جىلدىق تابىس 400 ميلليارد تەڭگە: «بايتەرەك» حولدينگىنىڭ باسشىسى پرەزيدەنتكە ەسەپ بەردى
استانا. KAZINFORM - مەملەكەت باسشىسى «بايتەرەك» ۇلتتىق باسقارۋشى حولدينگى» ا ق باسقارما ءتوراعاسى نۇرلان بايبازاروۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆقا حولدينگتىڭ 2023-جىلعى قىزمەتىنىڭ ناتيجەسى، سونىڭ ىشىندە كاسىپكەرلىك پەن اگروونەركاسىپ كەشەنىنە قولداۋ كورسەتۋ، حالىقتى تۇرعىن ۇيمەن قامتاماسىز ەتۋ جۇمىستارى جونىندە ەسەپ بەرىلدى.
پرەزيدەنتكە بىلتىر حولدينگ اكتيۆىنىڭ ءوسىمى 12 پايىز بولعانى تۋرالى باياندالدى. كومپانيالار توبىنىڭ ينۆەستيتسيالىق جانە كرەديتتىك پورتفەلى 10 پايىزعا ارتقان. ال تازا تابىسى 7 پايىزعا جەتىپ، 400 ميلليارد تەڭگەدەن اسقان.
نۇرلان بايبازاروۆتىڭ ايتۋىنشا، ەكونوميكانىڭ ناقتى سەكتورىن دامىتۋ شەڭبەرىندە «بايتەرەك» ءىرى جوبالار مەن ليزينگتىك مامىلەلەردى قارجىلاندىرۋ كورسەتكىشىن 24 پايىزعا، ميكرو، شاعىن جانە ورتا بيزنەستەگى جوبالاردى قارجىلاندىرۋ جوسپارىن 42 پايىزعا اسىرا ورىندادى. قازاقستاننىڭ دامۋ بانكى مەن ونەركاسىپتى دامىتۋ قورىنىڭ جەلىسى بويىنشا 300 جوبا مەن ليزينگتىك مامىلە قارجىلاندىرىلىپ، 1,061 تريلليون تەڭگە يگەرىلدى. بۇل - رەكوردتىق كورسەتكىش. اگروونەركاسىپ كەشەنىنە 554,7 ميلليارد تەڭگە ينۆەستيتسيا قۇيىلىپ، جوسپارلانعان كولەمنەن 11 پايىزعا استى. سونداي-اق 2023-جىلى حولدينگتىڭ ەنشىلەس كومپانيالارى ارقىلى قۇرعاقشىلىق پەن ىلعالدىڭ شامادان تىس بولۋىنان زارداپ شەككەن 1,1 مىڭ فەرمەرگە 48 ميلليارد تەڭگە سوماسىندا كومەك كورسەتىلدى.
مەملەكەت باسشىسىنا بىلتىر حولدينگ ارقىلى 2 ميلليون شارشى مەتردەن استام تۇرعىن ءۇي پايدالانۋعا بەرىلگەنى جونىندە باياندالدى. تۇرعىن ءۇي سەكتورىنا 317,6 ميلليارد تەڭگە ينۆەستيتسيا سالىنعان. «وتباسى بانك» اكسيونەرلىك قوعامىنىڭ يپوتەكالىق باعدارلامالارى اياسىندا جالپى سوماسى 1 تريلليون تەڭگەدەن استام قارىز بەرىلدى.
كەزدەسۋدە حولدينگتىڭ 2024-جىلعا ارنالعان باستامالارى تۋرالى ايتىلدى. ونىڭ ىشىندە اگروونەركاسىپ كەشەنى جوبالارىنا 370 ميلليارد تەڭگە ينۆەستيتسيا قۇيۋ جانە 4 مىڭنان استام جاڭا جۇمىس ورنىن اشۋ، وڭدەۋ ونەركاسىبىن، تۋريستىك سالانى قارجىلاندىرۋ، قالدىقتاردى قايتا وڭدەيتىن جانە سۇرىپتايتىن زاۋىتتار سالۋ، 9-20-25 تۇرعىن ءۇي باعدارلاماسىن ىسكە قوسۋ سياقتى شارالار بار.
قاسىم-جومارت توقايەۆقا «بايتەرەك» حولدينگىنىڭ باستامالارىن جۇزەگە اسىرۋ ناتيجەسىندە ونىڭ ەل ەكونوميكاسىنا قوساتىن ۇلەسى جىل سوڭىنا قاراي 2022-جىلمەن سالىستىرعاندا ەكى ەسە ارتاتىنى جايىندا باياندالدى.
مەملەكەت باسشىسى ەكونوميكالىق ءوسىم مەن حالىقتىڭ تۇرمىس ساپاسىن جاقسارتۋ ءۇشىن جاڭا باعدارلامالاردى ىسكە قوسۋ جانە كەشەندى تاسىلدەردى قولدانۋ ماڭىزدى ەكەنىن اتاپ ءوتتى. سونىمەن قاتار حولدينگتىڭ ەكونوميكانى ءارتاراپتاندىرۋ جانە ستراتەگيالىق ءمانى زور سالالاردى دامىتۋ باعىتىنداعى جۇمىسىن جانداندىرۋ جونىندە ءبىرقاتار تاپسىرما بەردى.
