كاسپيدەگى 9 اسكەري قىزمەتشىنىڭ قازاسى: ۇكىمەتتىك كوميسسيا قۇرىلدى
استانا. KAZINFORM - ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى.
ۇكىمەتتىڭ باسپا ءسوز قىزمەتىنىڭ حابارلاۋىنشا، قازاقستان رەسپۋبليكاسى پرەمەر-ءمينيسترىنىڭ وكىمىمەن ماڭعىستاۋ وبلىسىندا اسكەري وقۋ-جاتتىعۋلار وتكىزۋ بارىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ بويىنشا ۇكىمەتتىك كوميسسيا قۇرىلدى.
- كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى، - دەلىنگەن حابارلامادا.
پرەمەر-مينيستر ولجاس بەكتەنوۆ كوميسسيا ءتوراعاسى قانات بوزىمبايەۆقا وقيعا ورنىنا شۇعىل بارىپ، اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋدى قامتاماسىز ەتۋ جانە قازا تاپقانداردىڭ وتباسىلارىنا قاجەتتى كومەك كورسەتۋ شارالارىن قابىلداۋدى تاپسىردى.
الدىن الا مالىمەت بويىنشا، تەڭىزگە 19 اسكەري قىزمەتشى كەتكەن. قازىرگى ۋاقىتتا ولاردىڭ توعىزى قازا بولعانى بەلگىلى.
ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسىپ جاتىر.
وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى دەرەۋ جىبەرىلگەن. ىزدەستىرۋ- قۇتقارۋ جۇمىستارىنا اسكەري- تەڭىز كۇشتەرىنىڭ، توتەنشە جاعدايلار مينيسترلىگىنىڭ بولىمشەلەرى، اۆياتسيا جانە باسقا دا ءتيىستى قىزمەتتەر جۇمىلدىرىلدى.
وقيعانىڭ بارلىق ءمان-جايىن انىقتاپ، ىزدەستىرۋ-قۇتقارۋ جۇمىستارىن ۇيلەستىرۋ ءۇشىن قورعانىس مينيسترلىگىنىڭ كوميسسياسى وقيعا ورنىنا شۇعىل اتتاندى. كوميسسياعا قورعانىس ءمينيسترى، اۆياتسيا گەنەرال-لەيتەنانتى داۋرەن قوسانوۆ باسشىلىق ەتەدى.
قورعانىس مينيسترلىگى قازا بولعان اسكەري قىزمەتشىلەردىڭ تۋعان-تۋىستارى مەن جاقىندارىنا كوڭىل ايتىپ، ولاردىڭ وتباسىلارىنا قاجەتتى كومەك پەن قولداۋ كورسەتىلەتىنىن مالىمدەدى.
اقتاۋ گارنيزونىندا وقۋ-جاتتىعۋ بارىسىندا اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەۋ باستالدى.
باس پروكۋراتۋرانىڭ مالىمەتىنشە، جەدەل-تەرگەۋ توبى قۇرىلىپ، وقيعا ورنىندا ىشكى ىستەر مينيسترلىگىنىڭ، توتەنشە جاعدايلار مينيسترلىگىنىڭ جانە پروكۋراتۋرا ورگاندارىنىڭ قىزمەتكەرلەرى جۇمىس ىستەپ جاتىر.
