جەزقازعاندا 600 ميلليون تەڭگەگە سالىنعان تۇرعىن ۇيگە ءالى ەشكىم قونىستانباعان
استانا. KAZINFORM - جوعارى اۋديتورلىق پالاتا ءتوراعاسى ءاليحان سمايىلوۆ ءماجىلىستىڭ جالپى وتىرىسىندا وڭىرلەرگە بولىنگەن 5 تريلليون تەڭگە سۋبۆەنسيانىڭ ءتيىمسىز يگەرىلىپ جاتقانىن ايتتى.
«اكىمدىكتەرگە وڭىردەگى مىندەتتەرىن شەشۋ ءۇشىن دەربەستىك بەرىلدى. دەگەنمەن جەكەلەگەن جاعدايلاردا قاراجاتتىڭ ورتالىق دەڭگەيدە جوعارى يگەرىلۋى وڭىرلەردە تومەن ناتيجە كورسەتىپ وتىر. وڭىرلەرگە بەرىلەتىن سۋبۆەنتسيالار شامامەن 5 تريلليون تەڭگە بولىپ وتىر. ولار سوڭعى 3 جىلدا ەكى ەسەدەن ارتىق وسكەن. ورىندالۋى %98 دان جوعارى بولىپ وتىرعان نىسانالى ترانسفەرتتەر دە شامامەن تاعى 2 تريلليون تەڭگە بولدى. ال ءىس جۇزىندە قالاي؟ ءىس جۇزىندە بيۋدجەتتىك ءتارتىپ تومەن دەڭگەيدە»، - دەدى پالاتا باسشىسى.
جوعارى اۋديتورلىق پالاتا اباي، جەتىسۋ، ۇلىتاۋ جانە الماتى وبلىستارىندا اۋديت جۇرگىزىپ، بيۋدجەتتەن قارجىلاندىرىلاتىن ينۆەستيتسيالىق جوبالاردىڭ %27 ىندا قۇرىلىستىڭ نورماتيۆتىك مەرزىمى ساقتالماعانى انىقتاعان. ءتىپتى كەيبىر جوبالاردىڭ ىسكە اسىرىلۋى 10 جىلعا دەيىن سوزىلىپ كەتكەن. ۋاقىتىندا اياقتالماعان جوبالاردىڭ %60 دان اسا قىمباتتاعان.
«وسى ءتورت وڭىردە ورىندالماعان جۇمىستارعا 3,4 ميلليارد تەڭگە تولەم جاسالعان. سونداي- اق وڭىرلەردە وتە ماڭىزدى جانە قاجەتتى وبەكتىلەردىڭ ماقساتىنا ساي پايدالانىلماۋ فاكتىلەرى بولىپ وتىر. مىسالى، سەمەي قالاسىندا 2023 -جىلى 1,7 ميلليارد تەڭگەگە سالىنعان «ورتالىق» قازاندىعى جانار- جاعارماي ستانتسياسىنا جاقىن ورنالاسقاندىقتان، پايدالانىلماي تۇر. جەزقازعان قالاسىندا 2023 -جىلى شامامەن 600 ميلليون تەڭگەگە سالىنعان تۇرعىن ۇيگە ءالى كۇنگە دەيىن ەشكىم قونىستانباعان»، - دەدى ءاليحان سمايىلوۆ.
اۆتور
ەسىمجان ناقتىباي
