رادناراگچا، ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى كاتارجينا ۆاۆەرنيا، جاپونيانىڭ قازاقستانداعى توتەنشە جانە وكىلەتتى ەلشىسى ياسۋماسا يدزيما، مەملەكەتتىك ورگانداردىڭ، ديپلوماتيالىق ميسسيالاردىڭ، حالىقارالىق ۇيىمدار مەن عىلىمي قاۋىمداستىقتىڭ وكىلدەرى، ەكولوگتار، ەرىكتىلەر جانە قوعامدىق ۇيىم مۇشەلەرى قاتىستى.
جۇمىس ساراپتامالىق سەسسيالار اياسىندا جالعاسىپ، وندا جوبانى ىسكە اسىرۋدىڭ ناقتى تەتىكتەرى، ەكولوگيالىق باستامالاردى قولداۋ جانە كاسپي تەڭىزىنىڭ ەكوجۇيەسىن ساقتاۋ بويىنشا الداعى بىرلەسكەن قادامدار تالقىلانادى.
ەسكە سالا كەتەيىك، بۇعان دەيىن اقتاۋ حالىقارالىق تەڭىز ساۋدا پورتىندا كاسپي تەڭىزى دەڭگەيىنىڭ تومەندەۋىنە بايلانىستى سۋ ءتۇبىن تەرەڭدەتۋ جۇمىستارى باستالعانىن جازدىق.
