كابيرحان كوشپەندىلەر ويىنىندا ونەر كورسەتۋى مۇمكىن

استانا. KAZINFORM - ۇلتتىق جانە ات سپورتى تۇرلەرى ورتالىعىنىڭ قوعاممەن بايلانىس ءبولىمىنىڭ باسشىسى قايىرحان ماۋلەن دۇنيەجۇزىلىك كوشپەندىلەر ويىنىندا قانداي تانىمال سايگۇلىكتەر كەلەتىنىن ايتىپ بەردى.

«ۇلتتىق قۇرامادا تەك كوكپار بويىنشا 30 عا جۋىق ات ازىرلەنىپ جاتىر. ونىڭ ىشىندە 24 ى ەرتەڭ كەلەدى. سول 24 اتتىڭ بارلىعىنىڭ دا اتاقتارى بار، بۇگىنگى كۇنگە دەيىن جەڭىستەرگە جەتكەن. الەم چەمپيوناتىندا جەڭگەن نۇرعاسقا سايگۇلىگى بار، ونىمەن قۇرمانبەك تۇرعانبەك اتتى ۇكىلەگەن ءۇمىتىمىز ونەر كورسەتەدى. ودان بولەك، جۇمىرتۇياق، سەكرەت اتتى تالاي بايگەدە توپ جارعان اتتار كەلۋى ىقتيمال. ءتىپتى دۋبايداعى بايگەدە جەڭىسكە جەتكەن كابيرحاندى بىلەسىزدەر، كابيرحان كەلەدى دەپ جوسپارلانعان»، - دەدى ق. ماۋلەن «قازانات» يپپودرومىندا وتكەن باسپا ءسوز ءماسليحاتىندا.

ءبىراق سپيكەردىڭ ايتۋىنشا، ءالى دە اۋا رايى مەن ترانسپورتقا بايلانىستى وزگەرىستەر بولۋى مۇمكىن.

«ولار جەكە ادامداردىڭ اتتارى بولعاندىقتان مەملەكەتتىڭ، ۇلتتىق قۇرامانىڭ قۇزىرىنداعى ءىس ەمەس. سوندىقتان وسىنداي نيۋانستار بار. ءبىراق ەلىمىزدىڭ اتىنان قاتىساتىن سايگۇلىكتەردىڭ ءبارى وتە جاقسى تاڭدالعان جانە دايىندالعان»، - دەدى ول.

ەسكە سالا كەتەيىك، جىل باسىندا قازاقستاندىق سايگۇلىك كابيرحان دۋبايدا وتكەن جارىستا توپ جارعان ەدى. تالاي شەتەلدىكتى تاڭداي قاقتىرعان تۇلپار قازاقستاننىڭ اتىن الەمگە تانىتتى.

5- دۇنيەجۇزىلىك كوشپەندىلەر ويىندارى استانا قالاسىندا 8-13- قىركۇيەك ارالىعىندا وتەدى. الەمدىك دوداعا 89 ەلدەن 2800 گە جۋىق قاتىسۋشى كەلەدى دەپ جوسپارلانىپ وتىر. وندا سپورتتىڭ 21 ءتۇرى بويىنشا 97 مەدال جيىنتىعى ساراپقا سالىنباق.

ۇيىمداستىرۋ ديرەكسياسى شەتەل سپورتشىلارىنا ات ۇلەستىرەدى. تەك كورشى رەسەي، وزبەكستان جانە قىرعىزستان سپورتشىلارى عانا ءوز اتتارىمەن كەلەدى.

اۆتور

ايجان سەرىكجان قىزى