جىل سايىن قازاقستاندىقتارعا 70 مىڭنان استام پروتەزدىك-ورتوپەديالىق ءونىم بەرىلەدى

استانا. قازاقپارات  - 95,3 مىڭ ادام پروتەزدىك-ورتوپەديالىق كومەككە الاتىندار ساناتىنا جاتقىزىلعان. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ اپپارات باسشىسى نۇرداۋلەت تولەيەۆ ءمالىم ەتتى.

- قازىر ەلىمىزدەگى 737 مىڭعا جۋىق مۇگەدەكتىگى بار ادام تىركەلگەن. ونىڭ ىشىندە 95,3 مىڭى پروتەزدىك-ورتوپەديالىق كومەككە الاتىندار ساناتىنا جاتقىزىلعان. بۇل رەتتە، وسى كومەك تۇرىمەن 82,8 مىڭ ادام، ياعني 86,9 پايىزى قامتىلعان، - دەدى ن. تولەيەۆ سەناتتا پروتەزدىك- ورتوپەديالىق كومەك ماسەلەسىن تالقىلاۋ كەزىندە.

ونىڭ ايتۋىنشا، 2021 -جىلدان باستاپ مۇگەدەكتىگى بار ادامدار الەۋمەتتىك قىزمەتتەر پورتالى ارقىلى تەحنيكالىق جابدىقتار مەن قىزمەتتەردى، سونىڭ اراسىندا پروتەزدىك-ورتوپەديالىق كومەكتى وندىرۋشىلەر مەن جەتكىزۋشىلەردى ءوز بەتىنشە تاڭداۋعا قۇقىلى. قازىر پورتالدا 313 پروتەزدىك-ورتوپەديالىق زاتتى جەتكىزۋشى تىركەلگەن.

- ءتيىستى كلاسسيفيكاتوردا پروتەزدىك-ورتوپەديالىق قۇرالداردىڭ 19 ءتۇرى جانە 47 كىشى ءتۇرى قاراستىرىلعان. جىل سايىن 70 مىڭنان استام وسىنداي ءونىم مۇقتاج ازاماتتارعا بەرىلەدى. 2024 -جىلى قامتاماسىز ەتىلگەندەردىڭ ۇلەسى مۇقتاجداردىڭ جالپى سانىنىڭ 87 پايىزىن قۇرادى، - دەدى ول.

بۇدان بۇرىن حابارلانعانداي، 2025 -جىلدىڭ باسىنىن باستاپ مۇگەدەكتىك توبىن بەلگىلەۋ ءۇشىن مەديتسينالىق- الەۋمەتتىك ساراپتاما جۇرگىزۋدىڭ سىرتتاي فورماتى بويىنشا پيلوتتىق جوبانى ىسكە اسىرۋ شەڭبەرىندە قازاقستاننىڭ بارلىق وڭىرىنەن 43,7 مىڭ ءوتىنىم قارالدى.

اۆتور

رۋسلان عابباسوۆ