كاسپي اۋماعى ەلدەرى اراسىندا عىلىمي زەرتتەۋلەر بويىنشا كەلىسىم دايىندالىپ جاتىر
بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۆيتسە-مينيسترلەر مەن ءبىرقاتار دەپارتامەنت ديرەكتورلارىنىڭ قاتىسۋىمەن كاسپي تەڭىزىن ساقتاۋ ماسەلەلەرى بويىنشا وتكەن اپپارات كەڭەسى بارىسىنان ءمالىم بولدى، دەپ حابارلايدى Kazinform.
ق ر سۋ رەسۋرستارى جانە يرريگاتسيا مينيسترلىگى باسپا ءسوز قىزمەتىنىڭ حابارلاۋىنشا، جيىنعا قاتىسۋشىلار كاسپيدىڭ سۋ دەڭگەيىنىڭ تومەندەۋ ماسەلەسى جانە بۇل باعىتتا جۇرگىزىلىپ جاتقان جۇمىستاردى تالقىلادى.
ۆيتسە-مينيستر بولات بەكنياز سۋ دەڭگەيىنىڭ ەڭ تومەنگى كورسەتكىشى 1970-جىلداردىڭ ورتاسىندا تىركەلگەنىن، ال تومەندەۋ كوبىنەسە تسيكلدىك سيپاتتا بولاتىنىن ايتتى.
ۆيتسە-مينيستر كاسپي تەڭىزىنىڭ عىلىمي-زەرتتەۋ ينستيتۋتىن قۇرۋ بارىسى تۋرالى دا ايتىپ بەردى. ينستيتۋت سۋ دەڭگەيىنىڭ مونيتورينگى جانە كاسپي ەكوجۇيەسىن زەرتتەۋمەن اينالىساتىن، سونداي-اق كاسپي جاعالاۋىنداعى وزگە مەملەكەتتەرىمەن ءوزارا تىعىز ءىس-قيمىلدى قامتاماسىز ەتەتىن بولادى.
حالىقارالىق ىنتىماقتاستىق كاسپي تەڭىزىنىڭ ورتاسىن قورعاۋ جونىندەگى نەگىزدەمەلىك كونۆەنتسياعا سايكەس وتەتىن بولادى. سونداي-اق، بارلىق كاسپي اۋماعى ەلدەرى اراسىندا عىلىمي زەرتتەۋلەر بويىنشا كەلىسىم دايىندالىپ جاتىر.
قازىرگى ۋاقىتتا ينستيتۋت قۇرۋ تۋرالى قاۋلى جوباسى دايىندالىپ جاتىر، سونداي-اق رەسپۋبليكالىق بيۋجەتتىك كوميسسياسىنىڭ قاراۋىنا شىعارىلاتىن قارجى-ەكونوميكالىق نەگىزدەمە ازىرلەنۋدە. مينيستر ءوز كەزەگىندە بارلىق قاجەتتى قۇجاتتاردى دايىنداۋدى جەدەلدەتۋدى تاپسىردى.
ۆيتسە-مينيستر نۇرلان الدامجاروۆ مينيسترلىك جانىنان كاسپي تەڭىزى جانە جاعالاۋىنداعى بارلىق مەملەكەتتەرمەن ءوزارا ءىس-قيمىل ماسەلەلەرىمەن اينالىساتىن سۋ ىنتىماقتاستىعى باسقارماسى اشىلاتىنىن حابارلادى. ال، ترانسشەكارالىق وزەندەر دەپارتامەنتى كاسپيدىڭ نەگىزگى سالاسى بولىپ تابىلاتىن ەدىل وزەنى بويىنشا بەلسەندى جۇمىس جۇرگىزەتىن بولادى.
«ماسەلە كۇردەلى، سوندىقتان قۇرىلىپ جاتقان عىلىمي-زەرتتەۋ ينستيتۋتىنان قازاقستان ءۇشىن عانا ەمەس، كاسپي جاعالاۋىنداعى باسقا مەملەكەتتەر ءۇشىن دە وزەكتى ماسەلەلەردى زەرتتەۋ بويىنشا كەشەندى جۇمىس تالاپ ەتىلەدى. جاڭادان قۇرىلعان حالىقارالىق ىنتىماقتاستىق، سۋ ساياساتى جانە عىلىم مەن يننوۆاتسيا دەپارتامەنتتەرى جيناقتالعان ماسەلەلەردى شەشۋ جولدارىن تابۋ ءۇشىن ءبىر-بىرىمەن تىعىز جۇمىس ىستەۋى كەرەك. ءبىز شەكارالاس مەملەكەتتەردەگى ارىپتەستەرىمىزبەن بىرگە جۇمىس ىستەيتىن بولامىز»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
