كاسپيدە قازا تاپقان اسكەريلەر: ەكى باپ بويىنشا قىلمىستىق ءىس قوزعالىپ جاتىر

24-قىركۇيەك كۇنى ساعات 22:30 دا پرەمەر- ءمينيستردىڭ ورىنباسارى قانات بوزىمبايەۆتىڭ توراعالىعىمەن اسكەري قىزمەتشىلەردىڭ قازا بولۋىنا بايلانىستى قۇرىلعان ۇكىمەتتىك كوميسسيانىڭ وتىرىسى ءوتتى.

ىشكى ىستەر ءمينيسترىنىڭ ورىنباسارى سانجار ءادىلوۆتىڭ بايانداۋىنشا، قىلمىستىق كودەكستىڭ 453-بابىنىڭ 2-بولىگى - «اۋىر زارداپتارعا اكەپ سوققان قىزمەتكە سالعىرت قاراۋ» جانە 465-بابى - «كەمە جۇرگىزۋ قاعيدالارىن بۇزۋ» بويىنشا قىلمىستىق ءىس قوزعالدى.

تەرگەۋ اياسىندا ۆەدومستۆوارالىق جەدەل-تەرگەۋ توبى قۇرىلدى. قازىر ءبىرقاتار تەرگەۋ جانە جەدەل-ىزدەستىرۋ ءىس-شاراسى جۇرگىزىلىپ جاتىر. جۇمىسقا ءتيىستى ماماندار تارتىلىپ، قاجەتتى سوت ساراپتامالارى تاعايىندالدى.

قانات بوزىمبايەۆ بولعان وقيعانىڭ بارلىق ءمان-جايىن قىسقا مەرزىمدە تولىق انىقتاپ، قايعىلى جاعدايعا كىنالى تۇلعالارعا قاتىستى ءتيىستى شارالار قابىلداۋدى تاپسىردى.

وتىرىستا قازا بولعان اسكەري قىزمەتشىلەردىڭ وتباسىلارىنا كومەك كورسەتۋ ماسەلەسىنە ەرەكشە نازار اۋدارىلدى. پرەمەر-ءمينيستردىڭ ورىنباسارى مەملەكەت تاراپىنان ولارعا قاجەتتى الەۋمەتتىك جانە ماتەريالدىق قولداۋ كورسەتىلەتىنىن اتاپ ءوتتى.

- زاڭدا كوزدەلگەن ماتەريالدىق كومەكتەن بولەك، كومەك كورسەتكىسى كەلەتىن ازاماتتاردان كوپتەگەن ءوتىنىش ءتۇسىپ جاتىر. قازاقستان حالىق كەڭەسىنىڭ مۇشەلەرى قازا بولعان اسكەري قىزمەتشىلەردىڭ وتباسىلارىنا ماتەريالدىق كومەك كورسەتەتىندەرىن مالىمدەدى. ولاردىڭ بىرەۋى قازا بولعان ءار اسكەري قىزمەتشىنىڭ وتباسىنا 25 ميلليون تەڭگەدەن ءبولدى. سونداي-اق ءبىرقاتار ءىرى بيزنەس وكىلدەرى دە ماتەريالدىق كومەك كورسەتۋگە نيەت ءبىلدىردى،-دەدى قانات بوزىمبايەۆ.

ول ەڭبەك جانە حالىقتى الەۋمەتتىك قورعاۋ مينيسترلىگىنە ماڭعىستاۋ وبلىسىنىڭ اكىمدىگىمەن بىرلەسىپ، قازا بولعان اسكەري قىزمەتشىلەردىڭ وتباسىلارىنا باعىتتالعان بارلىق قاراجاتتىڭ ءبولىنۋىنىڭ اشىقتىعى مەن باقىلاۋىن قامتاماسىز ەتۋدى تاپسىردى. كومەك ناقتى ادرەساتتارعا تولىق كولەمدە كورسەتىلۋگە ءتيىس.

دەنساۋلىق ساقتاۋ ۆيتسە-ءمينيسترى ماناس رامازانوۆتىڭ مالىمەتىنشە، وقيعادان كەيىن مەديتسينالىق مەكەمەگە جەتكىزىلگەن اسكەري قىزمەتشىنىڭ جاعدايى تۇراقتى. ونىڭ ومىرىنە قاۋىپ ءتونىپ تۇرعان جوق، قاجەتتى مەديتسينالىق كومەك كورسەتىلىپ جاتىر.

وتىرىسقا ىشكى ىستەر، توتەنشە جاعدايلار، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، كولىك مينيسترلىكتەرىنىڭ ۆيتسە-مينيسترلەرى، ۇ ق ك شەكارا قىزمەتى ديرەكتورىنىڭ ورىنباسارى، باس اسكەري پروكۋرور جانە ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ، بايانداما جاسادى.

ۇكىمەتتىك كوميسسيانىڭ جۇمىسى جالعاسىپ جاتىر.