كاسىپكەرلەرگە تەگىن قۇقىقتىق كومەك كورسەتىلدى
الماتى. KAZINFORM - «بيزنەسكە جول» جانە «سىبايلاس جەمقورلىققا قارسى ۆولونتەرلىك» جوبالارى شەڭبەرىندە الماتىداعى ساۋدا ويىن-ساۋىق ورتالىقتارىنىڭ بىرىندە كاسىپكەرلەرگە تەگىن قۇقىقتىق كومەك كورسەتىلدى.
الماتى قالاسى بويىنشا سىبايلاس جەمقورلىققا قارسى قىزمەتىنىڭ ۇيىمداستىرۋمەن مەگاپوليستىڭ «Atakent mall» ساۋدا ويىن-ساۋىق ورتالىعىندا كاسىپكەرلەرگە تەگىن قۇقىقتىق كومەك كورسەتۋ بويىنشا اكسيا ءوتتى. اكسيانىڭ نەگىزگى ماقساتى - اكىمشىلىك كەدەرگىلەر، پروتسەستەردىڭ اشىق بولماۋى، ارتىق تالاپتار قويۋ سىندى قيىندىقتارعا تاپ بولعان كاسىپكەرلەردىڭ پروبلەمالىق ماسەلەلەرىن شەشۋ. زاڭ كونسۋلتاتسياسىن سىبايلاس جەمقورلىققا قارسى موبيلدى توپ وكىلدەرى، زاڭگەرلەر مەن ەرىكتىلەر كورسەتتى.
«اكسيا اياسىندا قالانىڭ كاسىپكەرلەرى مەملەكەتتىك ورگانداردىڭ باسشىلارىنان جانە ۆولونتەر رەتىندە قىزمەت ەتكەن بىلىكتى زاڭگەرلەردەن تۇراتىن سىبايلاس جەمقورلىققا قارسى موبيلدى توپتان قۇقىقتىق كەڭەس الدى. كاسىپكەرلەرگە ىڭعايلى بولۋى ءۇشىن ءىس-شارانى وتكىزۋ ورنى رەتىندە 340 تان استام بيزنەس سۋبەكتىسى ورنالاسقان «Atakent mall» ساۋدا ويىن-ساۋىق ورتالىعى تاڭدالدى. ماسەلەلەردىڭ كوپشىلىگى سالىق سالۋ، كەدەن سۇراقتارى، جەر قاتىناستارى جانە قۇرىلىس سالالارى بويىنشا كوتەرىلدى»، - دەدى الماتى قالاسىنىڭ سىبايلاس جەمقورلىققا قارسى قىزمەتىنىڭ پريەۆەنتسيا باسقارما باسشىسىنىڭ ورىنباسارى ارىستان اسقار.
