كارىم ءماسىموۆتىڭ استاناداعى ءزاۋلىم سارايى وقۋ-اعارتۋ مينيسترلىگىنە بەرىلدى
استانا. KAZINFORM - ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە تيەسىلى ەلورداداعى ءزاۋلىم ءۇي وقۋ- اعارتۋ مينيسترلىگىنىڭ پايدالانۋىنا بەرىلدى.
بۇل اقپاراتتى Kazinform تىلشىسىنە قايتارىلعان اكتيۆتەردى باسقارۋ كومپانياسىنىڭ باسپا ءسوز قىزمەتى راستادى.
- قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ بۇيرىعىنا سايكەس، اتالعان تۇرعىن ءۇي رەسمي تۇردە وقۋ- اعارتۋ مينيسترلىگىنىڭ «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي- پراكتيكالىق ورتالىعى مەملەكەتتىك مەكەمەسىنىڭ قاراماعىنا بەكىتىلدى، - دەگەن حابار الدىق قايتارىلعان اكتيۆتەردى باسقارۋ كومپانياسىنان.
وقۋ-اعارتۋ مينيسترلىگىنىڭ حابارلاۋىنشا، ەرەكشە قاجەتتىلىگى بار بالالارعا ءبىلىم بەرۋ بويىنشا سۇرانىستىڭ ارتۋىنا بايلانىستى ارنايى جانە ينكليۋزيۆتى ءبىلىم بەرۋ ۇيىمدارىنىڭ جەلىسىن كەڭەيتۋ تۋرالى شەشىم قابىلدانعان.
- نەگىزگى ورتالىق الماتى قالاسىندا ورنالاسقان «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي- پراكتيكالىق ورتالىعىندا» شوعىرلانادى، ال باسقا وڭىرلەردە، سونىڭ ىشىندە استانادا دا فيليالى اشىلادى. مۇنداي ءتاسىل ءبىرىڭعاي عىلىمي- ادىستەمەلىك بازانى قامتاماسىز ەتەدى، ماماندارعا، اتا- انا مەن بالالارعا قولايلى جاعداي جاسايدى، سونداي-اق ارنايى ءبىلىم بەرۋ ۇيىمدارىنىڭ جۇمىسىن ءتيىمدى ەتۋگە مۇمكىندىك بەرەدى، - دەيدى مينيسترلىكتىڭ رەسمي وكىلى مەرەكە امانگەلدى قىزى.
ايتا كەتسەك، بيىل 10- اقپاندا كارىم ءماسىموۆتىڭ استاناداعى ءزاۋلىم سارايى 1,8 ميلليارد تەڭگەگە ساتىلىمعا شىعارىلعان ەدى.
الايدا 25- اقپاندا وتكەن اۋكسيوندا كارىم ءماسىموۆتىڭ ءزاۋلىم سارايىن ەشكىم ساتىپ المادى.
ناۋرىز ايىندا كارىم ءماسىموۆتىڭ ءزاۋلىم سارايى قايتا ساتىلىمعا قويىلدى.
ەسكە سالا كەتەيىك، ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆ 2022 -جىلى 8 -قاڭتاردا ۇستالدى.
ۇلتتىق قاۋىپسىزدىك كوميتەتى تاراتقان مالىمەت بويىنشا، ءماسىموۆتىڭ پرەمەر-مينيستر لاۋازىمىندا بولۋى كەزەڭىندە بيزنەس- قۇرىلىمنىڭ بىرىنەن استانادا قۇنى 2,5 ميلليارد تەڭگە ەليتالىق تۇرعىن ءۇي مەن جەر تەلىمىن الۋ فاكتىسى بويىنشا تەرگەۋ جۇرگىزىلدى.
