كاسپي تەڭىزىن، بالقاش كولىن ساقتاپ قالۋ ءۇشىن ناقتى شارالار قابىلداۋ قاجەت - توقايەۆ

استانا. KAZINFORM - مەملەكەت باسشىسى قاسىم-جومارت توقايەۆ اقوردادا سۋ شارۋاشىلىعى قىزمەتكەرلەرىن مەملەكەتتىك ناگرادالارمەن ماراپاتتاۋ راسىمىندە كاسپي تەڭىزىن، بالقاش كولىن، باسقا دا سۋ كوزدەرىن ساقتاپ قالۋ ماسەلەلەرىنە توقتالدى.

- سۋ، ەكونوميكاعا، ەكولوگياعا، حالىقتىڭ دەنساۋلىعىنا، جالپى بارلىق سالاعا ەرەكشە ىقپال ەتەدى. سوندىقتان سۋدىڭ تازا ءارى قولجەتىمدى بولۋى وتە ماڭىزدى. ەلىمىزدە كىشى ارالدى قۇتقارۋ ءۇشىن جىلدار بويى اۋقىمدى جۇمىس ساتقارىلىپ كەلەدى. سونىڭ ارقاسىندا قاشقان تەڭىز قايتا ورالىپ، ايدىنى سۋعا تولىپ جاتىر. كاسپيي تەڭىزىن، بالقاش كولىن، باسقا دا سۋ كوزدەرىن ساقتاپ قالۋ ءۇشىن ناقتى شارالار قابىلداۋ قاجەت. سۋ دۇرىس پايدالانا بىلسەڭ قۇت، ىسىراپ ەتسەڭ جۇت. بىلتىر قازاقستاننىڭ بىرنەشە ايماعى قارعىن سۋدان قاتتى زارداپ شەكتى. مۇنداي جويقىن تابيعي اپات ەلىمىزدە بۇرىن-سوڭدى بولماعان. كۇردەلى كەزەڭدە سىزدەر قايسارلىق پەن كاسىبيلىكتىڭ وزىق ۇلگىسىن كورسەتتىڭىزدەر. ءار قىزمەتكەر كۇنى- ءتۇنى ەڭبەك ەتىپ، اپات سالدارىن جويۋعا بەلسەنە اتسالىستى. منە بارشاڭىزعا شىنايى ريزاشىلىعىمدى بىلدىرەمىن، - دەدى پرەزيدەنت.

قاسىم-جومارت توقايەۆ بيىل ەلىمىزدە جۇمىسشى ماماندىقتار جىلى دەپ جاريالانعانىن، مەملەكەت ەڭبەك ادامدارىن ءاردايىم قولدايتىنىن باسا ايتتى.

- بىلتىر قازاقستاننىڭ سۋ شارۋاشىلىعى سالاسىنىڭ ەڭبەك سىڭىرگەن قايراتكەرى قۇرمەتتى اتاعى بەكىتىلدى. بۇگىن وسى اتاق ءبىرقاتار ارداگەرگە بەرىلەدى. ەڭبەك ادامىنىڭ ورنى ءاردايىم توردە بولۋعا ءتيىس. وزدەرىڭىز سياقتى كاسىبىنە ادال، ەڭبەكقور ازاماتتار جوعارى ماراپاتقا لايىق. سوندىقتان مەن قازاقستاننىڭ سۋ شارۋاشىلىعىن دامىتۋعا ەلەۋلى قوسقان ءبىر توپ ازاماتتى مەملەكەتتىك ناگرادامەن ماراپاتتاۋ تۋرالى جارلىققا قول قويدىم. بۇل - حالىقتىڭ سىزدەرگە دەگەن قۇرمەت- قوشەمەتى جانە شىنايى العىسى، - دەدى مەملەكەت باسشىسى.

ايتا كەتەيىك، بۇگىندە سۋ سالاسى قىزمەتكەرلەرىنىڭ جالاقىسىن ارتتىرۋ بويىنشا تۇراقتى نەگىزدە جۇمىس جۇرگىزىلىپ كەلەدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.